Read xamtanga እቭራውያኒዝ 12 Bible Online

እቭራውያኒዝ 12 - xamtanga bible

እቭራውያኒዝ 12

¹ነስየ እንዛት ተከቍ ንቕፀቍ ሚዝረጫን ድምነይዝጘ ይናጅልወይል ኪብጝ ፅብጘውዝየ፣ ይናጭስ መውር ኣቐውድየንትቅ፣ ይናግል ጣብቅሸው ኽጥያትድየንትም እክልስን ይናበዊል ፅበው ውጠድየንት ፅናትዝ ውጢነ።

²ይናእምንቲዝ ኪርመተ፣ ፍፅምም ፃቨተ ኣቐው እየሱስት ቓልነ፤ ጘጝ ጝበዊል ፅበው ዲስተይዝ ማጥን የው ሚስቅሊዙ ሚከረድየንት ታግስሽቱ ሚስቅልዙ ውርደትድየንትም ነቀነውዝ፣ እደረት ዝፋኒዙ ለዊል ጐዩ።

³ነስየ ዝልፍልፍ ይርን ቲስፈ ቀቫይርነጘ ኽጥያትኝጥድ ችጝዝጘው እነየው ሚከረድየንት ታግስሽተው እየሱስት ኻስቭጥን።

⁴ገነ ኽጥያት ጅቅ ጋጥመነውዝ ክታብርድ ቅብርጥጚስቅ ተቃውምሺርነቅም።

⁵እደረ ክትን ቝር ኣቕርናንስቅ፦ «ይዅርወ! ኣደረት ቕፃርድየንት ቀልዝተ፤ ጘጝ ጋስፃንድም ቲስፈ ቀቭተ፤ ምላሰንድም ኣደረ ቀነውድየንት ጋስፀኵ፤ ጝዅር ፃቭ ለምረውድየንትም ቐፃቐኵ» የው ዊግተው ምኽርድየንት ሚትርንኵርኑ።

⁷እደረ ክታት ጝቝር ፃቭ ፃያንስቅ ቕፃርድየንት ታግስሽተጥን፤ ውረ ጚርድ ቐፃቓው ዅርመ እኩ?

⁸ዅልድቅ ቐፃሽጘው ቕፃርድየንት ክትንም ለምሪርነውዝየ ድቃል የጝጚ ዅልም ኣይርነቅ።

⁹እንዝ ንየም ይን እጝቅቅ ቐፃቐቍ ስየዝቍ ኣቅል ፃይነቅ ዊኑን፤ ጛትም ኪብርዝና ዊኑን፤ እደስለ ይናጭስ መንፈሳዊ ኣይር ኣቐው እደረስ ኣወይን ቐናዝን ኣዚተነው ፅብጘዝ ፅብነ ጥውሻው?

¹⁰ይናኣቅልድ ጛጭስ ቀሰው ተክ እትለጘ፣ ዊቱ ግርየዝ ይናት ቐፃጛ ዊን፤ እደረ ግን ይን ጝቅድስነይስ ኣድልሽናንስ ማጥን ይናኣርወዝ የው ቐፃቐኵ።

