Read xamtanga 2ጢመቲወስስ 2 Bible Online

2ጢመቲወስስ 2 - xamtanga bible

2ጢመቲወስስ 2

¹ነስየ ይዅርወ! ክርስቶስ እየሱስቲስ ችጝሸው ፃገይዝ በርታቕ።

²ንቕፀቍ ሚዝረጫንዝ በዊል ይጊስ ወሽረውድየንት፣ ላጥድዛት ክንስጥጘ ቸለቍ ኣምንሽተቍ እቅዝ ኽድር ይይ።

³ክርስቶስ እየሱስቱ ቀሰው ዊተድረይዝጘ ኣቕር ይጅቅ ሚከረ ለምጭ።

⁴ዊተድርነይዝ ኣግልግለው እጅር ጝኣዘተድየንት ዲስ ሽጠ ልቕርደኵጚ ላየ ጨነዙ ሰቭዝ ጣልፍልፍሻውም።

⁵እኒዝጘም ውጠዝ ተወዳድርሸው እጅር ውድድሪዙ ደምቢዝጘ ፃቭ ውጥዪየውዝየ ድሊዙ ኣክሊልድየንት ችጛውም።

⁶ትጉ ኣርሸም ኣዝምረይስ ችጝሸው ምርቲስ ጣቅምሸነውዝ በውረ ኣጠ ጥውሸኵ።

⁷ያን የውድየንት ልብ ይ፤ ምላሰንድም ኣደረ እጝቅ ዊገይዝቅ ኣስቱለነውድ ነይጡ።

⁸ክርጘይስ ጐው፣ ዳዊትት ዚረም ኣቐው እየሱስ ክርስቶስት ኻስቭ፤ ያን ሲቭከው ወንጌልድም እኒን የጝ።

⁹እኒን ወንጌሊዝቍዝም ወኝጀለኘይዝጘ ሰንሰለትዝ እፅውጪስቅ ሚከረ ለምጠኵን፤ እደረት ቃልድ ግን እፁሻውም።

¹⁰እንዝ ማጥን ጛይም ክርስቶስ እየሱስት ኣማካይነትዝ ችጝሸው ቓደነድ ዘላልምቱ ክብሪጅቅ ችጛንስ፣ እደረ ማርፀቍ እቂዝ ማጥን የር እጝቅትቅ ታግስሽጠኵን።

¹¹እንት የው ዊግሸው ቃልድ ኣምንሸው የጝ፦ «ጝጅቅ ክርነውዝየ፣ ጝጅቅ ቈሽ ርዅየዝ ፅብንቅ፤

¹²ኣቕልዝ ፀናንሽ፣ ጝጅቅ ቈሽ ኒግስንቅ፤ ጝት ኻዲንሽ ጘጝ ቈሽ ይናት ኻዲጡ፤

¹³ይን ኣምንሻይነቅ ኣንሽ፣ ጘጝ ኣቓንድ ጝቕምት ኻዲጠ ቸላው ኣቓንስቅ ኣምንሸው ኣቕ ፅበኵ።»

¹⁴እንዛይ ዊቅድዛት ኻስቭዝ፤ ቃላንዝ ታኽንዳይጘጘ እደረት በዊል ጣጝቅቅሽ፤ እኒን ቃላንዙ ታኽነድ ወሸቍ እቅድዛት ድስጠ ኣቕሽጚ ውርም ጣቅማው።

¹⁵እማንተው ቃልድየንት ትክክል ፃቭ ኣስርድዘው፣ ጝሰቪዝም ኣይቭሳው እደረ ለምረው ሰራሸተ ኣቕር ክቕምት ጝበዊል ኣልስራንስ ማጥን ቲጊ።

¹⁶እደረት ኪብርዛው ጊነቱ ታኽነይስ እክልጭ፤ እነየው ታኽነድ ቀነቍ እቅድ እደረቲስ እክልድጛ የጝ ፊርጘውድ።

¹⁷ጝታክንድጝድ ፈራቓ ፊረው ልኻኒዝጘ ይጝ፤ እንዛይ እቂዝ ማኽሊስ ኸሚነወስስመ ፊሊጡስስ ችጝሽጘኵ።

¹⁸እንዛይ እቅድ፦ «ክርጘይስ ጐነድ እንዝ ሚቅ ዲቍኩ» ይጛ እማንድየንት ቀርጝ ላው ላው እቂዝ እምንትድየንት ጊልብርጘኵ።

¹⁹ኣነጚ፦ «ኣደረ ጝቍ ኣቐቍድዛት ኣርቐኵ» ቈሽም፦ «ኣደረት ሽድ ጭጘውድቅ ጭቕቲስ እክልድነ» የው ፅፈሽ ቃርፅሽተው ኒንቅሻው እደረት ሚስርት ችብርኩ።

²⁰ላው ኽየው ጝንል ዊርቀዝመ ቍርሸዝ ተስንቍ ጐዝ ጭቝ ኣዪጝቀ ቃነዝመ ሻኽለዝ ተስንቍ ጐዝም ዊንጘኵ፤ እንዛይ ጐዚስ ላው ላውድ ኪብረው ኣግልግለውትል ግርየኵ፤ ላው ላውድ ቈሽ ክቭር እጀው ኣግልግለውትል ግርየኵ።

²¹ነስየ ኣውማው እጅር እንዛይ ክቭር እጀቍስ ጝቕምት ንፅዅ ፃቭሽ ኪብረው ኣግልግለውትል ግርየው፣ ቀድስሸተው፣ ጝኣደረይዝም ጣቅመው፣ ቀሰው ሰቭዝቅ ኣስልሸው ኣጡ።

²²ውርጋጥነይዙ ጭቓ ምርቕፀይስ ሰይ፤ ንፅዅ እዘነዝ ኣደረት ጭጘቊጅቅ ፅድቅ፣ እምንት፣ ፍቅር፣ ዲግተ እንዛት ኪው ሽር ቲክንክን።

²³ዊገድ ግን ጐር ነስጠጘ ኣርቕረር ኣራንስቅ ኻጝልት ጊነቱም ኣቐው ክርክሪስ እክልጭ።

²⁴ኣደረት ኣገልጋይ እጅር እጝቅዝቅ ገርኽ፣ ክንስጠ ቸለው፣ ኣቕሉ፣ ኣጠ ጥውሸኵጚ ጐርጠ ጥውሻውም።

²⁵ጝት ተቃውምሸቍ እቅድዛት ምናልቫች እደረ እማንድ ኣርቕጛንስ ንስኻ ጥወነው እድል ይውጡ ኣቕሽ ቲስፈ ፃቫ ገርኽነትዝ ኣርመው ኣነ።

²⁶እንዝ ኣይንትዝም ጝታእዘኒል ዋጥርጝ ዳቪለውስ ጝፍቃድድ ፋፅምጛንስ ማጥን ጘጝ ጛት ፃየው ፅውረይስ ኣምልጥቍ።