Read xamtanga እቭራውያኒዝ 7 Bible Online

እቭራውያኒዝ 7 - xamtanga bible

እቭራውያኒዝ 7

¹እኒን መልከፀዲቅድ ሳልየምት ንጕስ፣ ልውል እደረት ካኽንም ዊኑ፤ ጘጝም ኣቭርኻም ንጕሳንድዛት ድል ፃቭ ዋጥራንድ ጝጅቅ ዲምቅሽ ጝት በርኩ።

²ኣቭርኻምም ጝፃየዊስቅ ኣስራት ፊስ ይዉ፤ መልከፀዲቅት ሽⶔዙ ትርጕምድ ላውድ፦ ፅድቅዙ ንጕስ የነት የጝ፤ ሊጘትረድ ቈሽ፦ ሳልየምት ንጕስ ዊንም ዲግተዙ ንጕስ የነት የጝ።

³ጚር ጝኘት እጀውም፤ ዅርነይዙ ኻረግም እጀውም፤ ጝዚምኒዝ ኪርምሸነ፣ ጝርዅየይዝም ኻትሸነ እጀውም፤ ዊገድ ግን እደረት ዅርስ ተከ ኣቐነውዝ ዘላልም ካኽን ኣቕ ፅበኵ።

⁴እኒን እጅርድ ኣወየው ኽየው ኣቐጘ እስቲ ቓልጥን! ኣቅሊዝ ኣይር ኣቐው ኣቭርኻም እኳ መራቐዊስቅ ኣስራት ፊስ ጝጭስ ይዉ።

⁵ክኽንትል ሚድቭሸቍ ለዊት ቝር ውርም እኳ ጝታፅንድ ኣቭርኻምት ዚረ ኣጝሽም፣ ኽዝቪስ የነተም ጝታፅኒስ ኣስራት ለምርጥጘ ኽግድ ኣዘኵ።

⁶እኒን ግን ጝዅርነይድ ለዊት ዊግኒስም ኣየው፤ ኣነጚ ኣቭርኻምቲስ ኣስራት ለምሩ፤ ቲስፈዙ ቃል ፃየው ኣቭርኻምትም በርኩ።

⁷እጥንድ ኽየዊዝ በርክሽጠጘ ጥርጥርም እጀው።

⁸ላው ጋቢዝ፣ ኣስራት ለምረቍድዛይ ክረቍ እቅ ጛይ፤ ላየ ጋቢዝ ግን ፅበው ኣቕ ፅብጠጘ ሚዝርሽተውድ ኣስራት ለምረኵ።

⁹እንዲያውም ኣስራት ለምረው ለዊ ጝቕም ኣቭርኻምት ኣመካይነትዝ ኣስራት ኪፍልኩ ይጥነ ቸልሸኵ።

¹⁰ምላሰንድም መልከፀዲቅ ኣቭርኻምት ዲምቅሻንድ ለዊ ገነ ጚር ኣቭርኻምት ይዊል ዊኑ።

¹¹ነስየ ኽግድ ኽዝቪዝ ይውሽተውድ ለዊት ክኽንቲዝ ሚስርትዝ የጝ፤ እኒን ለዊት ክኽንቲዝ ፍፅም ኣቐነው ችጝሽ ዊናን፣ ኣረውንት ክኽንቲዝጘ ኣዪጝቀ መልከፀዲቅት ክኽንቲጘ ኣቐው ላየ ካኽን ወረጘ ፃቭጠ በንዝጠ ዊኑ?

