Read xamtanga ያይቈቭት እፃ 2 Bible Online

ያይቈቭት እፃ 2 - xamtanga bible

ያይቈቭት እፃ 2

¹ክቭርዝ ኣደረ ኣቐው ኣደረ እየሱስ ክርስቶስት ኣምንድርነቅ ኣቕርናንስቅ እጅርዝ እጅር ኣድሉትርነ።

²ኣየውጚ? ላው እጅር ዊርቀ ቃጠ ፃቭ፣ ሸግጥ ኣልብም ሲር ክታኣኸቨይዝጐ ተራን፣ ላየ ድኻ እጅር ቘሽ እምቝተው ኣልቨ ሲር ተራን፣

³ዳኽንቍ ኣልብ ሲረው ኻፍታም እጅርድ ቓል ሽርን በትርን፦ «ለው እንል ቀሰው ጐይተይል ጐይ» ይርናን፣ ድኻ እጅርድየንት ቈሽ፦ «ክትስ እድል ችብጭ፤ ዊንም ይልኲዝ ሳ ዝቨይል ጐይ» ይርናን፣

⁴ክታስ ክታይ ኣድልውርነኵ የነት ኣየውመ? ቈሽስ ጭቓ ኻለይዝ ፃይሽርን ፊርድርኑ የነት ኣየውመ?

⁵ቀንሽርነቅ ይፅንወ! ወጭጥን፤ እደረ እምንትዝ ፃጅተቍ ኣጥጘ ማጥን ጝት ቀነቊዝም ቲስፈ ይወው ጝምጝግስትድ ዊርስጥጘ ማጥን እን ኣልሚዝቍ ድኽድዛት ማርፂየውመ?

⁶ክትን ግን ድኽድዛት ኣዋርድዝርኑ፤ ክታት ጨጝቅዘቍድ ኻፍታመን ኣየቍመ? ክታት ጒዝጛ ፍርድ ጝኒል ችብሰቍድስ ኻፍታመን ኣየቍመ?

⁷ክትን ጭጝሽርነው ኪብረው ሽድስ ዛሸቍድ ጛይ ኣየቍመ?

⁸ዊገድ ግን መፃፍዝ፦ «ክፃምረድ ክቕምትጘ ቀን» ይሽት ድቍሽተው እደረት ምጝግስቲዙ ኽግድ ፋፅምርናን ቀሰው የጝ።

⁹እጅርዝ እጅር ቲዘቲዝርነቅ ኣቕርንሽ ግን ኽጥያት ሰራሽርነኵ የነት የጝ። ኽግዝ በዊልም ኽግ ፋዘቊዝጘ እጊትትርነኵ።

¹⁰ምላሰንድም ላው እጅር ኽግ የውድየንትቅ ፋፅማ ዊገድ ግን ኽጊስ ላይሸንትኳ ፋዝሽ፣ እጝቅትቅ ፋዘጘ የጝ እጊተውድ።

¹¹ምላሰንድም፦ «ሻርሙጥተ» የው እደረድ፣ «ቁተ» የውኩ፤ ሻርሙጢርሽም ቁረውዝየ እደረት ምጝግስቲዙ ኽግድ ፋዝርኵሩ።

¹²እነየው ኣቐውዝየ ዊግትርናንድም ኣነ ፃቭርናንድቅ ኻርነይ ፊሰው ኽጊዝ ፊርድሽርነቅ ኣቕርነጘ ኣርቕጥን።

¹³ምላሰንድም ስቝርት ፃቫው እጅርድቅ ስቝርት እጀው ፍርድዝ ፊርድሽጡ፤ ስቝርትም ፍርዲስቅ ኻይልደኵ።

¹⁴ይፅንወ! ላው እጅር እምንት ፃቀር የጝ ያ ዊገድ ግን ጝእምንትድ ቀሰው ሰቭዝ ቓሊሲየውዝየ ጝእምንትድ ውር ጣቅምጡ? እነየው እምንትድመ ጝት ቓዘወ?

¹⁵ተከዝ፦ ክርስቲያናን ይናፅኒስ ዀነው ድረይዝመ ሲረነው ኣልቨዝ በቍ ላው ዚነዝመ ዚነስ ዊንጛን፣

¹⁶ክትን ቈሽ ጛጭስ በንዘውድየንት ይዊጝቀ፦ «ዳኽነዝ ፊጥን! ኪብትርነ! ክታጊዝውድም እቭትነ» ይርናን፣ ጛይ ውር ጣቅምሽ?

¹⁷እኒዝጘ ቈሽ ቀሰው ስቪስ ቲተው እምንትም ክረው የጝ።

¹⁸ዊገድ ግን ክታማኽሊስ፦ «ክት እምንት ፃይረር የጝ፤ ያን ቈሽ ቀሰው ሰቭ ፃቀር የጝ» የው እጅር ፅብሽ ያን ቈሽ፦ «ክእምንትድ ቀሰው ሰቪስ ቲዝር ቓሊሽ፤ ያንም ይእምንትድ ቀስው ሰቭዝ ቓሊስጭር» ይጭር።

¹⁹ክት፦ «ላው እደረ ጭቝ እኩ» ይር ኣምንደኵ፤ እንም ቀሰው የጝ፤ ኣነጚ ላው እደረ ጭቝ ፅበጘ ጋኒናንድም ኣምንጘኵ፤ ያውም ጐትጝ ቈጥቈጥ ይጘኵ።

²⁰እፈ ኻጝ እጅር ክተ! ቀሰው ሰቪስ ቲተው እምንት ወየ እጀው ኣቐጘ ኣርቓርመ?

²¹ይናኣይር ኣቭርኻም ጝዅር ይስኻቅት መሰውየይል እደረስ መስዋይት ፃቭ ኣልሳንት ኰር ሰራሸው ሰቪዝ ፃድቂየውመ?

²²እንዝም ጝእምንትድ ጝሰቪስ ቲቲየጘ፣ ጝእምንትድም ሰራሸው ሰቪዝ ፍፅም ኣቐጘ ቓልደኵ።

²³መፃፍም፦ «ኣቭርኻም እደረት ኣምኑ፤ ጝእምንትድም ጝጭስ ፅድቅ ኣቕ እጊቱ» የው ዊግተውድ ፋፅምሹ፤ እንዝም፦ «ኣቭርኻም እደረት ወደጅ» ይሽቱ።

²⁴ነስየ እጅር እምንትዝ ጭቝ ኣዪጝቀ ቀሰው ሰቭዝም ፃድቅጠጘድ ቓልድርነኵ።

²⁵እኒዝጘ ቈሽ ረኣቭ ይሽትረይ ገልምተ እውነየንስ ሰላያንድዛት ጝርጝኒል ለምትር በትር ላየ ጒደነይዝ ስቭዝር በርስራንት ኰር ጚ ሰራሽረው ሰቪዝ ፃድቂረይመ?

²⁶ኒቭሲስ ቲተው ስየ ክረው ኣቐጘ፣ ቀሰው ሰቪስ ቲተው እምንትም ክረው የጝ።