Read xamtanga እቭራውያኒዝ 10 Bible Online

እቭራውያኒዝ 10 - xamtanga bible

እቭራውያኒዝ 10

¹ወሪትት ኽግድ እግረ ተረቍ ቀሰቍ ዊቂዝ መጅወ የጝጚ፣ እማንተው ኣካልድም ኣየው፤ እንዝ ማጥን ኣምረ ኣምረዝ ዊትርቅ ቀቪጝቀ ደግምግምሻ ኣልተው ምስዋይትድየን ኣምልክጥጘ ኣልተቍ እቅድዛት ፍፅማን ፃቭጠ ስሪስቅ ቸላውም።

²ወሪትት ኽግድ ፍፅማን ፃቭጠ ቸል ዊናንሰ ምስዋይት ኣልሰነውድ በርጥጘ ዊን ቃየው! ቈሽም ኣምልክጥጘ ኣልተቍ እቅድ ጝታኽጥያቲስ ሊንስ ኻትጝ ዊር የቍ ኣጛንስቅ ጝታኽሊነይዝ ዊቅሽታቍም ዊን።

³ዊገድ ግን እንዛይ ምስዋይታንድ ኣምረ ኣምረዝ ኽጥያት ኣጅሰቍ ጛይ።

⁴ምላሰንድም ቻምጥዝመ ፍጭርዝዙ ብር ኽጥያት እክልስጠ ቸላውም።

⁵እንዝ ማጥን ክርስቶስ እን ኣልሚል ተራንድ፦ «ምስዋይትዝመ ሚቨዝ በኒረርም። ዊገድ ግን ይጭስ ሰውነት ኣስልዱ፤

⁶ቃጥልሸው ምስዋይቲዝመ ኽጥያትዝ ኣልተው ምስዋይቲዝ ዲስ ዪረርም።

⁷ኣይንድ ያን ‹ይማጥን መፃፍዝ ፃፍሸጘ፣ ኣምላክወ! እንወ ክፍቃድድ ፋፅምጨ ተጥኩን› ዩን» ዩ።

⁸ወሪትት ኽግድ እንዛትቅ ኣዛንም እኳ ጘጝ ግን በዊል፦ «ምስዋይትዝመ ሚቨዝ፣ ቃጥልሸው ምስዋይትዝመ ኽጥያትዝ ማጥን ኣልተው ምስዋይትዝ በኒረርም፤ ጝዝም ዲስ ዪይረርም» ዩ።

⁹እግረ ቈሽ፦ «ይኣምላክወ! እንወ ክፍቃድድ ፋፅምጨ ተጥኩን» ዩ፤ እገረድየንት ቲኪጠ በውረድየንት ሸሩ።

¹⁰እኒን ፍቃዲዝም እየሱስ ክርስቶስ ጝሰውነትድየንት ምስዋይት ፃቭ ኣልሳንስቅ ሊንስ ኻትን ቀድስሽትንኵኑን።

¹¹ኣውማው ካኽንድቅ ዊትርቅ ኣግልግላ ኽጥያት እክልስጥጘ ፍፅም ቸላቍ እዛይ ምስዋይታንድዛት ኣልሳ ግሪ ጨቨቅ ችብርኩ።

¹²ክርስቶስ ግን ዘላልምዝ ኣቐው ላው ምስዋይትድ ኣልሰት ግረ እደረት ለዊል ጐይኩ።

¹³ኣይንቲስ ኪርም ጝፃለታንድ ጝልኲዝ ደደነ ኣጥጚስቅ ኣርውደኵ።

¹⁴ምላሰንድም ላው ምስዋይቲዝ እዛይ ቀድስሽተቍድዛት ዘላልምዝ ፍፅማን ፃቭኩ።

¹⁵መንፈስ ቅዱስም እን ዊገይዝ ማጥን ሚዝርደኵ፤ በዊል፦

¹⁶«ጛይ ግርቂዝ ግረ ያን ጛጅቅ ጥወው ቃል ኪዳንድ እኒን የጝ፦ ይኽግድየንት ጝታእዘኒል እቝርጭር፤ ጝታኣይምረውዊልም ፃፍጭር» የኵ።

