Read xamtanga እቭራውያኒዝ 8 Bible Online

እቭራውያኒዝ 8 - xamtanga bible

እቭራውያኒዝ 8

¹ነስየ ነን ዊግትነው ዋነ ዊገድ፣ ሲመይስ ልውል እደረት ዙፋኒዝ ለዊል ጐየው እነየው ካኽነጣነ ኻልቀ ፃይነቅ ኣቐነውድ የጝ።

²ጘጝም እጅርዝ ቲክልሽረይ ኣዪጝቀ እደረ ጝቕም ቲክለይ እማንትወ ድጝኳን ኣረይ መቅደስሸንት ኣገልጋይ የጝ።

³እጝቅ ካኽነጣነ ኻልቀድቅ ይምሸውድ ሚቨዝመ ምስዋይትዝ ኣልስጠ የጝ፤ እንዝ ማጥን እኒን ካኽንድም ኣልሰነው ላው ዊገ ፃየው ኣጠ ግድ የጝ።

⁴ጘጝ ዝቨይል ፅበው ኣቓንስ ካኽን ኣጠም ዊኒየው፤ ምላሰንድም ኽጊዝ ሚስርትዝ ሚቨድ ኣልሰቍ እቅ እኵ።

⁵ጛይ ኣግልግልጘውድ ሲመይ ፅብረይሸንስ ተከ፣ መጅወም ኣረይ ድጝኳንሸንት ኣቒል የጝ፤ እንም ሙሴ ድኳንሸንት ተስጠ ጓንድ እደረ፦ «ኣበይስ ክጭስ ጋልፅሽተዊዝ ሚስርትዝ እጝቅትቅ ፃቭራንስ ጣጝቅቅጭ» የው ኣዘዊዝ ሚስርትዝ የጝ።

⁶ዊገድ ግን እየሱስ ማኽልኘ ኣቐው ቃል ኪዳንድ፣ በውገቱ ቃል ኪዳኒስ ዲቈው፣ ቺዘው ቲስፈዙ ቃልዝም ሚስርትሸው ኣቐጘ፣ ጘጝ ለምረው ኣግልግለውትድም እዛይ ለምርጘው ኣግልግለውቲስ ዲቈው የጝ።

⁷በውገቱ ቃል ኪዳንድ ውረውረ ጕድልት እጀው ኣቓን፣ ሊጘትረ ቃል ኪዳን በንዝጠም ዊኒየው።

⁸ዊገድ ግን እደረ ጝኽዝቪስ ጕድልት ችጛንስቅ እንት የኵ፦ «እንወ ያን እስራየልት ጝኒጅቅ፣ ይዅዳት ጝኒጅቅም ኣይር ቃል ኪዳን ጥወው ግርየ ተርጡ፤ የኵ ኣደረ።

⁹እኒን ቃል ኪዳንድም ጛት ግቭፅ ዝቨይስ ፊስጨ ጝታናንድ ፃቃንድ በውገትቍ ጝታኣቅሊጅቅ ጥወው ቃል ኪዳኒዝጘም ኣየው፤ ምላሰንድም ጛይ ይቃል ኪዳኒዝ ፀናቒየቍም፤ ያንም ጛት ቸለል ዩን፤ የኵ ኣደረ።

¹⁰እንዝ ግረ እስራየልት ጝኒጅቅ ቃል ኪዳን ጥውጭር፤ የኵ ኣደረ፤ እኒን ቃል ኪዳንድም ይኽግድየንት ጝታኣይምረውዊል እቝርጭር፤ ጝታእዘኒልም ፃፍጭር፤ ያን ጝታኣምላክ ኣጭር፤ ጛይም ይኽዝቭ ኣጥቍ።

¹¹ነስየ ኣውማው እጅርቅ ጝግዘድየንት ዊንም ጝዝንድየንት ‹ኣደረት ኣርቕ› የው ክንሳውም፤ ምላሰንድም እጥኒስ ኪርም ኽየዊል ኣሽ እጝቅቅ ይት ኣርቕጥቍ።

¹²ጝታበደልድየንት ይቅር ይጭር፤ ጝታኽጥያትድየንትም ጝዝለ ኻስቨቅም።»

¹³እኒን ቃል ኪዳንድየንት፦ «ኣይር» ያንስቅ በውገቱ ቃል ኪዳንድየንት ጊንዝኩ፤ እንዝ ማጥን ጊነውድ፣ ኻፍለም ኣቐውድቅ ድዘነ ግርየድ ችጝኩ።