Read xamtanga እቭራውያኒዝ 11 Bible Online

እቭራውያኒዝ 11 - xamtanga bible

እቭራውያኒዝ 11

¹እምንት ቲስፈ ፃቭነው ዊገድ ኣቐው ኣቐጘ ደደደድሰው፣ እልዝ ቓሊነው ዊገድየንትም እማን ኣቐጘ ኣስርድዘው የጝ።

²ኽፅምትቍ ኣቅልድም ሚዝርሽትጘውድ እንዝ የጝ።

³ኣልማንድ እደረት ቃልዝ ፋጥርሽጘጘ እምንትዝ ተረድሽነኵን፤ እንዝ ማጥን እትለውድየን ችጝሸውድ እትላዊስ ኣቐጘ ኣስክስነኵን።

⁴ኣቭየል እምንትዝ ቃየልቲስ ዲቈው ምስዋይት እደረስ ኣልሱ፤ እደረ ኣቭየልት ይውትድየንት ዲስተዝ ለምራንድ፣ ኣቭየል እምንትዝ ፃድቅ ኣቐጘ ጝጭስ ሚዝርሹ፤ ጘጝ ክርሽም እኳ ጝእምንቲዝ ኣመካይነትዝ ነኳን ኣሽ ዊግተኵ።

⁵ኺነውክ ክርጘ ቓላየጘ እምንትዝ እን ኣልሚስ ፊስሽቱ፤ እደረም ፊሳንስቅ ችጝሺየውም፤ ጘጝ ፊስሽቲጝቀ በውገ እደረት ዲስ ሸጘ ጝጭስ ሚዝርሽትኩ።

⁶እምንት እጀው ቈሽ እደረት ዲስ ሽጥነ ቸልሻውም፤ ምላሰንድም እደረ ትጐ ኣልተውድቅ እደረ ፅበጘ፣ ጝት ቐናዝጝ ደምዘቊዝም ወየ ይወው ኣቐጘ ኣምንጠ ጥውሸኵ።

⁷ነዅ ገነ ቓልሽታው ዊገይዝቍዝ እደረ ጝት ጣጝቅቅሳንድ ጝት ጐውት ጝበተሰቭድ ቓዝጠ እምንትዝ ሚርክቭ ተሱ፤ ጝእምንቲዝም ኣልምድየን ኽጥያትኘ ኣቐነውድ ጋልፁ፤ እምንትዝ ችጝሸው ፅድቅድየንትም ዊርሱ።

⁸ኣቭርኻም እርስት ፃቭ ዊርሰው ኻግሪል ፊርጠ ጭጝሻንድ እምንትዝ ኣዚቱ፤ ኣውገ ፊርጠጘ ኣርቒጝቀም ቀሰው የው ፉ።

⁹ቀብራ ኻግርል ፅበው ስድተኘይዝጘ ኣቕ ቲስፈዙ ቃልዝ ይውሽተው ዝቨይል እምንትዝ ጐዩ፤ ቲስፈዙ ቃልድየንት ጝጅቅ ዊርሰቍ ይሳቅስመ ያይቈቭስታጘ ድጝኳንል ፅቡ።

¹⁰እኒንት ፃቨውድም ሚስርት ፃይረይ፣ እደረ ኣቅድ ሰራሸይ ኻትመት ኣርውዳ ዊናንስቅ የጝ።

¹¹ኣቭርኻም ውርም እኳ ጝእድሚድ ትክቭ ሽሚር ኣቕሽም፣ ሳረም ማኽን ኣራንም፣ ቲስፈዙ ቃል ይወውድ ኣምንሸው ኣቐጘ እግዛንስቅ እምንትዝ ዅር ጕርየ ኣቑ።

¹²እንዝ ማጥን እኒን ክረው ተከው ላው እጅሪስ ሲመይት ፅግለወይዝጘ ንቕፀው፣ ዝቨይዙ ሽነይዝጘም እጊታው ዚረ ችጝሹ።

¹³እንዛይቅ ጝታእምንትድየንት ፃይጘጘ ክር፤ እደረ ጛጭስ ይውጠ ቲስፈዙ ቃል ጥወው ዊገድየንት ችጚየቍም፤ ዊገድ ግን እክሊስ ቓልጝ ሲለም ይ፤ እኒን ዝቨይል ፅብጛንድ ኣብን፣ ስድትጭጥም ኣጘጘ ተረድሽጝ ዊን።

¹⁴እንት የቍ እቅድ ጝታቕምስ ኣቐው ኻግር ኣርውደቍ ኣጘጘ ቓሊስጘኵ።

¹⁵ማልጝ ፍጘው ኻግርድየንት ኻስቭጝ ዊንጛንመ ዋጥርጝ ፊረነው ቸልጥጘ ዊን።

¹⁶ነን ግን ጝጊስ ዲቈው ሲመይቱ ኻግር በንጘኵ፤ እንዝ ማጥን እደረ ጛጭስ ኻትመ ኣስላንስቅ፦ «ጝታኣምላክ» ይሽት ጭጝሽጠ ኣይቭቲየውም።

¹⁷ኣቭርኻም ፊትንሻንድ እምንትዝ ይሳቅት ምስዋይት ፃቭ ኣልሱ፤ ቲስፈዙ ቃል ለምረው ኣቭርኻም ላው ጝዅርድየንት ሰዋጠ ኣስልሸው ኣቕ ዊኑ።

