Read xamtanga እቭራውያኒዝ 4 Bible Online

እቭራውያኒዝ 4 - xamtanga bible

እቭራውያኒዝ 4

¹ነስየ ጘጝ ነየው ፈውጘይዙ ስፍረይል ጥውናንስ ማጥን ለምርነው ቲስፈድየን ነንም ገነ ፀናቐው ኣቓንስቅ፣ ክታጊስ ኣውማውቅ ጝግል በቃቒጝቀ እዳቓየጘ ይንም ጣጝቅቅሽነ ጥውሸኵ።

²ኣቭዝርተዙ ቃልድ ጛጭስ ሲቭክሸጘ ይናጭስም ሲቭክሽኩ፤ ዊገድ ግን ጛይ ወሽጘው ቃልድየንት እምንትዝ ለምሪየቍ ኣጛንስቅ ጛጭስ ጣቅሚየውም።

³ውርም እኳ እደረት ሰቭድ ኣልም ፋጥርሸት ኪርም ኻትሸው ኣቕሽም፦ « ‹ነስየ ይፈውጘይዙ ስፍረይል ስሪስቅ ጥዋቍም› የር ይቍጠይዝ ፃሩን» የው ዊግተጘ፣ ይን ኣምነቅድ ጝፈውጘይል ጥውንቅ።

⁴ላጝጠትረ ግርየይዝቍዝም ላው ስፍረይስ፦ «እደረ ላጝጠትረ ግርየይዝ ጝሰቪስቅ ፈዉ» ይሽት ፃፍሽኩ።

⁵እኒን ክፍሊስ ቈሽ፦ «ይፈውጘይዙ ስፍረይል ስሪስቅ ጥዋቍም» የኵ።

⁶ጘጝ ፈውጘይል ጥወቍ ገነ ላው ላው እኵ፤ ኣቭዝርተይዙ ቃልድ ሲቭክሸቍ በውገትቍድ ኣዚቲየቍ ኣጛንስቅ ፈውጘይል ጥዊየቍም።

⁷እንዝ ማጥን እደረ፦ «ንጭ» የነውዝ እንደ ገነ ላየ ግርየ ዊስኑ፤ እንም እክሰው ግርየዝ ግረ ዳዊትት ምቸይዝ፦ «ንጭ ጝድመድ ወሽርናንድ ክታእዘንድየንት ኽልክኘ ፃቭትርነ» ይሽት ቀደም የው ዊግሸጘ የጝ።

⁸እየሱ ጛጭስ ፈውጘዙ ስፍረ ይው ዊናንመ ጝዝ ግረ እደረ ላየ ግርየዝቍዝ ዊግትጠም ዊኒየው።

⁹እደስለስ እደረት ኽዝቪዝ ቅዳምሲንቭትዙ ፈውጘድ ተከው ፈውጘ ገነ እዳቕኩ።

¹⁰ምላሰንድም እደረት ፈውጘይል ጥወው እጅርድቅ፣ እደረ ጝሰቪስ ፈወጘ ጘጝም ጝሰቪስ ፈወኵ።

¹¹ነስየ ኣውማውቅ እዛይዙ ኣዚጠቅ የነዊዝ ተከድየንት ቲክን ሊቫየጘ፣ ጘጝ ፈውጘይል ጥውነ ማጥን ቲጊነ።

¹²እደረት ቃልድ ፅበው፣ ሰራሸውም የጝ፤ ሊጘይዝቅ ስለት ፃየው ሰይፊስቅ ስለታም የጝ፤ ኒፍስዝመ መንፈስዝ፣ ጅገዝመ ቅልጥምዝ ቲዝጢስቅ ዚልቅ ሲቨኵ፤ እዘንዙ ኻሰቪዝመ ምርቕፀይዝድየንትቅ ሚርምረኵ።

¹³እደረት እሊስ ሲውርሸው ውረውረ ፍጥርትም እጅው፤ ይን ይናቕምትውዝ ዊሰ ይውነ ጥውሸው ጝበዊስ፣ እጝቅ ዊገድቅ ጋልፅሽተው፣ መጥማጥም ኣቐው የጝ።

¹⁴ነስየ ሲመይ ጥወው ኽየው ካኽነጣነ ኻልቀ እደረት ዅር እየሱስት ፃይነቅ ኣናንስቅ ይናእምንትድየንት ኪው ሽን ፃይነ።

¹⁵ይናካኽናጣነ ኻልቀድ ይን ዝላናንድ ይናጭስ ኣርኽርኽጠ ቸላውም ኣየው፤ ዊገድ ግን እጝቅ ዊገይዝቅ ይናጘ ፊትንሸው የጝ፤ ኣነጚ ጘጝ ውርቅ ኣይንት ኽጥያት ሰራሺየውም።

¹⁶ነስየ ስቝርት ለምርናንስ፣ ይናጭስ በንዛንድም ይናት ከቨው ፃገ ችጝናንስ ማጥን ፃገ ችጝሸው እደረት ዙፋኒል እምንትዝ ኣልትነ።