Read xamtanga 1ጢመቲወስስ 2 Bible Online

1ጢመቲወስስ 2 - xamtanga bible

1ጢመቲወስስ 2

¹ነስየ እጝቂስቅ በዊል ጨውንዝመ ፀለውትዝ፣ ላጥዝ ማጥን ጨወነውዝመ ሚዝየነዝ፣ እቅዝቅ፣ ንጕሳኒዝመ ስልጣን ጒጢዝቅ፣ ፃቭሽታንስ ማኽረኵን፤ እንም እደረት ጐውተነውዝመ ቅድስነዝ ቃውሽና ዲግተዝመ ፀፅተዝ ፅብናንስ ማጥን የጝ።

³እኒን ይናቓዘተ ኣቐው እደረት በዊል ዲስ ሸው ቀሰው ዊገ የጝ።

⁴ጘጝ እቅ እጝቅ ቓድጥጘንስ፣ እማንድየንትም ኣርቕጥጘ ማጥን በነኵ።

⁵ላው እደረ እኩ፤ ቈሽም እደረስመ እጅርዝ ማኽሊል ላው ኣርቅሰተ እኩ፤ ጘጝም እጅር ኣቐው ክርስቶስ እየሱስ የጝ።

⁶ጝቕምትም እጝቅዝቅ ጝታቺ ፃቭ ይዉ፤ እንም እማንተው ግርየይዝ ሚዝርሽትኩ።

⁷ያንም እንዝ ማጥን እኒን ኣቭዝርተድ ኣውጀር ኻወርየ፣ እምንትዝመ እማንዝም ኣኽዛቫኒዝ ክንሰተ ኣቕ ይምጩን፤ እኒንት ዊግጠውድ እማንዝ የጝ፤ ኻሽወቅም።

⁸ነስየ ግልቍ እጝቅ ፀለውት ስፍረይልቅ ኽልክዝመ ጭቓ ክርክርዝድቅ በርጝ ቀድስሽተቍ ጝታናንጣንድዛት ኒየ ዘርጋቕጝ ፃልይጥጘ በነኵን።

⁹እኒዝጘም እቍን ግልቭጭ ቈንሸነውዝ፣ ዊንም ዊርቀዝ፣ ዊንም እቍዝ፣ ዊንም ቈሽ ጝታወየድ ኪብረቍ ኣልብዝ ሺልምሸነውዝ ኣዪጝቀ፣ ትኽትነዝመ ጝታቕምት ቅመነውዝ ኒቭረው ኣልቨ ሲርጝነ።

¹⁰እደረት ኣምልክነኵን የቍ እቍን ፃቭጥጘ ጥውሸዊዝጘ፣ ቀሰው ምግቫርዝ ገይፅጝነ።

¹¹እውነ ጨምተነውዝመ እጝቅ ዊገይዝቅ ኣዚተነውዝ ክንድርነ።

¹²እውነ ዝም ይተጚ ክንስተ ዊንም ግልወይል ሳልጥንተ ፊቅደቅም።

¹³ምላሰንድም በዊል ፋጥርሸውድ ኣዳም የጝ፤ ጝእግርገይል ቈሽ ኺዋን ፋጥርሽች።

¹⁴ቈሽም ኻጝሽትር ኽጥያት ሰራሽረይሸን እውነየንጚ ኣዳምም ኣየው ኻጝሽተውድ።

¹⁵ዊገድ ግን እውነ እምንትዝ፣ ፍቅርዝ፣ ቅድስነዝ፣ ጝርቕምት ቅመነውዝ ፀናርሽ፣ ዅር እዅረነውዝ ቓድቲ።