Read xamtanga ቲተውስ 2 Bible Online

ቲተውስ 2 - xamtanga bible

ቲተውስ 2

¹ክት ግን እማንተው ክንድጚጅቅ ቲስመመው ቃልድየንት ክንሽ።

²ግልቍ ሽመቅልድ ጨምተቍ፣ ኪብረቍ፣ ጝታቕምት ቅመቍ፤ እምንትዝ፣ ፍቅርዝ፣ ኣቕልዝ ትኽንቍ እጛንስ ማጥን ማኽር።

³እኒዝጘም እቍን ሽመቅልድ ጝታፅብጘይዝቅ ኪብረቍ ኣጛንስ፣ ቀሰው ኣቐውድየንትቅ ክንሰቍጚ እቀ ሽⶖ ድሰቍ ወይም ወይኒዙ ሚዚዝ ሱሰኝጥ ኣቓይጘጘ ክንሽ።

⁴እንዝ ኣይንትዝ፣ ፅጐን እቍንድዛት ጝታግልቊዝመ ጝታቝሪዝ ቀንጛንስ ማጥን ክንሰነው ቸልጥቍ።

⁵እደረት ቃልድ ኣውማውዝቅ ዛሽሻየጘ ጝታቕምት ቅመቍ፣ ንፁኻን፣ ጝን ኣቒል ሰቭዝ ፃምርሸቍ፣ ቀሰቍ፣ ጝታግልቊዝ ኣዚተቍ ኣጛንስ ማጥን ክንስጝነ።

⁶እኒዝጘም ውርጋጥ ግልቍድ ጝታቕምት ቅመቍ ኣጛንስ ማጥን ማኽር።

⁷ኣውማው ዊገዝይቅ ቀሰው ኣቐው ዊገ ፃቨነውዝ ክቕምት ተከ ፃቭር ኣልሽ፤ ክንስረው ክንድጚዝም እማድየንት፣ ቍምነገርድየንት፣

⁸ኒቕፍሻው ትኽኑ ዊግትንድየንት፣ ቓሊሽ፤ እንም ተቃዋሚድየን ይናማጥን ዊግሸው ጭቓ ዊገ ብ ኣይቭታንስ የጝ።

⁹በርድ ጝታኣደርጢዝ እጝቅ ዊገይዝቅ ቅምሽጛንስ፣ ዲስም ሽጛንስ፣ ጭቓ ቃልም ዊሳይጘጘ ክንሽ።

¹⁰ጝታኣደርጢዙ ጊንዝቭድ ስይጘጘ ማኽር፤ እኒንም እጝቅ ጒደነይዝቅ ይናቓዘተ ኣቐው እደረት ክንድጝድ ቀንሻንስ ማጥን ፍፅም ኣምንሽተቍ ኣጘጘ ሚዝርስጛንስ የጝ።

¹¹እቅድቅ ቓዘው እደረት ፃገድ ጋልፅሽትኩ።

¹²እኒን ፃገድም ኽጥያትዝ ፅበነዊዝመ ኣልሚዙ ምርቕፀይዝ ኻድይን፣ ነንቱ ዚምኒዝ ይናቕምት ቅምን ፅድቅዝመ እማንተው መንፈሳዊ ርዅየዝ ፅብነ ማጥን ክንሰኵ።

¹³እንዝ ኣይንትዝ በርክሸው ይናቲስፈም ኣቐው ኽየው ይናኣምላክ፣ ይናቓዘተም ኣቐው እየሱስ ክርስቶስት ክቭሪዙ ጋልፅሽተነድየንት ኣርውድነኵን።

¹⁴ጘጝም ይናት ኣመፂስቅ ቓዝጠ፣ ቀሰው ሰቭ ሰራሸነውዝ ቲጊነቅ፣ ጝጭስም ቲትነቅ ንፅዅ ኽዝቭ ኣናንስ ማጥን ይናት ዊር ሽጠ ይናቺ ጝቕምት ዲቍስ ይዉው።

¹⁵ነስየ እንዛይ ዊቅድዛት ክንሽ፤ ምሉ ስልጣንዝም ማኽር፤ ጋስፅም፤ ኣውማውቅ ክት ነቂነ።