Read xamtanga እቭራውያኒዝ 5 Bible Online

እቭራውያኒዝ 5 - xamtanga bible

እቭራውያኒዝ 5

¹ካኽነጣነ ኻልቀድቅ እቀ ማኽሊስ ማርፅሽት እደረ ጅቅ ዲምቅሰው ውላይዝቅ እቂዝ ፊንተ ኣቕ ኽጥያትዝ ማጥን ሚቨዝመ ምስዋይትዝ ኣልስጠ ይምሸኵ።

²ጘጝ ጝቕምም ዝላ ፃየው ኣቓንስቅ ኣርቕት እጀቍ ቀረቍ እቂዝ ኣርኽርኽጠ ቸለኵ።

³ጝቕምቱ ኽጥያቲዝመ ላጥ እቂዙ ኽጥያቲዝ ማጥን ምስዋይት ኣልስጠ ጥውሸው ኣቐውድም እንዝ ምላሰንዝ የጝ።

⁴ኣረውንትጘ እደረቲስ ጭጝሸው ኣቒየውዝየ፣ እኒን ክቭርድየንት ኣውማው እጅርቅ ጝቕም ፊስጠ ችላውም።

⁵እኒዝጘም ክርስቶስ ካኽነጣነ ኻልቀ ኣቐነው ክቭርድየንት ጝቕም ፊሲየውም፤ «ክት ይዅር ይጝ፤ ያን ክት ንጭ እዅርኩን» የውድ እደረ ጝቕም የጝ።

⁶እኒዝጘም ላየ ስፍረይስ፦ «ክት መልከፀዲቅት ይምቲዝጘ ዘላልም ካኽን ይጝ» የኵ።

⁷እየሱስ እጅር ኣቕ እኒን ዝቨይል ዊናንድ ጝት ክርጘይስ ቓዝጠ ቸለው እደረስ ጭቕጘ ቓፃ፣ ሊዛም ፀለውትዝመ ጨውንዝ ኣልሱ። ትዅት ኣቕ ጝጭስ ኣዚታንስቅም እደረ ጝፀለውትድየንት ወሹ።

⁸እደረት ዅር ኣቕሽም እኳ ለምረው ሚከረይስ ኣዚተነውድ ክንዱ።

⁹እንዝም ፍፅም ኣቕ ችጝሸት ግረ ጝጭስ ኣዚተቊዝቅ ዘላልምዙ ቓድትዝ ምላሰን ኣቑ።

¹⁰እደረም ጝት መልከፀዲቅት ይምቲዝጘ ካኽነጣነ ኻልቀ ፃቭ ይሙ።

¹¹እን ዊገይዝቍዝ ዊግትነ በንነቍ ንቕፀቍ ዊቅ እኵ፤ ዊገድ ግን ክታኣይምረውድ ፊዛንስቅ ኣስርድዘናንስ ችግር የጝ።

¹²ነኳን ኣሽ ክንሰጥ ኣትርነ ጥውሻንድ፣ ዊገድ ግን ገነ እደረት ቃሊዙ ኣፍሉ ክንድጝድየንት ክንትርነ በንዘኵ፤ እንዝ ኣይንትዝ ክታጭስ በንዘውድ ፃቭጚ ጠጝካር ዅረም ኣየው።

¹³ፃቭ ዝየነውዝ ፅበው ኣውማው እጅርድቅ ኽፃን ኣቓንስቅ ፅድቅዙ ክንድጚጅቅ ገነ ዲዝጝሺየውም።

¹⁴ጠጝካር ዅረ በንዘውድ ግን ቀሰው ዊገድየንት ጭቓ ዊገይስ ቲዘነው ክንደቍ ኽየቍ እቂዝ የጝ።