Read xamtanga እቭራውያኒዝ 9 Bible Online

እቭራውያኒዝ 9 - xamtanga bible

እቭራውያኒዝ 9

¹በውረ ቃል ኪዳኒዝም ኣምልኰውዙ ስረትዝመ ዝቨል ተሲተው መቅደስዝ ዊኑ።

²ሊጘ ክፍል ፃየው ድጝኳን ቲክልሽ ዊኑ፤ በዊዙ ክፍሊል መቅረዝድ፣ ጠረቢዘድ፣ ምስዋይቲዙ ኽቭስትድ ዊን፤ እኒን ክፍልድም፦ «ቅድስት» ይሽተኵ።

³ሊጘትረ ገርደነይዝ ግረይል ቈሽ፦ «ቅድስተ ቅዱሳን» ይሽተው ክፍልድ ዊኑ።

⁴ጝግልም ዊርቀዙ ፅንኸዝመ ዊርቀዝ ላብጥሸው ቃል ኪዳኒዙ ታወቲዝ ዊን፤ ታወቲዝ ኣቒልም መነ ፃየው ዊርቀዝ ተሲተው ሚስቭ፣ ሊልምድረይ ኣረውንት ግብሸን፣ ቃል ኪዳንድ ፃፍሸው ፅላትድ፣ ዊን።

⁵ታወቲዝ ዲጊልም ኣርቅሸነይዙ ዲቨነድየንት ጝታኪፊዝ ገርደቍ ክቭርዝቍ ኪሩቭየል ዊን፤ ነን ግን እንዛይዝቍዝቅ ዝርዝርዝ ዊግትነ ቸላይነቅም።

⁶እጝቅቅ እንዝ ኣይንትዝ ኣስልሸት ገረ ካኽነጣንድ ጝታኣገግለውትድየንት ፋፅምጥጘ ዊትርቅ ድጝኳኒዙ በውረ ክፍሊል ጥውጘኵ።

⁷ኣቒዙ ሊጘንትረ ክፍሊል ጥወውድ ግን ካኽነጣነ ኻልቀድ ጭቝ ዊኑ፤ ጥወውድም ኣምረይዝ ሊን ጭቝ ኣቓንድ፣ ጝቕምቱ ኽጥያቲዝመ ኽዝቭድ ቀተዝ ሰራሸው ኽጥያቲዝ ማጥን ኣልሰነቍ ብር ፃዪይጝቀ ስሪስቅ ጥዋውም።

⁸በውገትወ ድኳንሸን ፅብራ ቅድስተ ቅዱሳኒል ፊሰው ጒደነድ ገነ ጋልፅሽቲየው ኣቐጘ መንፈስ ቅዱስ ቓሊሰኵ።

⁹እንም ነንቱ ዚምኒዝ ተከ የጝ፤ እንዝ ኣይንትዝ ኣልተቍ ሚቪዝመ ምስዋይታኒዝም፣ ኣምልከው እጅሪዙ ኽሊነድየንት ዊርሽጥጘ ቸላቍም ዊን።

¹⁰እንዛይቅ ኣይር ስረትድ ተርጢስቅ ፃቭሽተቍ፣ ዀነውዝመ ዝየነውዝ እኒዝጘም ቲተቲተው ዊር የነውዝ ኣቐቍ ስየዝቍ ስረተን ጭቝ ጛይ።

¹¹ክርስቶስ ነን ፅበው ቀሰው ዊገይዝ ካኽነጣነ ኻልቀ ኣቕ ተራንድ እቀ ናንዝ ተሲቲረይ፣ እኒን ፍጥርቲስም ኣይረይ፣ ኽይረይ፣ ፍፅምም ኣረይ ድኳንሸንትል ጥዉ።

¹²ጘጝ ዘላልምዙ ኻርነይ ችጝስጠ ጝቕምትቍ ብርድ ፃይ ቅድስተ ቅዱሳኒል ሊን ኻት ጥዉጚ ፍጭርዝመ ቻምጥዝዝቍ ብር ፃይም ጥዊየው።

¹³ኣርክሽተቍ እቂል ትኒተቍ ፍጭርዝመ ቻምጥዝዝቍ ብርድ፣ እኒዝጘም ምስዋይት ኣቕር ቃጥልሽረይ ሚቍኑት ፃብርድ እኳ ሰውነትድ ዊርሽጝ ጛት ቀድሰቍ ኣጘውዝየ፣

¹⁴እደረት ዘላልምዙ መንፈስዝ ኣምካይነትዝ ጝቕምት ኒውር እጀው ምስዋይት ፃቭ እደረስ ኣልሰው ክርስቶስት ብርድሰ ዘላልም ፅበው እደረት ኣምልክናንስ ማጥን ይናኽሊነድየንት ክረው ሰቪስ ኣወሽጝ ቐናዝ ዊርሻው!

