Read xamtanga ያይቈቭት እፃ 3 Bible Online

ያይቈቭት እፃ 3 - xamtanga bible

ያይቈቭት እፃ 3

¹ይፅንወ! ይን ክንሰጥ ኣነቅ እቅድ ወሰው ፍርድ ለምርነቅ ኣነጘ ኣርቕርነኵ፤ እደሰለስ ክታማኽሊስ ንቕፀቍ እቅ ክንሰጥ ኣቒጝነ፤ ምላሰንድም ይን እጝቅቅ ንቕፀው ዊገዝ ፅጋርነቅ የጝ።

²ዊግተው ዊገይዝቅ ፅጋራው ኣውማው እጅር ፅብሽ፣ ጘጝ ጝኒቭስድቅ ተቈጣጥርሽ ቸለው ፍፅም እጅር የጝ።

³ፋርፅድ ይናጭስ ኣዚትጥጘ ማጥን ጝታምቸይል ልጐም ድውነኵን፤ ኣይንድ ፊርነ በንነው ብጣይዝጐቅ ሸምነኵን።

⁴ሚርክቭም ውርም እኳ ጭቕጘ ኽየው ኣቓንስቅ ኻይሉ ፊግየዝ ትክቭሻ ፊረው ኣቕሽም፣ ሸመውድ ፊርጠ በነዊዝጐቅ መልወ ቂዝፈነይስ ቃወኵ።

⁵ላቕም እኒዝጘ ቈሽ ይናሰውነቲዝ ማኽሊል እጥን ኣርነጚ፣ ጚ ኽየቍ ዊቂልቅ ማክኽሸች፤ ኸየው ጅውነም እጥን ልየስ ቃጥልሽ ኣቢተኵ።

⁶ላቕም ልየይዝጘ ጚ፤ ላቕ ይናሰውነቲዝ ማኽሊል ፅብረይ ጭቕት ፈነ ስፍረ ጚ፤ ኒቭስድቅ ኣርክሰች፤ ፍጥርትዝ ውጠድቅ ቃጥልድር በትር ጝርቕምም ገኻነመሳትዝ ቃጥልሸች።

⁷ኣውማው ዝቨዝ ዲጊል ፅበቍ ኣረዊተንድ፣ ዚልቅድ፣ ዝቨዝዝቨ ኻሲትጛ ፃጘቍዝመ ባኽር ኣቒል ፅበቍ ፍጥርትዝቍ ዊግንድቅ፣ እጅርዝ ቅምሽጥቍ፤ ቈሽም ቅምሽጝኩ።

⁸ላቕት ግን ላው እጅር እኳ ቅም ቸላውም፤ ጚ ፈውጘ እጅረይ ቍወው መርዝዝ እቻረይ ጭቓ ጚ።

⁹ላቕስ ኣደረስመ ይናኣይር እደረስ ሚዝየንዝነኵን፤ ጝርስ ቈሽ ዊስን እደረት ሚልክዝ ፋጥርሸቍ እቅድዛት እፅነኵን።

¹⁰ላው ምቸዝ በረከትዝመ እፀዝ ፍጘኵ፤ ይፅን ቈደይ! እነየው ኣጠ ጥውሻውም።

¹¹ላው ፍልፍሊስ ጣምተቍ ኣቝዝመ ማረቍ ኣቝዝ ፍልፍልድጥቍመ?

¹²ይፅን ክታችወ! በለስቱ ዘፍ ዊረ ፍር ፍርዝጡመ? ወይንዙ ኻረግድስ በለስቱ ፍር ፍርዝጡመ? ማረቍ ኣቚስም ጣምተቍ ኣቝ ችጝሻቍም።

¹³ክታጊስ ጥቨቭኘ፣ ኣስክሰውም እጅርድ ኣው የጝ? ጘጝ እጅርድ ጝሰቭድየንት ጥቨቪስ ችጝሸው ትኽትነዝ ሰራሻ ቀሰው ፅብጘዝ ቓሊስነ።

¹⁴ጭቓ ቅንየዝመ ጛቕምት ቀነነውዝ ክታእዘኒል ፅብሽ ግን ማክኽሽትርነ፤ እማንትልም ኻሹትርነ።

¹⁵እነይረይ ጥቨቭሸን ንየ እደረቲስ ተትረይ ኣዪጝቀ እን ኣልሚስ፣ ኽጥያትኘ ስየይስ፣ ጋኒናኒስም ተትረይ ጚ።

¹⁶ኣቓንስቅም ቅንየዝመ ጛቕምት ቀነነውዝ ፅብጘው ስፍረይልቅ ኽምዘዝመ ጭቓ ሰቭዝ እጝቅቅ እኩ።

¹⁷ንየ እደረቲስ ጊምረይ ጥቨቭሸን ግን እጝቂስቅ በውግ ንፅዅ፣ ጝዝግረም ዲግተ ቀንደይ፣ ገርኽ፣ ቀስረይ፣ ቀሰው ይረይ፣ ስቝርትዝመ ቀሰው ሰቭዝ እቻረይ፣ ኣድልወነውዝመ ተክሰነውዝ እጅረይ፣ ጚ።

¹⁸ዲግተ ቀነቍ እቅ ዲግተ ፊዝጝ ፅድቅዝቍ ፍር ኻቭዝጘኵ።