Read xamtanga 2ጢመቲወስስ 4 Bible Online

2ጢመቲወስስ 4 - xamtanga bible

2ጢመቲወስስ 4

¹እደረት በዊል፣ እኒዝጘም ፅበቊልም ክረቊልም ፊርድጠ ፅበው ክርስቶስ እየሱስት በዊል፣ ጝጋልፅሽተነይዝመ ጝምጝግስቲዝ ኻስቨነውዝ ኽድርድ ነቀኵን።

²እደረት ቃልድየንት ሲቭክ፤ ግርየድ ሚችሽም ሚቺይሽም ሲቭከነውዝ ፀናቕ፤ ኽየው ኣቕልዝመ ጥውሻንትጘ ክንሰነውዝ ጭቅ ሽ፤ ጋስፅ፤ ማኽርም።

³ምላሰንድም እቅ ንፅዅ ክንድጝድየንት ለምራይጘው ግርየ ተርጡ፤ እኒስ ሽ ጝታምርቕፀይዝ ቲስመመው፣ ጝታቀርዝጣኒዝም ወሽጥጘ በንጘው ዊገድየንት ክንስጛንስ ማጥን ጝታቕምስ ንቕፀቍ ክንሰጥ ኣኽብጥቍ።

⁴እማንድ ወሸነዊስ ጝታቀርዝጣንድዛት ዊስጥቍ፤ ሲነ ወሸነውልም ዋጥርጥኵ።

⁵ክት ኣራንድ ኣውማው ኣቕኒዝቅ እርጋረር ኣቕ፤ ሚከረ ለምረነውዝ ፀናቕ፤ ወንጌል ሲቭከተዙ ሰቭድየንት ሰራጭ፤ ክኣግልግለውትድም እጝቅትቅ ፋፅም።

⁶ያን ኣቓንድ ምስዋይት ሲውሽታንትጘ ይርዅየሸን ሲውሽትተ ጕራንስቅ እን ኣልሚስ ቲት ፊጠው ግርየድ ችጝኩ።

⁷ቀሰው ገድልድ ቲግልጭኩን፤ ይውጠድየንት ኻትኩን፤ ኻይማነውትድ ሊሚጥኩን።

⁸ነስየ ፅድቅዙ ኣክሊል ኣስልሽ ይት ሊሚደኵ፤ እኒን ኣክሊልድየንትም እማንዝ ፊርደው ኣደረ እድየን ግርየይዝ ይጭስ ነይጡ፤ ቈሽም ይጭስ ጭቝ ኣዪጝቀ ጝተረነድ በንጛ ሊሚደቊዝቅ ይውጡ።

⁹ቃዝየዝ ይጐ ተርተ ቲጊ።

¹⁰ምላሰንድም ዲማስ እኒን ኣልምልድየንት ቀን ይት ማል ተሰለቅየ ፊርኩ፤ ቂርቂስ ገላትየ ፊርኩ፤ ቲተውም ድልማጥየ ፊርኩ።

¹¹ይጅቅ ፅበውድ ሉቃስ ጭቝ የጝ፤ ማርቈስ ይኣግልግለውቲዝ ከቭሰው ኣቓንስቅ ፃይር ለው።

¹²ትጪቈስት እፊሰውን በርስኩን።

¹³ተትራንድ ጢረዋደ ኣክርባትል በጠው በርነውሲዝመ መፃፋኒዝ፣ ኽሽም ብራንጥ መፃፋንድዛት ፃይር ለው።

¹⁴ኣንጥረኘ ኣቐው እስክንድረውስ ይግል ኽየው በደል ችጝዝኩ፤ ኣደረ ጝናነቍድ ይውጡ።

¹⁵ይን ዊግትነውድየንት ጭቕጘ ተቃውምሻንስቅ ክትም ጝጊስ ጣጝቅቅጭ።

¹⁶ኪስሽጠው ዊገይዝ ይበውረ ተከላክልሸነድ ኣልሳንድ እጝቅቅ ይጊስ ቲትጝ ዊንጚ ይጋቢል ይት ከቨው ላው እጅርም ዊኒየው፤ እኒንትም እደረ ጝታጭስ በደል ፃቭ እግዚነ።

¹⁷ዊገድ ግን ያን ወንጌልድየንት ምሉበምሉዝ ሲቭካንስመ ኣኽዛቫንም እጝቅቅ ወሽጛንስ ማጥን ኣደረ ይጅቅ ኣቕ በርታዙ፤ ኣብዘዙ ምቸይስም ቓጡን።

¹⁸ኣደረ ይት ኣውማው ጭቓ ዊገይስቅ ቓዝጡ፤ ሲመይቱ ጝምጝግስቲልም ችጝዝጡ፤ ጝጭስ ዘላልማልም ኣሽ ክቭር ኣነ፤ ኣሚን።

¹⁹ብርስቅለስመ ኣቂለስ ኸነሲፈሩት በተሰቪዝም ዲግተ ኣልሽ።

²⁰ይርስጠውስ ቈረንተውስ እዳቕኩ፤ ጥረፊመስም ፅዊቱዝ ሚሊጢን በጥኩን።

²¹ጫረ ጥዊጝቀ እንል ተርተ ቲጊ፤ ይግሉስ፣ ቡድየስ፣ ሊነስ፣ ቅላውዲየ፣ እጝቅ ይናፅንድቅ ክጭስ ዲግተ ኣልስጘኵ።

²²ኣደረ ክጅቅ ኣነ፤ ፃገ ክታጅቅ ኣነ።