Read xamtanga እቭራውያኒዝ 2 Bible Online

እቭራውያኒዝ 2 - xamtanga bible

እቭራውያኒዝ 2

¹እንዝ ማጥን ወሽነው ዊገይስ ቀርን ሊቫይነጘ እን ወሽነው ዊገድየንት ቐናዝን ጣጝቅቅሽነ ጥውሸኵ።

²ምላሰንድም መላካኒዝ ኣመካይነትዝ ድቍሽተው ቃልድየን ፀናቐው ኣቐውዝየ፣ ኣውማው ጝት ሸረው፣ ኣዚጠቅም የው እጅርድም ጥውሸው ቕፃር ለምረው ኣቐውዝየ፣

³ይንስ እነየው ኽየው ቓድትድየንት ቸለል ይነውዝየ ኣወይን ኣምልጥንቅ? እኒን ቓድትድየንት በውገ ድቈውድ ኣደረ ጝቕም የጝ፤ ጝጊስ ወሸቍድም ይናጭስ ደደደድስ።

⁴እደረም ቈሽ ምልክታንዝ፣ ዲንቅሰቍ ዊቅዝመ ጝሉ ጝሉ ታምር ፃቨነውዝ፣ እኒዝጘም ጝፍቃዲዝጘ ኣድልድልሸው መንፈስ ቅዱስት ይውቲዝ ኣመካይነትዝ እን ዊገይዝቍዝ ሚዝርድኩ።

⁵እደረ እኒን ነን ዊግትነው ተረው ኣልምድየንት መላካኒዝ ቅምሲየውም።

⁶ዊገድ ግን ላውድ ላየ ስፍረይስ፦ «ጝት ኻስቭተ እጅር ወረጘ የጝ? ጝጭስ ጣጝቅቅሽተስ እጅር ዅር ወረጘ የጝ?

⁷መላካኒስ ዊቱዝ[1] እጥንዝሩ፤ ክቭርዝመ ሚዝየነዙ ዘውድዝ ጝኣውሪል ደፋሩ።

⁸እጝቅትቅም ጝልኰ ሳይል ቅምስሩ» የው ሚዝርድኩ፤ እደረ እጝቅትቅ ጝልኰ ሳይል ፃቭ ቅምሳንድ ጝጭስ ቅምሺየው ውረውረም እጀው፤ ኣነጚ ነንቱ ዚምኒዝ ቓልናንድ እጝቅቅ ጝጭስ ቅምሸጘ ቓልነለም።

⁹ዊገድ ግን መላካኒስ ዊቱዝ እጥንድ ዊነው እየሱስት ክርጘዙ ሚከረ ለምራንስቅ ነን ክቭርዝመ ሚዝየነዙ ዘውድዝ ጝኣውሪል ደፋሽ ቓልነኵን፤ ጘጝ እደረት ፃገዝ እጝቅ እቂዝቅ ማጥን ክርጘ ጣምኩ።

¹⁰እጝቅ ዊገድቅ ጝዝ፣ ጝጭስ፣ ፋጥርሸው ዘላልም ፅበው እደረ፣ ንቕፀቍ ዅል ክቭርል ነሳንስ ማጥን ጝታቓደነይዙ ሚስረተድየንት ሚከረዝ ፍፅም ፃቭጠ ጥውሸው ዊገ ኣቑ።

¹¹እቅድ ቀድሰዊዝመ ቀድስሽተቍ እቂዝ ላው በተሰቪስ ችጝሸቍ ጛይ፤ ኣቓንስቅም እየሱስ ጛት ይፅን የው ጭጝጠ ኣይቭታውም።

¹²እንዝ ማጥንም ጘጝ፦ «ክሽድ ይፅንስ ድቍጭር፤ ኣኸቨ ማኽሊልም ክት ዚመዝ ሚዝየንዝጭር»

¹³ቈሽም፦ «ያን ጝዝ ተማምንጨኵን» የኵ፤ እኒዝጘም፦ «እንወ ይስመ እደረ ይጭስ ነየቍ ዅልዝ» የኵ።

¹⁴ዅልድ ስየዝመ ብርዝ ፃየቍ እቅ ኣጛንስቅ እየሱስም ጝታጘ ስየዝመ ብርዝ ፃየው እጅር ኣቑ፤ እንም ክርጘይል ስልጣን ፃየው ዳቪለውስት ጝክርጘይዝ ዲምስሳንስ የጝ።

¹⁵እኒዝጘም ክርጘ ጐውተነውዝ ጝታእድሚድቅ ምሉዝ በርነይዝ እፁሽጝ ዊነቍድዛት ኻርነይ ፊስጠ የጝ።

¹⁶ጘጝ ተረውድ መላካንድዛት ከቭጠ ኣዪጝቀ ኣቭርኻምት ዚረድ ከቭጠ የጝ።

¹⁷ኣቓንስቅም እጝቅ ዊገይዝቅ ጝፅንድዛት ተክጠ ጥውሸው ኣቑ፤ እኒንት ፃቨውድም ሳቝረው፣ ኣምንሸው ካኽነጣነ ኻልቀ ኣቕ እደረት ኣግልግላንስመ እቂዝም ጝታኽጥያቲስ ስቝርት ችጝሳንስ ማጥን የጝ።

¹⁸ጘጝ ጝቕም ፊትንሻንድ ሚከረ ለምራንስቅ ፊትንሸቍድዛት ከቨነው ቸልጡ።