Read xamtanga 1ጢመቲወስስ 6 Bible Online

1ጢመቲወስስ 6 - xamtanga bible

1ጢመቲወስስ 6

¹እደረት ሽዝመ ይናክንድጚዝ ዛሽሻየጘ ቅምሸቍ ኣገልጋያንድቅ ጝታኣደርጥድዛት ምሉ ክቭርዝ ኪብርሽትጥጘ ጥውሸውቍ ፃቭጝ ኻስቭጝነ።

²ኣምነቍ ኣደርጥ ፃየቍ ኣገልጋያንድም፣ ጝታኣድርጥድ ኣደረ እየሱስትቍዝ ጝታፅን ኣጛንስቅ ነቂጝነ፤ እንዲያውም ጝታኣደርጥድዛይ ጝታኣግልግለውቲዝ ጣቅምሸቍ፣ ኣምነቍ፣ ቀንሸተቍም ኣጛንስቅ በውገትዊስ ዲቍስጝ ኣግልግልጝነ፤ ክትም ክንስተ፣ ማኽርተም ጥውሸውድ እንዛት የጝ።

³ይናኻይማነውትዙ ክንድጚዝመ ይናኣደረ እየሱስ ክርስቶስቱ እማን ኣቐው ቃሊዝጅቅ ቲስመማው ጝሉ ክንድጝድ ክንሰው ኣውማው እጅር ፅብሽ፣

⁴እድየን እጅርድ ትቪትዝ እብሽኩ፤ ውረውረቅ ኣስክሳውም፤ ዊገድ ግን ቃላንዝቍዝ ተከራክርሸነውዝመ ጐርተነውዝ ጭቕጘ ማርቕፀኵ፤ እነየው ጣቅማው ምርቕፀድ ቅንየ፣ ጐር፣ ዛን፣ ጭቓ ጥርጥር፣ ቲክንዘኵ።

⁵ጝታኣይምረውድ ጨቅሸው፣ እማኒስም እክልደቍ እቂዝ ማኽሊል ችጝሸው ቀቨነ እጀው ክርክር ቲክንዘኵ፤ እነየቍ እቂዝ፣ ኻይማነውት ኻፍት ችጘነው ጒደነ ተክ እትለኵ።

⁶ዊገድ ግን፦ «ይፃቀውድ ኣቐኵ» የው እጅርዝ፣ ኻይማነውት ኽየው ትርፍ የጝ።

⁷እን ኣልሚል ውረውረም ፃይን ተሪነቅ፤ ፊርናንድም ውረውረም ፃይን ፊራይነቅ።

⁸ዀነውዝመ ሲረነውዝ ችጝነውዝየ ይናጭስ ኣቐኵ።

⁹ኻፍታማን ኣጥጘ በነቍድ ኣጛንድ፣ ፊተነዝ ሊቭጘኵ፤ እኒዝጘም እጅርድየንትቅ ፋዛ፣ ድሳም ዛቅጥዝ እዳዘው ጊነቱ ኣቐው ጒድየው ጝሉ ጝሉ ምርቕፀዙ ፅውረዝ ፃይሽጘኵ።

¹⁰ምላሰንድም ጊንዝቭ ቀነነው፣ ኣውማው ኽጥያቲዝቅ ስር የጝ፤ ላው ላው እቅ እኒንት በንጛንድ ጝታኻይማነውቲስ ቀርጝ ጝታቕምት ኽየው ስቃይል ማልጝኵ።

¹¹እደረት እጅርወ! ክት ግን እንዛጊስቅ ሰይ! ፅድቅ፣ እደረት ጐውተነውዝ ፅበነው፣ እምንት፣ ፍቅር፣ ኣቕልዝ ፀናቐነው፣ ገርኽት፣ እንዛትቅ ቲክንክን።

¹²እምንትዙ ቀሰው ትግልድየንት ቲግልጭ፤ ንቕፀቍ ሚዝረጫንዝ በዊል እማንዝ ሚዝርድረው ክጭጝሽረው ዘላልምት ርዅየድየንት ፃጭ።

¹³እጝቅዝቅ ርዅየ ይወው እደረት በዊል፣ በንጢንቱ ቢላጠውስት በዊል እማንድየንት ሚዝርደው ክርስቶስ እየሱስት በዊልም ክኻደረ የኵን።

¹⁴ይናኣደረ እየሱስ ክርስቶስ ጋልፅሽትጢስቅ ኣሽ እኒን ትዛዝድየንት ኒውርዝመ ነቐፈዝ ችጝሻር ኣቕር ሊምጭ።

¹⁵ክርስቶስት ጋልፅሽተነ ግርየድየንትም በርክሸው፣ ጘጝ ጝለ ቅመተ፣ ንጕሳኒዝ ንጕስዝመ ኣደርጢዝ ኣደረ ኣቐው እደረ ጝቕም ዊስነው ግርየይዝ ቓሊስጡ።

¹⁶ጘጝ ጭቝ ክራው የጝ፤ ኣውማውቅ ኣልጠ ቸላው ብርኻንል ፅበኵ፤ ጝት ቓለው ኣውማውም እጀው፤ ቓልጠም ቸላውም፤ ክቭርዝመ ኻይልዝ ዘላልም ኣልም ኣሽ ጝጭስ ኣነ፤ ኣሚን።

¹⁷እን ኣልሚዝቍ ኻፍታማንድ ኲራይጘጘ፣ ጝታቲስፈድም እኒን ኣምንሻው ኻፍቲል ኣዪጝቀ ዲስ ይናንስ እጝቅትቅ ቲርፍዝ ነየው እደረትል ፃቭጛንስ ማጥን ኣዝ።

¹⁸ቀሰው ፃቭጛንስ፣ ቀሰው ሰቭዝ ኻፍታማን ኣጛንስ፣ ልግስነዝ ይውነው ቀነቍ ኣጛንስ ማጥን ኣዝ።

¹⁹እነሸነውዝም እማንተው ርዅየድ ችጛንስ ማጥን ተረው ዚምኒዝ ፀናቐው ሚስርት ፃየው ኻቭት ጝታቕምስ ኣኽቭጘኵ።

²⁰ጢመቲወስወ! ኽድርዝ ለምትረውድየንትቅ ሊሚጭ፤ እደረት ኪብርዛው ጊነቱ ሊልፈነዊስ፣ ኻሽትዝ፦ «ኣርቕት» ይሽተው ፍልስፍነዙ ክርክሪስም እክልጭ።

²¹ጛጊስ ላው ላው እቅድ፦ «እኒንት ተከው ኣርቕት ፃይነቅ የጝ» ይጛ እምንትዙ ጒደነይስ ፍጝ ሊብጝኵ። ፃገ ክታጅቅ ኣነ።