Read xamtanga እቭራውያኒዝ 6 Bible Online

እቭራውያኒዝ 6 - xamtanga bible

እቭራውያኒዝ 6

¹እንዝ ማጥን ክርስቶስትቍዝ ዊግተው ኣፍሉ ክንድጝድየንት በርን ኣርቕትዝ ኽየቍ እቂዝ ጥውሸው ክንድጚዝጐ ፊርነ፤ ክረው ሰቭዝቍዝ ንስኻ ጠወነውዝመ እደረት ኣምነነውዝቍዝ፣ ጥምቅትዝመ ናንጣን እቝረነውዝቍዝ፣ ክርጘይስ ጐነይዝመ ዘላልምዙ ፍርድዙ ክንድጝዝቍዝ እንደ ገነ ሚስርት ሚስርትነ ጥውሻውም።

³እደረ ፊቅድሽ እኒንት ፃቭንቅ።

⁴ሊን ጛጭስ ብርኻን ኣቭርኸው፣ ሲመይቱ ይውትድየንትም ጣመቍድዛት፣ መንፈስ ቅዱስትም ኣድልሸቍድዛት፣

⁵ቀሰው እደረቱ ቃሊዝመ ገነ ተረው ኣልሚዙ ኻይልድየንትም ጣመቍድዛት፣

⁶እግረ ግን ዊስጝ እኒንትቅ ኻድየቍ እቅድዛት እንደ ገነ ንስኻል ዊሰነው ቸልሻውም፤ ምላሰንድም እንዛይ እቅድ እንደ ገነ እደረት ዅርት ጝታቕም ሲቅልጘኵ፤ ኣዋርዝጘኵም።

⁷ዊትርቅ ጝርዲጊል ሊቨው ስወድየንት ዝይረይ፣ ጝርት ጒዘቊዝም ፍር የውረይ ዝቨ እደረቲስ በረከት ለምረች።

⁸ኣሚዝመ ገልደወዝ ቢቊልዝርሽ ግን ወየ እጅረይ ኣቐች፤ እፂተነውልም ችጝርኵች፤ ጝርኻትሸነድም ልየዝ ቃጥልሸነው የጝ።

⁹ወደጃንወ! ውርም እኳ እነይን ዊግትናነ ክታቓደነይዝ ኣቐው ቺዘው ዊገ ፃይርነቅ ኣቕርነጘ እርግጥ ተረድሽንኵኑን።

¹⁰እደረ ኣማንዝ ፊርደው የጝ፤ ጘጝ ክታሰቭድየንት፣ እኒዝጘም በውገም ኣነ ነን፣ ቅዱሳንድዛት ከቨነውዝ ጝሽⶔዝ ማጥን ቓሊስርነው ፍቅርድየንት ሚራውም።

¹¹ክትን እጝቅቅ ቲስፈዝ ኣርውድርነው ዊገድየንት ፃይትርኒስቅ እነየው ቲግየድየንት ኻትሸነይል ኣሽ ቓሊስትርነ ቐናዝን በንነኵን።

¹²እምንትዝመ ኣቕልዝ ፀናቕጝ ቲስፈ ይውሽተው ዊገድየንት ዊርሰቍድዛት ተክርናንስጚ ሲዝወጥ ኣትርነ በናይነቅም።

¹³እደረ ኣቭርኻምስ ቲስፈ ይዋንድ ጝቕምቲስ ዲቈው ፃረነው እጀው ኣቓንስቅ፦ «እርግጥዝ ክት በርክጭር፤ ክዚረድም ኒቒስጭር» የው ጝቕምትዝ ፃሩ።

¹⁵ኣቭርኻምም ኣቕልዝ ኣርውረት ግረ ጝጭስ ይውሽተው ቲስፈዙ ቃልድየንት ችጙ።

¹⁶እቅ ጝታቕምቲስ ዲቈዊዝ ፃርጘኵ፤ ፃርድም ዊግሸው ዊገድየንት ፀናዘው ኣቓንስቅ ጝታማኽሊል ጒሸው ክርክርድቅ ፃርዝ ዲምድምሸኵ።

¹⁷እደረ ላውጥውጥሻው ጝኻሰቭድየንት፣ ቲስፈይዙ ቃልድየንት ዊርሰቊዝ ግልፅ ፃቭጠ በናንስቅ ፃርዝ ጛጭስ ፀናዙ።

¹⁸እንዝ ኣይንትዝ እደረ ላውጥሻቍ ኻሽዋይነቍም ኣቐቍ ሊጘድ የነትም ጝቲስፈይዝመ ጝፃሪዝ ይናጭስ ነይኩ፤ እንዛይ ሊጘይዝ ኣማካይነትዝ የናበዊል ፅበው ቲስፈድየንት ኪው ሽን ፃይናንስ ማጥን ጝጐ ሰይነቅ ይናጭስ ኽየው ዲብሽትነ ፃቭኩ።

¹⁹እኒን ቲስፈድም ይናኒፍሲዝ ኒንቅሻው ኣምንሸው መልኽቂዝጘ የጝ፤ እንም ገርደነይዝ እግረይል ፅበው ኣቒቱ መቅደሲል ጥወኵ።

²⁰እኒን መቅደሲልም እየሱስ መልከፀዲቅት ይምቲዝጘ ዘላልም ካኽነጣነ ኻልቀ ኣቕ ይናማጥን በውርት ጥውኩ።