Read xamtanga 2ጢመቲወስስ 3 Bible Online

2ጢመቲወስስ 3 - xamtanga bible

2ጢመቲወስስ 3

¹ዊገድ ግን ኻትሸነይዙ ዝምኒዝ ጨጝቅዘው ግርየ ተርጠጘ ኣርቕ።

²እቅ ጝታቕምት ቀነቍ፣ ጊንዝቭ ቀነቍ፣ ምክኽኝጥ፣ ትቪትኝጥ፣ ዛሸጥ፣ ጝታኣቅሊዝ ኣዚታቍ፣ ሚዝየነ እጀቍ፣ ቅድስነ እጀቍ፣

³ፍቅር እጀቍ፣ ይቅርተ ፃቫቍ፣ እጅር እርየቍ፣ ጝታቕምት ቅማቍ፣ ጨካኛን፣ ቀሰውድየንት ቀናቍ፣

⁴ኻድየጥ፣ ደርተቍ፣ ትቪትዝ እብሸቍ፣ እደረት ቀነነው ሽ እን ኣልሚዙ ዲስተድ ቀነቍ፣ ኣጥቍ።

⁵ኻይማነውት ፃየቍ ተክጝ እትልጘኵ፤ ኣነጚ ኻይማነውቲዙ እማንተው ኻይልድ ኻዲጘኵ፤ እነየቍ እቂስ እክልጭ።

⁶እንዛይ እቅድ ጝን ጨቨቅ ጭልቕጝ ጥውጛ ኽጥያት ጝታዲጊል ኪምርሸው፣ ጝሉ ጝሉ ምርቕፀዝ ፃይሽጝ ወለል የቍ፣ ዊትርቅ ክንድጛ ስሪስቅ እማንድየንት ኣርቐነውል ችጝጥጘ ቸላቍ፣ መንፈሰ ዲካማን እቍንድዛት መራቐቍ ጛይ።

⁸እያኒስስመ እያንቨሪስስ ሙሴት ተቃውምሽጘጘ እን እቅድም እማንድ ተቃውምሽጘኵ፤ እንዛይ እቅድ ጝታእዘንድ ድዘው፣ እምንቲስም ሊቨቍ ጛይ።

⁹ዊገድ ግን ጛጭስ ሰካቓውም፤ ምላሰንድም እያኒስስመ እያንቨሪስስታ ኻጝልትድ ጋልፅሽተጘ እን እቂዝ ኻጝልትድም እቀ በዊልቅ ጋልፅሽትጡ።

¹⁰ክት ኣራንድ ይክንድጝድ፣ ይፅብጘድ፣ ይኣለመድ፣ ይእምንትድ፣ ይኣቕልድ፣ ይፍቅርድ፣ ይፅናትድ፣

¹¹ይግል ችጘው ስድቲዝመ ሚከረይዝ፣ እንዛትቅ ኣርቕርኵሩ፤ ኣንፀውክየስ፣ ይቈንወንስ፣ ልስጥራንስም ለምጠው ሚከረድየንትቅ፣ ታግስጨው ስድትድየንትም እጝቅትቅ ኣርቕረኵ፤ ኣደረ ግን እጝቂስቅ ቓዙ።

¹²እርግጥም ክርስቶስ እየሱስት ኣምነነውዝ እደረት ጐውትጛ ፅብጥጘ በነቍድቅ ሚከረ ለምርጥቍ።

¹³ዊገድ ግን ጭቕ፣ ኻጝሰጥም ኣቐቍ እቅ ጝታቕምም ቀርጛ፣ ላጥድዛትም ቀስጛ ጭቕትዝ ዲጊል ወሰው ጭቕት ቈሽጛ ፊርጥቍ።

¹⁴ክት ኣራንድ ክንድረውድ ኣውቲስ ኣቐጘ ኣርቕረር ኣራንስቅ ክክንድረዊዝመ ክተረድሽትረው እማኒዝ ፀናቕ።

¹⁵ክመሉሲጝቀይስ ኪርምር ክርስቶስ እየሱስት ኣምነነውዝ ቓደነ ችጚሰው ጥቨቭ ነየቍ ቅዱሳን መፃፋንድዛት ኣርቕርኵሩ።

¹⁶ቅዱሳን መፃፋንድ እጝቅቅ እደረት መንፈስዝ ቃውሸነውዝ ፃፍሸቍ ጛይ፤ እደረት እጅር በቃቐው ኣቓንስ፣ ቀሰው ሰቭድቅ ሰራሸነውዝም ኣስልሸው ኣቓንስ፣ ጛይ፦ ክንሰናንስ፣ ጋስፀናንስ፣ እዘን ጭቅሸናንስ፣ ፅድቅዙ ጒደነዝ ማኽረናንስም ጣቅምጘኵ።