Read xamtanga እቭራውያኒዝ 3 Bible Online

እቭራውያኒዝ 3 - xamtanga bible

እቭራውያኒዝ 3

¹ነስየ ሲመይቱ ጭጝኒስ ኣድልሽርነቅ ቅዱሳን ይፅንወ! ይናእምንቲዙ ኻወርየ፣ ካኽነጣነ ኻልቀም ኣቐው እየሱስት ኻስቭጥን።

²ሙሴ እደረት ጝኒልቅ ኣምንሸው ዊነጘ፣ ጘጝም ጝት ይመዊዝ ኣምንሸው ዊኑ።

³ጝን ተሰውድየን ጝኒስ ዲቈው ክቭር ፃየው ኣቐጘ፣ እየሱስም ሙሴቲስ ዲቈው ክቭር ጥውሸው ኣቕ ችጝሽኩ።

⁴እጝቅ ጝንድቅ ጝቕም ጝቕምቱ ተሰተ ፃየው የጝ፤ ዊገድ ግን እጝቅትቅ ተሰውድ እደረ የጝ።

⁵ሙሴ እግረ ዊግሽጡ ዊገይዝ ማጥን ሚዝርዳ እደረት ጝኒልቅ ኣምንሸው ኣገልጋይዝጘ ዊኑ።

⁶ክርስቶስ ግን እደረት ጝኒል ኣምንሸው ዅሪዝጘ የጝ። ይንም ኣምንሽነዊዝመ ማክኽሽነው ቲስፈይዝ ኪው ሽን ፃይንሽ እደረት ጝን የጝ።

⁷እንዝ ማጥን መንፈስ ቅዱስ ያንትጘ፦ «ንጭ ጝድመድየንት ወሽርናንድ

⁸በራኸይስ ይት ፊትንትንድርናንድ ኣምፅርነጘ ክታእዘንድየንት ኽልክኘ ፃቭትርነ።

⁹ክታኣቅልድ ጝጊስ ይት ፊትንትን፤ ሚርምርም፤ ሰራጨው ይሰቭድየንትም ኣርቨ ምት ቓል።

¹⁰እንዝ ማጥን ጘጝ ዅለድየንት ቈጣጭ፦ ‹ጝታእዘንድ ዊትርቅ ቀረኵ፤ ይጒደነድየንትም ኣርቓቍም› ዩን።

¹¹ኣቓንስቅም፦ ‹ነስየ ይፈውጘይዙ ስፍረይል ስሪስቅ ጥዋቍም› የር ይቍጠይዝ ፃሩን።»

¹²ዚንወ! ክታጊስ ኣውማውቅ ዘላልም ፅበው እደረቲስ ቲዘው፣ ጭቓ ኣምናውም ኣቐው እዘን ፃየው ኣቓየጘ ጣጝቅቅጭጥን።

¹³ዊገድ ግን ክታማኽሊስ ኣውማውቅ ኽጥያትዝ ኻጝልድ ጝእዘንድ ኽልክኘ ኣቓየጘ፦ «ንጭ» ይሽተው ግርየድ ፅባ ግሪ ጨቨቅ ክታስ ክታይ ማኽርጭጥን።

¹⁴በውገ ፃይን ዊነው እምንትድየንት ኻትሸነይል ኣሽ ፀናዝን ፃይንሽ ክርስቶስ ጅቅ ዊርስነቅ ኣንቅ።

¹⁵እንም፦ «ንጭ ጝድመድ ወሽርናንድ ኣመፅርነጘ ክታእዘንድየንት ኽልክኘ ፃቭትርነ» ይሽተጘ የጝ።

¹⁶ኣውታይ ዊን ወሽጝ ኣምፀቍድ? ሙሴ ግቭፅስ ቃው ፊሰቍድቅ ኣየቋ?

¹⁷ኣውታትስ የጝ እደረ ኣርቨ ምት ቋጣሸውድ? ኽጢያት ሰራሽጝ ጝታእርሸድ በራኸይል ልቭ ሊቭ እዳቐውድዛት ኣየውቀ?

¹⁸ኣዚጠቅ የቍድዛት ኣየውዝየ እደረ፦ «ይፈውጘይዙ ስፍረይል ጥዋቍም» የው ፃረውድ ኣውታት የጝ?

¹⁹ነስየ ጝፈውጘይዙ ስፍረይል ጥዊጝቀ እዳጘውድ ኣምነቅ ይጛንስቅ ኣቐጘ ቓልነኵን።