Read xamtanga 1ጢመቲወስስ 5 Bible Online

1ጢመቲወስስ 5 - xamtanga bible

1ጢመቲወስስ 5

¹ሽሚር ኣቐው እጅርድየንት ኣይርዝጘ ፃቭር ማኽርጚ ጋስፅተ፤ ውርጋጥድዛት ዚኒዝጘ ፃቭር ለምጭ።

²ሽመቅል እቍንድዛት ኲየንጣኒዝጘ፣ ፅጐንድዛት ቈሽ ፍፅም ንፅኽነዝ ዚኒዝጘ ፃቭር ለምጭ።

³እርግጥዝ ችግርኝጥ ኣቐቍ ልጀጊርዳንድዛት ኪብርዝ።

⁴ዊገድ ግን ላይ ልጀጊርድ ዅል ዊንም ኣውስምጥ ፃይረይ ኣርሽ፣ እንዛይ ዅልድ በውግስጝ ጝታበተሰቭድዛት ከቨነውዝመ ጝታኣቅሊዝ ውልየተ ኪፍለነውዝ ጝታእምንትድየንት ሰቭዝ ቓሊሰነው ክንድጝነ፤ ምላሰንድም እኒን የጝ እደረት ዲስ ሸውድ።

⁵እርግጥዝ ልጀጊርድ ኣቕር ጝርለ ፅብረይ እውነ፣ ጝርቲስፈድ እደረት ፃቭር ኻር ጊርቅ እደረት ከቨድ ጨውራ ፀለውትዝ ፀናቕር ፅበች።

⁶እን ኣልሚዙ ዲስተድ ቀንደይ ልጀጊርድ ግን ክሪርሽም እኳ ችብርጝዝ ክትረይ ጚ።

⁷ነቐፈ እጀው ፅብጛንስ ማጥን እንዛይ ዊቅድ ኽዝቪዝ ክንሽ።

⁸ላው እጅር ጝዚምዳንድዛት፣ ኽሽም ጝበተሰቭድ ከቫው ኣቐውዝየ ጝኻይማነውትድ ከደው፣ ኻይማነውት እጀው እጅሪስም ወሰው ጭቓ የጝ።

⁹ዋልጥርጝን ምት እቻቒረይ ልጀጊርድ ልጀጊርዳኒዙ መዝገቪል ጥውር ሚዝግቭሺርነ፤ ቈሽም ላው ግልወዝውነ ዊንደይ ኣተ ጥውሸኵ።

¹⁰ጝርቝርት ስረትዝ ሊጊሰነውዝ፣ ኣብን ለምርነውዝ፣ ቅዱሳኒዝ ልኵጣንድ እቓሰነውዝ፣ ቺግርሸቍድዛት ከቨነውዝ፣ ቀሰው ምግቫርድቅ ቲክነነውዝ ኣውማው ቀሰው ሰቭድቅ ሰራሸነውዝ ሚዝርሽረይ ኣተ ጥውሸኵ።

¹¹ጝታጕልቍ ክረቍ ፅጐን እቍንድዛት ግን እነየው መዝግቢል ድውተ፤ ምላሰንድም ጝታስየይዙ ምርቕፀድ ክርስቶስስ ጥውጘው ቃሊል ኻይልዳንድ ሊጘት ግልወ ድውጥጘ በንጘኵ።

¹²እንዛይ እቍንድ በውገ ጥውጘው ቃልድየንት ፋዝጛንስቅ ጝታቕምትል ፍርድ ነስጘኵ።

¹³ቈሽም እቀ ጝን ጨቨቅ ጅልውጛ ሰቭ ቀረነው ክንድጘኵ፤ ሰቭ ቀረነው ጭቝ ኣዪጝቀ እጅር እሪጛ ጛት ድውሳው እቀ ገቪልቅ ጥውጛ ዊግጥነ ጥውሻውድየንትቅ ሊልፈቍ ኣጘኵ።

¹⁴እንዝ ማጥን ጝታጕልቍ ክረቍ ፅጐን እቍንድ እንደ ገነ ድውጛንስ፣ ዅል እዅርጛንስ፣ ጝታጝንድየንትም ስረትዝ ጭሰጭስጛንስ ማኽረኵን፤ እኒንት ፃቭጘውዝየ ፃለት ጝታሽድ ጨቀነው ዊገ ችጛውም።

¹⁵እንዝ ሚቅ ጛጊስ ላው ላውድ ሲጣንድየንት ቲክንጥጘ ጝታእምንቲስ ዘወር ይጝኵ።

¹⁶ክርስቲያን ኣረይ ኣውማው እውነ ጝርበተሰቪል ልጀጊርዳን ፃይር ፅብርሽ፣ ምከንት መውር ኣቓይጘጘ ጚ ጝርቕም ጕይርነ፤ እንዝ ኣይንትዝ ምከን ጕየው ዚነ እጀቍ እማንተቍ ልጀጊርዳንድዛት እርዲ ይተ ቸለች።

¹⁷ምከንት ቀሰው ፃቭጝ ጭሰጭሰቍ፣ ኽሽም ሲቭከነውዝመ ክንሰነውዝ ቲግየቍ ምከን ቃወጥድ እፅፍ ኪብርጥጘ ጥውሸኵ።

¹⁸ምላሰንድም ቅዱሳን መፃፋንድ፦ «ደሲተው ቢረድየንት ጝምቸድ ሊጕምተ»፦ «ቈሽም ሰራሸውዝ ምኻየ ጥውሸኵ» ይጘኵ።

¹⁹ሊጘ፣ ዊንም ሻቘ እቅ ሚዝርዲጘውዝየ ምከን ቃወተል ተረው ክስ ለምርተ።

²⁰ላጥድም ቓልጝ ጣጝቅቅሽጛንስ ማጥን ኽጥያት ሰራሸቍድዛት እቀ በዊል ፃብር ጋስፅ።

²¹ኣውማው እጅርዝቅ ኣድልዊጝቀ፣ ላውድ ላየይስ ዲቈዲቍሲጝቀ እንዛይ ትዛዛንድዛትቅ ሊሚድራንስ፣ እደረት በዊል፣ ክርስቶስ እየሱስት በዊል፣ ማርፅሽተቍ መላካኒዝ በዊልም ክኻደረ የኵን።

²²ኣውማውትልቅ ክናንድ ጝዲጊል እቝርን ይመነውዝ ደርተ፤ ክቕምት ንፅኽነዝ ሊምጭጚ ላጥ እቅ ጅቅ ኽጥያትዝ ተቫቭርሽተ።

²³ክጊዝዊዝመ ዊትርቅ ጐው ክፅውዘይዝቍዝ ዊትቍ ወይንዝቍ ሚዝ ዝጭጚ ነስየ ኣቝ ጭቝ ዝይተ።

²⁴ላው ላው እቂዙ ኽጥያትድ ጋልፅሽተው ኣቓንስቅ፣ ጛይ ፍርድል ችጚጝቀ በዊል ጥፋትኝጥ ኣቐነውድ ኣረሰኵ፤ ላጥ እቂዙ ኽጥያትድ ግን ኣረሰውድ ዘገም የው የጝ።

²⁵እኒዝጘ ቀሰው ምግቫርም ጋልፅሽተው የጝ፤ ጋልፅሽቲየው ፅብሽ እኳ ጭቭር እዳቓውም።