Read xamtanga ቲተውስ 3 Bible Online

ቲተውስ 3 - xamtanga bible

ቲተውስ 3

¹ምመናንድዛት፦ ቅመቲዝመ ስልጣንጒጢዝ ቅምሽጛንስ፣ ኣዚትጛንስ፣ ቀሰው ኣቐውድየንትቅ ፃቨነውዝም ኣስልሽጛንስ፣ ኻስቭዝ።

²እኒዝጘም ኣውማውትልቅ ጭቕት ዊግታቍ፣ ዲግተ ቀነቍ፣ እጅርዝቅ እማንተው ትኽትነ ቓሊሰቍ ኣቕጝነ።

³እንዝ ሚቅ ይን ይናቕምም ኣስክሳይነቅ፣ ኣዚታይነቅ፣ ኻጝሽትነቅ፣ ቲተቲው ምርቐዝመ ሚችጘዝ በር ኣቕን ቅምሽነቅ፣ ዊኑን፤ ቈሽም ጐርትናⶖ፣ ይናስ ይናይም ሽከሽክሽና፣ ጭቕትዝመ ምቀኝደነውዝ ፅብነቅ ዊኑን።

⁴ዊገድ ግን ይናት ቓዘው እደረት ደግነቲዝመ ፍቅሪዝ ጋልፅሽታንድ፣

⁵ይን ሰራሽነው ፅድቅዙ ሰቭዝ ኣዪጝቀ ጝቕም ጝስቝርቲዝ ቓዙ፤ ቓዘውድም ሊጘት እዅርሸነው ኣቐው እቓርንዝመ መንፈስ ቅዱስት ኣመካይነትዝ ችጝሸው ታድስሽትንዝ የጝ።

⁶እኒን መንፈስድየንትም እደረ ይናት ቓዘው እየሱስ ክርስቶስት ኣመካይነትዝ ይናጭስ ቐናዝ ቅብሱ።

⁷እኒንትም ፃቨውድ፦ ጝቕምቱ ፃገይዝ ፃድቅን ቲስፈ ፃቭን ሊሚድነው ዘላልምዙ ርዅየድየንት ዊርስናንስ ማጥን የጝ።

⁸እኒንም ኣምንሸው ቃል የጝ፤ እደረት ኣምነቍድ ቀሰው ሰቭ ሰራሸነውዝ ጝታቕምት ዲቍስጝ ይውጛንስ ማጥን እንዛይ ዊቅድዛት ደደደድስር ዊግተ በነኵን፤ እኒን ዊገድም ቀሰው፣ እቅዝቅም ጣቅመው የጝ።

⁹ዊገድ ግን ጊነቱ ኣቐው ታኽነይስ፣ ዅለዙ እግዝኒስ፣ ጭቅጭቂስ፣ ኽግዝቊዝ ጕይሽተው ጐሪስም፣ እክልጭ፤ ምላሰንድም እንዛይ እርቫነ እጀቍ ጊነትቍ ጛይ።

¹⁰ቲተቲትን ነሰው እጅርድየንት ሊን ማኽር፤ ሊጘትረይዝ ጣጝቅቅሽ፤ ጝጊስ ዲቈዝየ ግን ጝጅቅ ውረውረዝቅ ተቫቭርሽተ።

¹¹እነየው እጅርድ ጠማም፣ ኽጥያትኘም የጝ፤ ጝቕምትልም ፊርዳⶖ ኣቕጘ ኣርቕ።

¹²ኣርጢመንት ዊንም ትጪቈስት ክጐ እፃቓንድ ያን ፅበው ኒቈብልዩን ትጐ ቃዝየዝ ተርተ ቲጊ። ምላሰንድም ጫረድ ጝግል ዲቍስጨ ዊስንኩን።

¹³ኽግ ኣርቐተ ዚማስስመ ኣብሉስስ ጝታጒደነይዝ ኣቐውድየንትቅ ከቭራንስ ክቸልደውድቅ ፃቭ፤ ጛይ በንጘውድየንትም እቻዝ።

¹⁴ይናዊግንድዛይ ቈሽ እልትዝ በንዘውድየንት ችጛንስ፣ ጝታፅብጘድም ፍር እጀው ኣቓየጘ፣ ቀሰው ሰቭዝ ቲግየነው ክንጥጘ ጥውሸኵ።

¹⁵ይጅቅ ፅበቍ እቅድ እጝቅ ክታጭስ ዲግተ ኣልስጘኵ፤ ክትንም እምንትዝ ይናጅቅ ላው ኣቐቍ እቂዝ ዲግተ ኣልስጥን። ፃገ ክታጅቅ ኣነ።