¹⁷እግረ ቈሽ፦ «ነስየ ጝታኽጥያቲዝመ ጝታኣመፂዝ ኻስቨቅም» የኵ።

¹⁸እንዝ ማጥን እንዛይ ኽጥያቲስ ይቅር ይሽትጘት ግረ ኽጥያትዝ ማጥን ኣልተው ምስዋይት ነስየ ዊናውም።

¹⁹ዚንወ! ነስየ ቅድስተ ቅዱሳኒል ጥውናንስ እየሱስት ብሪዝ ኣምካይነትዝ ድፍርት ችጝንኵኑን።

²⁰ጥውነውድም ገርደነይዝ የነተም ጝስየይዝ ቢተው ኣይር፣ ርዅየልም ችጝዘው ጒደነይዝ ፃቭን የጝ።

²¹እደረት ጝኒል ይምሸው ኽየው ካኽነጣነ ኻልቀ ፃይነቅ ኣናንስቅ፣

²²ጭቓ ኽሊነዙ ወቀሰይስ ዊር ይናንስ ማጥን ይናእዘንድየንት ትኒትን፣ ይናሰውነትድም ንፅዅ ኣቝዝ እቓርን፣ ጭቅ የው እዘንዝመ ምሉ እምንትዝ እደረ ትጐ ኣልትነ።

²³ቲስፈዙ ቃል ነየውድ ኣምንሸው ኣቓንስቅ፣ ኣምንን ሚዝርድነው ቲስፈድየንት ኪው ሽን ፃይነ።

²⁴ይናስ ይናይ ፍቅርዝመ ቀሰው ሰቭዝ ኣወይን ነቃናንስ ማጥን ኻስቭነ።

²⁵ዊትርቅ ዲምቅሽና ይናስ ይናይ ማኽርኽርሽነ፤ ላው ላው እቅ ኣኽቭሸነውድ በርጝኵ ይን ግን ጝታጘ በርነ ጥውሻውም፤ ኽሽስ ግርየድ ችጛ ተረጘ ቓልድርና እኒንት ቐናዝርን ፃቭጥን።

²⁶እማንተው ኣርቕትድየንት ለምርነት ግረ፣ ቺዝጠ ይን ኽጥያትዝ ፅብናን እንዝ ግረ ኽጥያትዝ ኣቐው ላየ ምስዋይት ዊናውም።

²⁷እንዝ ሽ ነስየይስ እዳቐውድ ጐውሰው ፍርድዝመ እደረት ፃለታንድዛት ዀው ልየዝ ኣርውደነው ጭቝ የጝ።

²⁸ኣውማው ሙሴት ኽግድየንት ነቀው እጅርድቅ ሊጘ ዊንም ሻቘ እቅ ሚዝርድጘውዝየ ርኽርኽነ እጀው ቍውሽታ ዊኑ።

²⁹እደስለ እደረት ዅርት ነቀው፣ ጝዝ ቀድስሽተው ኪዳኒዙ ብርድየንትም ኣርክሰው፣ ፃገ ይወው መንፈስድየንትም ዛሸውድየን፣ ኣወየው ወሰው ፍርድ ችጛው?

³⁰«በቀል ይው የጝ፤ ያን ጝልቭነድ ዊስጭር» የው ዊገድየንት ኣርቕነኵን፤ ቈሽም፦ «ኣደረ ጝኽዝቪል ፊርድጡ» የኵ።

³¹ዘላልም ፅበው እደረት ናኒል ሊቨነው ጭቕጘ ጐውሰው የጝ።

³²ክታጭስ ብርኻንድ ኣቭርኸት ግረ ሚከረዝ፣ ኻይሉ ትግልዝ፣ ፀናቕርን ችብትርነው በውገቱ ዚምንድ ኻስቭጥን።

³³ሊን ሊንድ ኣደቫቫይዝ ዛሽሽርንኵርኑ፤ ገልታሽርንኵርኑ፤ ሊን ሊንድ ቈሽ እነየው ሚከረ ለምረቍጅቅ ተቫቭርሽርንኵርኑ።

³⁴ክትን ክታቕም ቺዘው፣ ዘላልምም ፅበው ኻቭት ፃይርነቅ ኣቕርነጘ ኣርቕርነቅ ኣቕርናንስቅ እፁሸቊዝ ኣርኽርኽርኑ፤ ክታንቭርትድ ዚርፍሻንድም ዲስተዝ ለምትርኑ።

³⁵እንዝ ማጥን ኽየው ወየ ነይሰው ክታኣምንሽተነውድየንት ማልትርነ።

³⁶እደረት ፍቃድድ ፋፅምርን ቲስፈይዙ ቃልድየንት ለምትርናንስ ማጥን ፀናቕርን ችብርትነ በንዘኵ።

³⁷ምላሰንድም ዊቱ ግርየዝ ግረ፦ «እድየን ተረውድየን ተርጡ፤ ደያውም።

³⁸ይፃድቅድ ግን እምንትዝ ፅብጡ፤ እግርገ ኣፍግፍግሽ ግን ያን ጝዝ ዲስ የቅም» ይሽት ፃፍሽኩ።

³⁹ይን ግን ኣምንጝ ቓደቊዝ ዊግን የጝጚ፣ እግርገ ኣፍግፍግጝ ድዘቊስም ኣይነቅ።