¹¹ቕፃርቅ ኣፍለይስ ኻዝንሰውጚ ዲስ ሸው ተካውም፤ እግረ ግን ክንደቍ እቂዝ ፅድቅዝመ ዲግተዝዙ ፍረ ችጝሰኵ።

¹²እንዝ ማጥን ዝልፍልፍ የው ክታናኒዝመ ዝላቐው ክታግርቪዝ በርታዝጥን።

¹³ኻካዝድ ቓድጠ ማጥንጚ ወሰገቨ ኻካዛየጘ ክታልኲዝ ጭቅ የው ጒደነ ኣስልጥን።

¹⁴እጝቅ እጅር ጅቅቅ ዲግተዝ ፅብትርነ ልቕርጥን፤ ቀድስሽትትርነም ልቕርጥን፤ ቅድስነ እጀው ኣውማውቅ እደረት ቓልጠ ቸላውም።

¹⁵ክታጊስ ኣውማውድቅ እደረት ፃገድ ጒድላየጘ፣ ቈሽም ማረው ስር ቢቊል ችግር ቲክንዛየጘ ንቕፀቍድም ቢክላየጘ ጣጝቅቅጭጥን።

¹⁶ኣውማውድቅ ሊንቱ ዅረዝ የው ጝባርነይድ ቅየው የሳውትጘ ሰሰኘ ኣቐው፣ ዊንም እደረት ኪብርዛው ኣቕ ችጝሻየጘ ጣጝቅቅጭጥን።

¹⁷የሳው እግረ እኒን በረከትድየንት ዊርስጠ በናንድ ኪልክልሸጘ ኣርቕርነኵ፤ ሊዛ ጝት ቲጊ ደምዛን እኳ ዊስን ችጘነው እድል ችጚየውም።

¹⁸ናንዝ ዳቕሸው፣ ልየዝም ቃጥልሸው ሲነ ኣበይልም ችጚርነቅ፤ ጥመይል፣ ጭገጊል፣ ኣውለንፋሲልም ችጚርነቅ።

¹⁹መለከትዙ ድመል፣ ዊንም ቃል ወይሽተው ድመልም ኣልቲርነቅ፤ ጘጝ ቃልድየንት ወሸቍድም ጛጭስ ላየ ቃል ቈሺት ድቍሽታየጘ ጨው።

²⁰ምላሰንድም፦ «እንሰሰ እኳ ኣበድየንት ዳቕሽ፣ ቕርጘዝ ድድብሽ ክርነ» የው ትዛዝድየንት መውርጥጘ ቸሊየቍም።

²¹ጝጭስ እትለው ዊገድ ጭቕጘ ጐውሰው ዊናንስቅ ሙሴ እኳ፦ «ጭቕጘ ጐውጡን፤ ቋጥቍጥጩንም» ዩ።

²²ክትን ግን ፂወን ኣበይል ኣልትርንኵርኑ፤ ጚይም ዘላልም ፅበው እደረት ኻትመ ኣረይ ሲመይትወ እየሩሳልየም ጚ፤ ዲስተዝ ኣኽቭሸቍ ንቕፀው ኣይላፋን መላካኒል ኣልትርንኵርኑ።

²³ጝታሽድ ሲመይል ፃፍሸቍ ባራኒዝ ማኽቨሪል፣ እጝቅቱ ደጘ ኣቐው እደረትል፣ ፍፅማን ኣቐቍ ፃድቃኒዝ ኒፍሳኒል፣ ኣልትንርኵርኑ።

²⁴ኣይር ኪዳኒዝ ማኽልኘ ኣቐው እየሱስትል፣ እኒዝጘም ኣቭየልት ብረስ ቺዘው ቃል ዊግተው ትኒተው ጝብረይልም፣ ኣልትርንኵርኑ።

²⁵እኒን ዊግተውድየንት እምቢ ያይርነጘ ጣጝቅቅጭጥን፤ እዛይ ዝቨይል ኣቕ ጛት ጣጝቅቅሳ ዊነውድየንት እምቢ ይጛንድ ኣምልጢጘውዝየ፣ ይንስ ሲመይስ ተረውድየን ጣጝቅቅሳንድ ጝጊስ እክልድነውዝየ ኣወይን ኣምልጥና?

²⁶ኣይንድ ጝድመድ ዝቨድየንት ናውጥውጥዙ፤ ነን ግን፦ «ዝቨድ ጭቝ ኣዪጝቀ ሲመይትም ሊን ደግም ናውጥውጥዝጭር» የው ቃል ጥውኩ።

²⁷«ሊን ደግም» የው ቃልድ ናውፅሽታቍድ ፀናቕጝ ፅብጛንስ ማጥን ናውፅሽተቍድ የነትም ፋጥርሸቍድዛይ ድዘቍ ኣጘጘ ቓሊሰኵ።

²⁸እንዝ ማጥን ናውፅሽታው ምጝግስት ለምርነቅ ኣናንስቅ እደረት ሚዝየንዝነ፤ ቈሽም ጝት ዲስ ሸው ጒደነዝ ኪብርዝና ጐውትናም ኣምልክነ።

²⁹ምላሰንድም ይናኣምላክ እደረ ድሰው ልየ የጝ።