¹⁵እንዝ ማጥን ጭጝሸቍድ ቲስፈ ይውሽተው ዘላልምዙ ርስትድየንት ለምርጛንስ ማጥን ክርስቶስ ኣይር ኪዳኒዝ ማኽልኘ የጝ፤ ኣቓንስቅም ጛይ በውገቱ ኪዳኒዝ ስሪል ዊንጛንድ ሰራሽጘው ኽጥያቲስ ኻርነይ ፊስጠ ጝታቺ ክርኩ።

¹⁶ንዛዚ ፅበውዝየ ነዚተው እጅሪዙ ክርጘድ ደደደድሰነው ግድ የጝ።

¹⁷ምላሰንድም ንዛዚ ፀናቐውድ ነዚተው እጅርድ ክራንድ የጝ፤ ነዚተውድ ርዅየዝ ፅበውዝየ ግን ንዛዚድ ወየም እጀው።

¹⁸እንዝ ማጥን በውገቱ ኪዳንድ እኳ ብር እጀው ፀናቒየውም።

¹⁹ሙሴ ኽጊዝቍ ትዛዛንድዛት ኽዝቪዝቅ ድቈት ግረ፣ ቻምጥዝመ ፍጭርዝዝቍ ብርድዛት ኣቚ ጅቅ ፃቭ ኽጊዙ መፃፊዝመ ኽዝቪዝቅ ሰረው ቢገዙ ፅቭቀዝመ ኺሰብ የነው ኻፀዝ ትንዙ።

²⁰ትንዛንድም፦ «እደረ ክታት ኣዘው ኪዳኒዙ ብርድ እኒን የጝ» ዩ።

²¹እኒዝጘም ድጝኳኒዝመ ጝኣቒል ፅበቍ ኣግልግለነቍ ጐዝድዛትቅ ብርዝ ትንዙ።

²²እርግጥም ዊትቍ እዳጛንድ፣ እጝቅ ዊገድቅ ብርዝ ዊር ይጠ ግድ ኣቐጘ ኽግድ ኣዘኵ፤ ብር ቅብሪጘውዝየ ኽጥያትዙ ስቝርት እጀውም።

²³ነስየ እንዛይ ሲመይትቊዝ ተከ ኣቐቍድ እንዛዝ ዊር ይጥጘ ግድ ዊኑ፤ ሲመይዝቍድ ግን እንዛይስ ድቈው ምስዋይትዝ ዊር ይጥጘ ጥውሸኵ።

²⁴ክርስቶስ ነን ይናማጥን እደረት በዊል እትልጠ ሲመይ ጥዉጚ እማንትወየንስ ተከ ኣረይ እቀ ናንዝ ተሲትረይ መቅደስትልም ጥዊየው።

²⁵ካኽነጣነ ኻልቀድ ጝቕምትቍ ኣየቍ ብርድዛት ፃይ ኣምረ ኣምረዝ ቅድስተ ቅዱሳንሸንትል ጥዋንትጘ፣ ክርስቶስ ጝቕምት ብጭቐን ምስዋይት ፃቭ ኣልስጠ ሲመይ ጥዊየውም።

²⁶እነየው ኣቓንመ ኣልም ፋጥርሸት ኪርም ብጭቐን ሚከረ ለምርጠ በንዝጠ ዊኑ፤ ነን ግን ዚምናኒዝ ኻትሸነይዝ ጝቕምት ምስዋይት ፃቨነውዝ ኽጥያትድ እክልስጠ ሊንስ ኻት ጋልፅሽትኩ።

²⁷እጅር ሊን ክርጠ፣ ጝዝግረም ፍርድ ለምርጠ ዊስንሸው የጝ።

²⁸ክርስቶስም ንቕፀቍ እቅዝ ኽጥያትድ መውርጠ፣ ጘጝት ሊን ምስዋይት ኣቕኩ፤ ሊጘትም ጋልፅሽትጡ፤ እንም ጝት ኣርውደቍድዛት ቓዝጠ ማጥን የጝጚ ኽጥያት መውርጠም ኣየው።