Read xamtanga ቲተውስ 1 Bible Online

ቲተውስ 1 - xamtanga bible

ቲተውስ 1

¹እደረት ኣገልጋይ፣ እየሱስ ክርስቶስት ኻወርየም ኣቐዊስ፣ እደረ ማርፀቍ እቅድዛት ጣጝክርዛንስ፣ ኻይማነውትዙ እምንትድም ምሉበምሉዝ ኣርቕጛንስ ማጥን ይምሸው ባውሎስቲስ እፃሽተው እፃ።

²እኒን እምንቲዝመ ኣርቕቲዝ ሚስርትሽጘውድም፣ ኻሽዋው ኣምላክ ዚምናኒስ በውገ ቃል ጥወው ዝላልምዝ ርዅየዙ ቲስፈይል የጝ።

³ጘጝ ዊስነው ግርየድ ችጛንድም፣ ይናት ቓዘው እደረት ትእዛዝዝ፣ ይጭስ ኽድር ነይሽተው ስቭከቲዝ ኣማካይነትዝ ጝቃልድየንት ጋልፁ።

⁴ይናላብጠቱ እምንቲዝ እማንተው ይዅር ኣቐው ቲተውስ ችጝነ። እደረ ኣይርቲስ፣ ይናቓዘተ ክርስቶስ እየሱስቲስም ፃገዝመ ዲግተዝ ክጭስ ኣነ።

⁵ያን ክት ቀርጢስ በጠውድ እዳቐውድየንት እርውዝራንስ፣ ያን ክት ኣዘጘም ኻትመ ጨቨቅ ምከን ቃወጥ[1] ይምራንስ የጝ።

⁶ምከን ቃወተነቐፈ እጀው፣ ላይ እውነት ጕርየ፣ ስድ ኣቐነውዝመ ኣዚጠቅ የነውዝ ጝታሽⶖውድ ጒሻው፣ ኣምነቍ ዅል ፃየው ኣጠ ጥውሸኵ።

⁷እቢስቈበስ[2] እደረት ሰቭድየንት ኽድርዝ ለምረው ኣቓንስቅ ኒቕፍሻው ኣጠ ጥውሸኵ፤ እኒዝጘም ኲራው፣ ቈጣሻው፣ ራቓው፣ ታኽንዳው፣ ጊንዝቭዝ የው ጥውሻው ዊገ ፃቭጠ ውጥያው፣ ኣነ።

⁸ኽሽስ ኣቭን ለምረው፣ ቀሰው ኣቐው ዊገድ ቀነው፣ ጝቕምት ቅመው፣ ቅን፣ ቅዱስ፣ ጠጝቃቅ፣ ኣጠ ጥውሸኵ።

⁹ላጥድዛት እማንተው ክንድጚዝ በርታዝጠ፣ እኒን ክንድጝድየንት ተቃውምሸቍድዛትም ዊቅስጠ ክንደጘ ኣርቕ፣ ኣምንሸው ቃሊዝ ፀናቐው ኣነ።

¹⁰ምላሰንድም ንቕፀቍ እቅ ኽሽም ጊርዝሽተነውዙ ስረትድ ቲክነቍ ኣይዅዳነ ዊግኒስ ኣቐቍ እቅ፦ ኣዚታቍ፣ ጊነዝ ሊልፈቍ፣ ኻጝሰቍ፣ እኵⶖ።

¹¹እንዛይ እቅድዛት ዝም ሸነው ጥውሸው የጝ፤ ምላሰንድም ኣይቭሰው ኣቕንዝ ጊንዝቭ ችጝጥጘ ሲግቭግቭሸነውዝ፣ ጥውሻው ዊገ ክንስጛⶖ በተሰቭድየንትቅ ኻውክጘኵ።

¹²በገዘ ጝታቕምትቍ ነቭያታኒስ ላውድ፦ «ቀርጢስትቍ እቅድ ዊትርቅ ኻሽወጥ፣ ጨካኛን ኣረዊታን፣ ሲዝወጥ፣ ዀዳማን ጛይ» የው ዊግታንድ ወጭኩን።

¹³እኒን ሚዝርነይድም እማን የጝ፤ እንዝ ማጥን ቐናዝር ጋስፅ፤ እንም እማንተው እምንትድየንት ፃይጛንስ፣

¹⁴ኣይዅዳነ ሲነሲነድ፣ ዊንም እማኒስ እክልደቍ እቂዙ ምኽርድ ወሻይጘጘ የጝ።

¹⁵ንፅዃኒዝ እጝቅ ዊገድቅ ንፅዅ የጝ፤ ርኵሳኒዝመ ኣምናቍ እቂዝ ግን ንፅዅ ኣቐው ውረውረ ዊገቅ እጅውም፤ እንዲያውም ጝታኣይምረውድም ኣነ ጝታኽሊነድቅ ኣርክሽተው የጝ።

¹⁶እደረት ኣርቕነኵን ይጘኵ፤ ዊገድ ግን ጝታሰቪዝ ኻዲጘኵ፤ ስኽፍሸቍ፣ ኣዚታቍ፣ ቀሰው ሰቭዝ በቃቓቍ ጛይ።