Read xamtanga እቭራውያኒዝ 13 Bible Online

እቭራውያኒዝ 13 - xamtanga bible

እቭራውያኒዝ 13

¹ክታስ ክታይ ዚኒዝጘ ቀነቀንሽትጥን፤

²ኣብን ለምረነውድም ሚርትርነ፤ ላው ላው እቅ እኒንት ፃቭጛንድ ኣርቒጝቀ መላካንድዛት ለምርጝኵ።

³እፁሸቊዝ ክትንም ጛጅቅ እፅሽርነቅ ኣቕርን ጛጭስ ኻስቭጥን፤ ሚከረ ለምረቊዝም ክትንም ጛጅቅ ሚከረ ለምትርነቅ ኣቕርን ጛጭስ ኻስቭጥን።

⁴ገባሸነውድ እጝቅ ዊገይዝቅ ኪብረው ኣነ፤ ጝኽርየነድም ንፅዅ ኣነ፤ ምላሰንድም እደረ ሸርሙጣኒዝመ ሰሰኝጢዝ ፊርድ ቐፃጡ።

⁵ጊንዝቭ ቀነነዊስ እክልትጥን፤ ክታፃይርነዊዝ ዲስ ይርን ፅብጥን፤ ምላሰንድም እደረ፦ «ስሪስቅ ክት ሊቀቅም፤ ፍፅምም ማለቅም» የውኩ።

⁶እንዝ ማጥን ይናእዘንድ እቻዝን፦ «ኣደረ ይት ከቨኵ! ጐውጠቅም! እጅር ይት ውርም ፃቭጠ ቸላው» ይነኵን።

⁷ኣደረት ቃልድየንት ክታጭስ ድቈቍ ክታት ቃወቍድዛት ኻስቭጥን፤ ጝታፅብጘይዝመ ጝታሰቪዙ ፍረይዝ ቓልጥን፤ ጝታእምንትድየንትም ቲክንጥን።

⁸እየሱስ ክርስቶስ ታትነም፣ ንጭም፣ ዘላልም ኣልምም፣ ጘጝት የጝ።

⁹ቲተቲተው ኣይንት ኣቐው ኣቭን ክንድጝዝ ፊስሽትትርነ፤ ይናእዘንድ ፀናቐውድ ፃገዝ የጝጚ ዀነቍዝቍ ሰረታንድዛት ሊሚደነውዝም ኣየው፤ እኒን ስረትድየንት ሊሚደቍድ እኳ ጝዝ ጣቅምሺየቍም።

¹⁰ይን ድጝኳኒል ኣግልግለቍድ ጝጊስ ዅጥጘ መቭት ችጚጘው መሰውየ ፃይነቅ የጝ።

¹¹ካኽነጣነ ኻልቀድ ኽጥያትዙ ይቅርተዝ ኣቐቍ እንሰሲዝቍ ብር ፃይ ቅድስተ ቅዱሳኒል ጥወኵ፤ እንሰሲዙ ስየድ ግን ኻፅሪስ ቢዚይል ፊስሽት ልየዝ ቃጥልሸኵ።

¹²እኒዝጘም ክርስቶስ ኽዝቭድ በገዘ ጝብሪዝ ቀድስጠ ኻትም ሚረይዙ ቢዘይል ሚከረ ልምሩ።

¹³እንዝ ማጥን ይንም ጘጝ መውረው ውርድየትድየንት መውርን ኻፅሪስ ቢዘ ጝጐ ፍነ።

¹⁴ምላሰንድም ገነ ተትረይ ኻትመየንት ኣርውድነኵንጚ እንል ፅበው ኻትመም እጅነቅ።

¹⁵እንዝ ማጥን ዊትርቅ ሚዝየነዙ ምስዋይት፣ የነትም ጝሽⶔዝ ሚዝርደቍ ኪፍርጣንዙ ፍር እየሱስ ክርስቶስት ኣመካይነትዝ እደረስ ኣልስነ።

¹⁶ቈሽም ቀሰው ፃቨነውዝመ ክታፃይርነዊስም እጀቊዝ ኣድለነውዝ ሚርትርነ፤ ምላሰንድም እነየው ምስዋይትድ የጝ እደረት ዲስ ሸውድ።

¹⁷ክታቃወጢዝ ኣዚትጥን፤ ቅምጭጥንም፤ ምላሰንድም ጛይ ጭቕጘ ዋቕርሰው ገቨ ፃየቍ ኣጛንስቅ ክታኒፍሲዝ ማጥን ቲጊጘኵ፤ እንዝ ማጥን ኻዝንጛ ኣዪጝቀ ዲስተዝ ጝታሰቭድየንት ሰራሽጛንስ ማጥን ጛጭስ ኣዚትጥን፤ ኣለዝየ ክታጭስ ጣቅማውም።

¹⁸ይናጭስም ፃልይጥን፤ እጝቅ ዊገይዝቅ ቀሰው ፅብጘዝ ፅበነው በነው ንፅዅ ኽሊነ ፃይነቅ ኣነጘ እርግጥኝጥ የጝ።

¹⁹ኽሽም ክታጐ ቃዝየዝ ዋጥር ተጨር ክታኻደረ ፃልይጥን የር ጨወኵን።

²⁰ዘላልምዙ ቃል ኪዳኒዝ ብርዝ፣ ቢቅዝ ኽየው ምቓ ኣቐው ይናኣደረ እየሱስት ክርጘይስ ጒሰው ዲግተዝ ኣምላክ፣

²¹ጝፍቃድድ ፋፅምርናንስ ማጥን ክታት ቀሰው ዊገይዝቅ ከምስነ፤ ጝት ዲስ ሸውድየንትም እየሱስ ክርስቶስት ኣመካይነትዝ ይናግዝ ፃቭነ፤ ጝጭስ ዘላልም ኣልም ኣሽ ክቭር ኣነ፤ ኣሚን።

²²ዚንወ! እኒን ክታጭስ ፃፈው እፃድ እጅጝ ኣቓንትጘ ይምኽር ቃልድየንት ኣቕልዝ ለምርትርናንስ ክታኻደረ የኵን።

²³ይናዝን ጢመቲወስ እኪተጘ ኣርቕትርነ በነኵን፤ በውዝ እንጐ ተርሽ ያንም ክታት ቓልጨ ጝጅቅ ተጭር።

²⁴ክታቃወጢዝመ ቅዱሳኒዝ እጝቅዝቅ ዲግተ ኣልስጥን፤ ጣልየንትቍድ ክታጭስ ዲግተ ኣልስጘኵ።

²⁵ፃገ ክታጅቅ ኣነ።