Read xamtanga ያይቈቭት እፃ 1 Bible Online

ያይቈቭት እፃ 1 - xamtanga bible

ያይቈቭት እፃ 1

¹ያን እደረስመ ኣደረ እየሱስ ክርስቶስስቱ ኣገልጋይ ኣቐር ያይቈቭቲስ፦ ኣልሚልቅ ቢትንሽጝ ፅበቍ ፅጭ ሊጘ ዊግናኒዝ እፃሽተው እፃ። ዲግተ ክታጅቅ ኣነ።

²ይፅንወ! ቲተቲተው ሚከረ ችጝርናንድ ጭቕጘ ዲስ ይጥን።

³ምላሰንድም ክታእምንትድ ፊትንሸነውድ ክታት ኣቕል ጕይጥ ፃቨው የጝ።

⁴ኣቕልም ክትን ውረውረዝቅ ጒድሊጝቀ እጝቅዝቅ እቻቕርነቅ ኣትርነ ማጥን ጝሰቭድ ፋፅምነ።

⁵ክታጊስ ኣውማውቅ ጝጊስ ጥቨቭ ጒድልሽ ኒቕፊጝቀ እጝቅዝቅ ልግስነዝ ይወው እደረት ጨውነ፤ እደረም ጝጭስ ይውጡ።

⁶ዊገድ ግን ውረውረዝቅ ተጠራጥርሺጝቀ እምንትዝ ጨውነ፤ ተጠራጥርሸው እጅር ፊግየዝ ትክቭሽ ናውፅውሽተው ባኽሪዙ ማቨልድ ተከው የጝ።

⁷እነየው እጅርድ እደረቲስ ውረውረቅ ችጝጭር የው ማርቕፂነ።

⁸ምላስንድም እን እጅርድ ሊጘት እዘን ኣቕ ጝጒደነይዝቅ ተወላውልሸው የጝ።

⁹ድኽትዝ ዝጥቅ የው ዚነድ እደረ ኪብርዝጠጘድ ኣርቕ ዲስ ይነ።

¹⁰ፃጀዝ ኪብረው እዝንድ ቘሽ ድኽታንድም ዲስ ይነ፤ ምላሰንድም እን ኣልሚዙ ፃጀድ ፃቀ ኣቨቨይዝጘ ኣርግፍሸው የጝ።

¹¹ኰረድ ጝብረ ጅቅ ፋንድ ፃቀድ ፃምልወኵ፤ ኣቨቨድም ኣርግፍሸኵ፤ ጝሚልክድም ድዘኵ፤ እኒዝጘ ቈሽ ፃጅተው እጅርም ቢክና ሲጝቀ ድዘኵ።

¹²ፊተነዝ ፀናቐው እጅር በርክሸው የጝ፤ ምላሰንድም ፊትንሸት ግረ እደረ ጝት ቀነቊዝ ቲስፈ ይወጘ ርዅየዙ ኣክሊልድ ችጝጡ።

¹³ኣውማው እጅርቅ ፊትንሻንድ እደረ ይት ፊትኑ ዪይነ፣ ምላሰንድም እደረ ጭቓዝ ፊትንሻው ኣቓንስቅ ጘጝ ጝቕምም ኣውማውትቅ ጭቓዝ ፊትናውም፤

¹⁴ዊገድ ግን እጅር ጝቕም ጭቓ ምርቕፀዝ ፃይሽ ኻጝልዳ ዊትርሻንድ የጝ ፊትንሸውድ።

¹⁵እንዝ ግረ ጭቓ ምርቕፀ ጊዙትር ኽጥያትት እዅረች፤ ኽጥያት ቈሽ ሊግዝረት ግረ ክርጘ እዅረች።

¹⁶ቀንሽርነቅ ይፅንወ! ኻጝልድትርነ።

¹⁷ቀሰው ይውትዝመ ፍፅም በረከትዝ እጝቅቅ ጊምጘውድ ብርኻናንዝ ኣይር ኣቐው ንየ እደረቲስ የጝ፤ እደረም መጅወይዝጘ ጅልዋውም፤ ላውጥውጥሻውምም።

¹⁸ይን ጝፍጥርቲዝ ባራን ኣነ ማጥን እደረ ይናት ጝእማንተው ቃሊዝ ኻሊ እዅሩ።

¹⁹ቀንሽርነቅ ይፅንወ እኒንት ኣስክስጥን፤ እጅር እጝቅ ወሸነውዝ ቃልጥፈው፣ ዊግተነውዝመ ኻልክሸነውዝ ግን ደየው ኣነ።

²⁰ምላሰንድም እጅርዙ ኽልከድ እደረት ፅድቅድ ነሳውም።

²¹እንዝ ማጥን ጭቓ ኣምልድቅ እክልስርና ክታኒፍስድ ቓዝጠ ቸለው፣ ክታኣቒል ቲክልሸው እደረት ቃልድየንት ትኽትነዝ ለምጥን።

²²እደረት ቃልድ ፋፅምርነቅ ኣጥንጚ ወሸቍ ጭቝ ኣቕርና ክታቕምት ቀስትርነ።

²³እደረት ቃልድ ወሽ በር ፋፅማው እጅርድቅ ጝጋፅድ ምስታዊትዝ ቓለው እጅሪዝጘ የጝ።

²⁴ምላሰንድም እድ እርድ ምስታዊቲዝ ቓል ፊረጘ ጝሚልክድ ወረጘ ተክጠት በውዝ ሚረኵ።

²⁵ዊገድ ግን ኻርነይ ፊሰው ኽግድየንት ቓል በር ጝዝ ፀናቐው፣ ወሸው ቃልድየንትም ፋፅመውጚ ሚራው እጅር ጝሰቪዝቅ በርክሸው የጝ።

²⁶ጝላቕድ ጊግቪጝቀ ጝእዘንድ ቀሳ፦ «ያን ኻይማነውትኘ የጝ» የው እጅር ፅብሽ እድ እጅሪዙ ኻይማነውትድ ጊነ የጝ።

²⁷እደረ ኣይርት በዊል ንፁኽ፣ ኒውርትም እጀው ኻይማነውትድ ኣቅል እጀቍ እፈሪዝመ ጝታጕልቍድ ክረቍ ልጀጊርዳን እቍኒዝዛት ጝታችግሪስ ከቨነው፣ ኣልሚዙ እርኵስነይስም ጝታሰውነት ሊሚደነው የጝ።