Read xamtanga ያይቈቭት እፃ 4 Bible Online

ያይቈቭት እፃ 4 - xamtanga bible

ያይቈቭት እፃ 4

¹ክታማኽሊል ፅበቍ ኣጭንዝመ ጐርዝ ኣዊስ ተረቍ ጛይ? ክታኒቭሲዝ ኣቒል ኣቕ ሲቨው ስየዙ ምርቕፀይስ ፈቍ ኣየቍመ?

²በንርነኵ፤ ክታጭስ ግን ኣቓውም፤ እንዝ ማጥን ኒቭስ ቍውርነኵ፤ ጭቕጘም ማርቕፅርነኵ፤ ኣቕሽም ችጛይርነቅም፤ ነንም እድ ማርቕፅርነውድቅ ብርናንድ ክታስ ክታይ ሲቨሲቭሽርነኵ፤ ምላሰንድም እደረት ጨዋይርነቅ ኣቕርናንስቅ ችጛይርነቅም።

³ጨውርነኵ፤ ኣነጚ ጨውርነውድ ክታስየድ ዲስ ሽትርነ ማጥን ጭቕትዝ ኣቓንስቅ ችጛይርነቅም።

⁴ሸርሙጣን ክታትርነ! እን ኣልምድ ቀነው እጅር እደረት ፃለት ኣቐጘ ኣርቓይርነቅመ? የይ፤ እን ኣልሚዝ ወደጅ ኣጠ በነው እጅርድቅ እደረት ፃለት የጝ።

⁵ዊንስ፦ «እደረ ይናእዘኒል እቝረው መንፈስድ ጝቕምስ ጭቝ ኣነ ማጥን ቀኒ ማርቕፀኵ» የው መፃፍ ዊግተውድ ጊነመ ፃቭርንኵርኑ?

⁶ኣነጚ እደረ ፃገድ እቻዝ ነየው የጝ፤ መፃፍም፦ «እደረ ትቪትኝጥድ ተቃውምሸኵ፤ ትኽትኝጥዝ ግን ፃገድ ይወኵ» የውኩ።

⁷እንዝ ማጥን እደረስ ቅምጭጥን፤ ዳቪለውስት ግን ተቃውምጭጥ፤ ጘጝም ክታጊስ ሰይጡ።

⁸እደረ ትጐ ኣልትጥን፤ ጘጝም ክታጐ ኣልትጡ፤ ዊገድ ግን ኽጥያትኝጥ እቅ ክታትርነ! ክታናንጣንድ ጭቓ ሰቪስ ዊር ሽጥን፤ ሊጘት እዘንዝ ተወላውልሽርነቅድም ክታእዘንድ ዊር ሽጥን።

⁹ነንም ኣቕሽ ጨጝቅጭጥን! ኻዝንጥን! ሊዝጥን! ክታእቘጭድ ሊዝዝጐ፣ ክታዲስተድም ኽዝንዝጐ ላውጥሽነ!

¹⁰እደረት በዊል ክታቕምት ኣውዋርዝጥን! እደረ ቈሽ ክታት ንየስ ንየስ ሽጡ።

¹¹ይፅንወ! ክታስ ክታይ እርየርይሽትትርነ ምላሰንድም ጝዝንድየንት እርየው፣ ጝዝንድየንትም ፊርደው እጅር፣ እደረት ኽግድ እርየኵ፤ እደረት ኽጊልም ፊርደኵ፤ እደረት ኽጊል ፊርድረውዝየ ቈሽ ፊርደተ ኣሩጚ ኽግ ፋፅመተም ኣይረር።

¹²ኽግ ይወውዝመ ፊርደውዝድ፣ ቍውጠ ቓዝጠም ቸለው ላው እደረ ጭቝ የጝ፤ እደስለ ላየ እጅሪል ፊርድረውድ ክት ኣው ድውሱ?

¹³ላየ ዊገድ ቈሽ፣ ክትን፦ «ንጭ ዊንም ኣምር እት ኻትመይል ጥውን ላው ኣምረ ጐይንቅ፤ ጝግል ኣቕንም ኒግርን ቲርፍዝንቅ» ይርነውድ፣ እስቲ ወጭጥን!

¹⁴ኣምር ተረው ገቨድ ኣርቕትርንቅመ? ክታርዅየሸን ኣወይረይ ጚ? ሊንታፍተስ እትል በር በውዝ ድዘው እብለድ ተክረይ ኣይረይመ?

¹⁵ኽሽስ ክትን፦ «እደረ ፊቅድሽ፣ ዳኽነ ፅብናን፣ እኒንት ዊንም እድየንት ሰራሽንቅ» ይትርነ ጥውሽጠ ዊኑ።

¹⁶ክትን ግን እንት የነው በትርን ትቪትኝጥ ኣቕርናንስቅ ማክኽሽርነኵ፤ እነየው ምክኸድ ቈሽ ጭቓ የጝ።

¹⁷ነስየ እጅር ቀሰው ሰቭ ሰራሸነውድ ኣርቓ ፃቪየውዝየ ኽጥያት የጝ።