Read xamtanga 1ጢመቲወስስ 3 Bible Online

1ጢመቲወስስ 3 - xamtanga bible

1ጢመቲወስስ 3

¹«ኣውማውቅ እቢስቈበስ[1] ኣጠ በንሽ ቀሰው ሰቭ በነኵ» የው ዊገድ ኣምንሸው የጝ።

²ነስየ እቢስቈበስ ነቐፈ እጀው፣ ላይ እውነት ጕርየ፣ ጝልክዝ ፅበው፣ ጝቕምት ቅመው፣ ስረትዝ ፅበው፣ ኣቭን ለምረው፣ ክንሰነው ቸለው፣

³ራቓው፣ ታኽንዳው፣ ዊገድ ግን ገርኽ፣ ጐርታው፣ ጊንዝቭ ቀናው፣ ኣጠ ጥውሸኵ።

⁴ቈሽም ጝቝርድዛት ጝት ኪብርዘነውዝ ኣዚተቍ ፃቭን ሊጊሰነውዝ በገዘ ጝበተሰቭድ ኒቭረጘ ጭሰጭሰው ኣጠ ጥውሸኵ።

⁵እጅር በገዘ ጝበተሰቭድ ጭሰጭሰነው ቸሊየውዝየ ኣወሽ የጝ እደረት ምከንሸንት ጭሰጭሰውድ?

⁶ትቪትዝ እብሽ ዳቪለውስ ፊርድሸው ፍርዲል ሊቫይየጘ ገነ ኣይር ክርስቲያን እቢስቈበስ ኣቒነ።

⁷ቈሽም ጝሽድ ኒቕፍሻየጘ ዳቪለውስት ፅውረይልም ጥዋየጘ ኣምናቍ እቂዝ በዊል ቀሰው ሽ ፃየው ኣነ።

⁸ዘቝንጥድም እኒዝጘ ኪብረቍ፣ ጝታቃልድ ላውጥውጣቍ፣ ንቕፀቍ ወይንዙ ሚዝ ዝየነው ቓቒታቍ፣ ኣግቫቭ እጀው ጒደነዝ ችጝሸው ጊንዝቭ በናቍ፣

⁹ኻይማነውትዙ ምስጢርድየንት ንፅዅ ኽሊነዝ ሊሚደቍ ኣጥጘ ጥውሽጘኵ።

¹⁰ጛይም በውገ እንዛይ ዊቂዝ ፊትንሽጝነ፤ እንዝ ግረ ነቐፈ እጀቍ ኣቕጝ ችጝሽጘውዝየ ዘውነይዝ ኣግልግልጝነ።

¹¹እኒዝጘም ጝታቍንድ ኪብረቍ፣ እጅር እርያቍ፣ ልክዝ ፅበቍ፣ እጝቅ ዊገይዝቅ ኣምንሽተቍ ኣጥጘ ጥውሽጘኵ።

¹²ዘውነ ላይ እውነት ጕየርየ፣ ጝቝሪዝመ ጝበተሰቪዝ ኒቭረጘ ጭሰጭሰው ኣጠ ጥውሸኵ።

¹³ጝታዘውነይዝ ቀሰው ፃቭጝ ኣግልግለቍድ ጝታቕምስ ንየስ የው መርግ፣ እየሱስ ክርስቶስትል ፃይጘው እምንቲዝም ኽየው ድፍርት፣ ችጝጥቍ።

¹⁴ቃዝየዝ ክጐ ተጨ ቲስፈ ፃቫንም እኳ ምናልቫች ተረነዊስ ደይሽ እቅ እደረት በተሰቪል ኣወይን ፅብጥጘ ጥውሸው ዊገድየንት ኣርቕራንስ ማጥን እኒንት ፃፈኵን፤ እኒን በተሰቭድም እማንዙ ዲቭየዝመ ሚስርትዝ ኣቐው ዘላልም ፅበው እደረት ምከን ጚ።

¹⁶ይናኻይማነውቲዙ ምስጢርድ ጥርጥር እጀው ጭቕጘ ዲንቅሰው የጝ፤ እንም፦ «እጅር ኣቕ ጋልፅሽቱ፤ እማንተው ኣቐነውድ መንፈስዝ ኣመካይነትዝ ኣርቕሽቱ፤ መላካኒዝ እትሉ፤ ኣኽዛቫኒዝ ሲቭክሹ፤ ኣልሚዝቍ እቅድ ጝት ኣምን፤ ክብርዝ ሲመይ ኣርጉ» የው የጝ።