Read xamtanga 1ጢመቲወስስ 4 Bible Online

1ጢመቲወስስ 4 - xamtanga bible

1ጢመቲወስስ 4

¹መንፈስ ቅዱስ ግን ግልፅዝ፦ «ኻትሸነይዙ ዝምኒዝ ላው ላው እቅ ቀሰቍ መንፈሳንዝመ፣ ጋኒናኒስ ችጝሸው ክንድጝዝ ወሸነውዝ ኻይማነውት ኻዲጥቍ» የኵ።

²እነየው ክንድጝድየን ተረውድ፣ ብረው ብረትዝ ቲጒተውሺ ጝታኽሊነድ ዲንዝዘው ኻሽወጥ ተክዘጥ ኣቐቍ እቂስ የጝ።

³እንዛይ እቅድ ገባሸነው ኪልክልጘኵ፤ ኣምነቍ፣ እማንድየንትም ኣርቐቍ እቅድዛይ እደረት ሚዝየንዝጛ ዅጛንስ ማጥን ጘጝ ጝቕም ፋጥረው ዅረድየንት ኪልክልጘኵ።

⁴ዊገድ ግን እጝቅ እደረ ፋጥረው ዊገድቅ ቀሰው የጝ፤ ሚዝየነዝ ለምርኑዝየም ማለነው ውረውረም እጀው።

⁵ምላሰንድም እጝቅቅ እደረት ቃልዝመ ፀለውትዝ ቀድሽተው የጝ።

⁶እንዛይ ዊቅድዛት ዚኒዝ ኻስቭዝርሽ፣ እምንትዙ ቃልዝመ ቲክንደው ቀሰው ክንድጚዝ ኻንፅሽትራ ሊግዝረር ቀሰው ክርስቶስት ኣገልጋይ ኣትር።

⁷እደረት ኪብርዛው እርቫነ እጀው ምቸ ታሪኪስመ ኣርጐውጣን እቍኒዙ ሲነ ሲነይስ እክልጭ፤ ኽሽስ እደረት ጐውተነውዝ ፅበነውዝ ክቕምት ዲዝጝሽ።

⁸ሰውነት ጣጝክራንስ ማጥን ዲዝጝሰነው፣ ዊቱዝ ጣቅመኵ፤ እደረት ጐውተነውዝ ፅበናንስ ማጥን ጛቕምት ዲዝጝሰነውድ ግን ነንስም ኣነ እግረ ተረው ርዅየዝ ቲስፈ ፃየው ኣቓንስቅ እጝቅ ዊገይዝቅ ጣቅመኵ።

⁹እን ዊገድ እጅር እጝቅ ለምርጠ ጥውሸው ኣምንሸው የጝ።

¹⁰ይን እቅድዛትቅ ኽሽም ጝት ኣምነቍድዛት ቓዘው ዘላልም ፅበው እደረት ቲስፈ ፃቭናንስቅ፣ ዝላነኵን፤ ልቕርድነኵንም።

¹¹እንዛይ ዊቅድዛት ኣዝ፤ ክንሽም።

¹²ዊግትንዝም ኣነ ፅብጘዝ፣ ፍቅርዝ፣ እምንትዝ፣ ንፅኽነዝም ምመናኒዝ ተከ ኣቕጚ ኣውማው እጅርቅ ክመሉነይዝቍዝ ክት ነቂነ።

¹³ያን ተጪስቅ ቅዱሳን መፃፋንድ ኽዝቭዝ ኣንቭቨነውዝ፣ ሲቭከነውዝ፣ ከንሰነውዝም ቲጊ።

¹⁴ምከን ቃወጥድ[2] ጝታናንጣንድ ክዲጊል ፃቭጛንድ ክጭስ ትንቪትዝ ድቍሽት ነይሽተው ይውትድየንት ቸለል ይተ።

¹⁵ክእምንቲዝ ኽየነውድ እጅር እጝቅ ቓላንስ ማጥን እንዛት ዊትርቅ ኻስቭ፤ ጛትም ቲግየዝ ፋፅም።

¹⁶ክቕምስመ ክክንስረው ክንድጚዝ ጣጝቅቅጭ፤ እንዛዝም ፀናቕ፤ እኒንት ፃብረውዝየ ክቕምትም ክት ወሸቍድዛትም ቓዝትር።