¹⁸እን ጝዅርድም እደረ፦ «ክዚረድ ይሳቅትጐ ትውዝ ጭጝሽጡ» የው ዊግት ዊነውድ የጝ።

¹⁹እደረ ክረቍድዛት ጒስጠጘ ተረድሽ ዊኑ፤ ልክ ጝርጘይስ ጐነናንትጘ ይሳቅት እንደ ገነ ችጙ።

²⁰ይሳቅ እግረ ተረው ዊገድየንት ኻስቨነውዝ ያይቈቭስመ የሳውስ እምንትዝ በርኩ።

²¹ያይቈቭ ክርጠ ጓንድ ዮሴፍት ቝርት ላውዝ ላው እምንትዝ በርኩ፤ ጝግብ ጫፊዝም ዲግፍሽ ሲግዱ።

²²ዮሴፍ ክርጠ ጓንድ እስራየላንድ ግቭፅስ ፍጥጘጘ እምንትዝ ዊግቱ፤ ጝጛፅጣኒዝቍዝም ጛት ኣዙ።

²³ሙሴ እዅርሸት ግረ ጝኣቅልድ ጘጝ ሚልከሸ ኣቐጘ ቓልጛንድ፣ እምንትዝ ሻቘ ርፍ ጭቭስ፤ ንጕሲዙ ኣዋጅድየንትም ጐውቲየቍም።

²⁴ሙሴ ሊግዘት ግረ ፈርወንት ኣውስመ ይሽትን ጭጝሸነውድ እምንትዝ እምቢ ዩ።

²⁵ኽጥያትዝ ችጝሸው እልቱ ዲስተይስ ሽ እደረት ኽዝቪጅቅ ሚከረ ለምረነውድ ማርፁ።

²⁶እግረ ለምረው ወየድየንት እክልስ ቓላ ዊናንስቅ ግቭፅቱ ኻፍቲስ ሽ ክርስቶስትቍዝ ተዋርድሸነውድ እጝቂስቅ ዲቈው ኻፍት ኣቐጘ ኻስቩ።

²⁷ንጕሲዙ ቍጠድየንት ጐውቲጝቀ ግቭፅት ሊቅ እምንትዝ ፉ፤ ቓሊሽታውድየንትም ቓለዊዝጘ ፃቭ እጝግዘነውዝ ጝኻሳቪዝ ፀናቑ።

²⁸ባራን ኣቐቍድዛት ቂስፈውድ እስራየላኒዝ ባራንድዛት ቍዋየጘ እምንትዝ ፈዝየዝመ ብር ትንዘነውዙ ሰረትዝ ፃቩ።

²⁹እስራየላንድ ይዘው ዝቨዝ ፃጘቊዝጘ ቀይባኽርት እምንትዝ ከር፤ ግቭፃንድ ግን ጝታጘ ከርጥጘ ሚኵርጛንድ ባኽሪል ስርሽ።

³⁰እስራየላንድ እያሪኰት ግምቢዙ ኻፅርድየንት ላጝጠ ግርቅ ጅልውጘት ግረ ጝታእምንቲዝ ግምብድየን ፋይሩ።

³¹ረኣቭ ገልምተየን ሰላያንድዛት ዲግተዝ ለምትራንስቅ ኣዚታቊጅቅ ክረነዊስ ቲርፍረውድ እምንትዝ የጝ።

³²ነስየ እንዝ ንየ ወረጘ ይጫ? ገዲወንትውድ፣ ባርቅትውድ፣ ሳምሰውንትውድ፣ ዩፍታኺትውድ፣ ዳዊትትውድ፣ ሳሙየልትውድ፣ እኒዝጘም ነቭያታኒዝውድቅ ቲርካይቀጘ ግርየ እጀርም።

³³ጛይ እምንትዝ ምጝግስታንድዛት ድል ፃቭ፤ ጭቅተ ፊርድ፤ እደረ ጛጭስ ይውጠ ቲስፈዙ ቃል ጥወው ዊገድየንት ችጝ፤ ኣብዝጢዙ ምቸድ ዲቭ።

³⁴ልየዙ ኻይልድየንት ስስ፤ ሰይፍዙ ስለቲስ ኣምልጥ፤ ጝታዝላይስ በርታቕ፤ ኣጭነዝ ኻይልቍ ኣቕ፤ ፃለታኒዝቍ ዊተድርድዛት ጅግዝ።

³⁵እቍንድ ጝታቝርድዛት ክርጘይስ ጕጝ ችጝ፤ ላጥድ ቈሽ ዲቈው ክርጘይስ ጐነድየንት ችጝጥጘ በንጝ ክርጥጚስቅ ዲድብሽጛ ጝሉ ጝሉ ስቃይ ለምር፤ እኒስም ኻርነይ ፈነው በኒየቍም።

³⁶ላው ላውድ ተዘቫቭትሸነ ኣቑ፤ ጊርፍሽ፤ ላው ላውድ ቈሽ ልኰ ብረትዝ እፁሽጝ ወኽኒ ጝንል ሊቭ።

³⁷ቕርጘዝ ድድብሽ፤ መጋዝዝ ሳንትቅሽ፤ ሰይፍዝ ሲቭሽጝ ክር፤ ጓስቝልጛ፣ ሲድሽጛ፣ ገልታሽጛ ቢገዝመ ፍጭረዝዙ በልባል ሲርጝ ጅልው።

³⁸ኣልምሸን ጛጭስ ጥውሽረይ ኣቕር ችጝሺረይም፤ በራኸ ጨቨቅ፣ ኣበ ጨቨቅ፣ ጋ ጨቨቅ፣ ቢ ጨቨቅ ከርተት ይ።

³⁹እንዛይቅ ክታምንቲዝ ሚዝርሽተቍ ኣጝሽም እኳ፣ እደረ ጛጭስ ይውጠ ቲስፈዙ ቃል ጥወው ዊገድየንት ገነ ለምሪየቍም።

⁴⁰እደረ ይናጭስ ዲቈው ዊገ ኣስላንስቅ ይናት እጀው ፍፅማን ኣጥጘ ቸልየቍም።