¹²ምላሰንድም ክኽንትድ ላውጥሸውዝየ ኽግድም ላውጥሽጠ ግድ የጝ።

¹³እኒንትቅ ጝማጥን ዊግትኑ ካኽንድ ችጝሸውድ ላየ ነገዲስ የጝ፤ ጘጝ ነገዲስም መሰውየይል ኣልት ኣግልግለው እጅርም እጀው።

¹⁴ይናኣደረ ችጝሸውድ ይዅዳት ነገዲስ ኣቐጘ ኣርቕሽተው የጝ፤ ኣነጚ ሙሴ ካኽናጣኒዝ ማጥን ዊግታንድ ይዅዳት ነገዲዝቍዝ ውረውረም ዊግቲየው።

¹⁵መልከፀዲቅትጘ ላየ ካኽን ተራንድ ግን ይን ዊግትነውድ ጭቕጘ ጋልፅሽተው ኣቐኵ።

¹⁶ጘጝ ካኽን ኣቐውድ ድዛው ርዅየዙ ኻይልዝ ሚስርትዝጚ ዅርነይዙ ስረቲዝ ሚስርትዝም ኣየው።

¹⁷«ክት መልከፀዲቅት ይምቲዝጘ ዘላልም ካኽን የጝ» ይሽት ጝጭስ ሚዝርሽትኩ።

¹⁸በውገቱ ትዛዝድ ዝላቐው፣ ጣቅማውም ኣቓንስቅ ሸርሽኩ።

¹⁹ኽግድ ኣውማውትቅ ፍፅም ፃቭጠ ቸላው ኣቓንስቅ፣ እደረትጐ ኣልትናንስ ማጥን ቺዘው ቲስፈ ይናጭስ ነይሽትኩ።

²⁰እኒን ክኽንትድ ፃር እጀውም ኣቒየው፤ ላጥድ ካኽነጣን ኣጘውድ ፃር እጀው የጝ።

²¹ጘጝ ኣቓንድ ካኽን ኣቐውድ ፃርዝ የጝ፤ እንም፦ «እደረ፦ ‹ክት ዘላልም ካኽን የጝ› የው ፃሩ፤ ጝኻሰቭድየንትም ላውጣውም» ይሽት ጝጭስ ድቍሽተዊዝ ሚስርትዝ የጝ።

²²እኒን ፃሪዝ ምላሰንዝ እየሱስ ቺዘው ኪዳንዝ ወዝ ኣቕኩ።

²³ጝታክኽንቲዝ ዘላልም ፅባይጘጘ ክርጘ ኪልክላንስቅ በውገትቍ ካኽነጣኒዝ እግዘድ ንቕፀው የጝ።

²⁴እየሱስ ግን ዘላልም ፅበው ኣቓንስቅ ጝክኽንትድ ሸርሻውም።

²⁵እንዝ ማጥን ጝታማጥን ጨዋ ዊትርቅ ርዅየዝ ፅበው ኣቓንስቅ ጝጐቱ ፃቭጝ እደረትል ተረቍድዛትቅ ፍፅም ቓዝጠ ቸለኵ።

²⁶ነስየ ይናጭስ በንዘውድ እነየው ካኽነጣነ ኻልቀ የጝ፤ ጘጝ ቅዱስ፣ ነቐፈ እጀው፣ ንፅዅ፣ ኽጥያትኝጢስ ቲተው፣ ሲመይስቅ ኒየ ኪብረው የጝ።

²⁷ጘጝ ላጥ ካኽነጣነ ኻልቅጢዝጘ በውገ ጝቕምት ኽጥያቲዝ ማጥን ጝዝግረ ቈሽ ኽዝቪዙ ኽጥያቲዝ ማጥን ግሪ ጨቨቅ ምስዋይት ኣልስጠ በንዛውም፤ ጝቕምት ምስዋይት ፃቭ ኣልሳንት ኰር ጝታኽጥያቲዝ ማጥን ሊን ኻት ኣልስኩ።

²⁸ኽግድ ዝላቐቍ እቅድዛት ካኽነጣነ ኻልቅጥ ፃቭ ይመኵ፤ ኽጊዝ ግረ ተረው ፃርዙ ቃልድ ግን ዘላልም ፍፅም ኣቐው እደረት ዅርት ይምኩ።