Read xamtanga ያይቈቭት እፃ 5 Bible Online

ያይቈቭት እፃ 5 - xamtanga bible

ያይቈቭት እፃ 5

¹ነንም ፃጅትርነቅ እቅ ክታትርነ! ክታጐ ተርጠ ጐው ሚከረይዝቍዝ ዋይ ዋይ ይርና ሊዝጥን።

²ክታፃጀድ ድዝኩ፤ እቝርድርነቍ ኣልብድቅ ብለዝ ዀሽትጝኵ።

³ክታዊርቀይዝመ ቝርሸይዝቅ ሚርትኩ፤ ጝሚርትድም ክታጭስ ሚዝር ኣጡ፤ ልየይዝጘ ኣቕም ክታት ዅጡ፤ እግረስ ይርን ኻቭት ኣኽቭርንኵርኑ።

⁴ቓልጥን፤ ክታቺዝጚል ቃፅርሽጝ ሰራሸቍ ኣርጭጥድ ጝታምኻየድ ቀምርናንስቅ ቓፅጘኵ፤ ጝታእርድም ሰራዊትዝ ኣደረት ቀርዚል ጥውኩ።

⁵እን ዝቨይል ተቀማጥልሽርንኵኑ፤ ጊነዙ ዲስተዝም ፅብርንኵርኑ፤ ዝወነ ግርየዝ ቀልቭሸው ቢረይዝጘ ክታእዘንድ ዲንዝርንኵርኑ።

⁶ክታጅቅ ተከራክርሸነው ኣቅም እጀቍ እማንተቍ እቅድ ኻሽትዝ ፊርድርና ቍውርንኵርኑ።

⁷ነስየ ይፅን ክታችወ! ኣደረ ተርጢስቅ ኣቕልዝ ሊሚድጥን፤ በውረ እገረቱ ስወድ ሊቭጢስቅ ኣቕልዝ ሊሚዳ ቀሰው ማፁ ፍረድ ሊሚደው ኣርሸይዝጘ ክትንም ኣቕልዝ ሊሚድጥን።

⁸ኣደረት ተረነ ግርየድ ጣቅራንስቅ ክታእዘንድ ፀናዝጥን።

⁹ይፅን ቈደይ! ኣደረት ፍርድድ ክታቕምትል ችጛየጘ ክታስ ክታይ ተጨቃጭቅሽትርነ፤ ምላሰንድም ፊርደተድ ቢዘይል ኣልትኩ።

¹⁰ይፅንወ! ኣደረት ሽዝ ትንቪት ዊግትጛ ኣቕልዝ ሚከረ ለምረቍ ነቭያታንድ ተከ ኣጘጘ ቓልጥን።

¹¹ኣቕልዝ ፀናቐቍ እቅድዛት፦ «በርክሸቍ» ይነኵን፤ እየቭ ኣቕልደጘ፣ ኻትሸነይዝ ቈሽ እደረ ጝት በርከጘ ወሽርንኵርኑ፤ እንቅ እደረ ሳቝረው ርዅርዅ ኣቓንስቅ የጝ።

¹²ይፅንወ! እጝቂስቅ በዊል ቈሽ ሲማይዝም ኣነ ዝቨዝም ኣነ ላየ ፃረዝም ኣነ ውረውረዝቅ ፃርትርነ፤ ዊገድ ግን ፍርድድ ክታቕምትል ችጛየጘ ክታዊገድቅ እማን ኣቕሽ፦ «የይ» ኻሽት ኣሽ ቈሽ፦ «ኣየውም» ይጥን።

¹³ክታጊስ ሚከረ ለምረው ኣጅር ፅብሽ ፃልይነ፤ ዲስ የው እጅር ፅብሽ ቈሽ ዚምርነ።

¹⁴ነንም ክታጊስ ፅዊተው እጅር ፅብሽ ምከን ቃወጥድዛት[1] ጝጐ ጭጝነ፤ ጛይም ፅዊተው እጅርድ እደረት ሽዝ ዘይት እቓስጛ ፃልይጝነ።

¹⁵እነየው እምንትዙ ፀለውት ፅውዝጅነድ ቓዘው የጝ፤ እደረም ቓዝ ጒሰኵ፤ እድ እጅርድ ሰራሸው ኽጥያት ፅብሽም ሳቝረኵ።

¹⁶እደስለስ ቓድትርነ ማጥን ክታስ ክታይ ክታኽጥያቲስ ኒዝትጥን፤ ክታስ ክታይም ላውድ ላየይዝ ፃልይነ፤ ፃድቅ እጅርዙ ፀለውትድ ኻይሉ ኣቓንስቅ ኽየው ሰቭ ሰራሸው የጝ።

¹⁷ቓልጥን! ይልያስ ነቭይድ ይናጘ እጅር ዊኑ፤ ጘጝም ዝቨይል ስወ ሊቫየጘ ኪው ሸው ፃልዩ፤ እደረም ጝፀለውትድ ወሽ ሻቘምትዝመ ግቨርዝ ዝቨስ ስወ ጊቩ።

¹⁸እንደ ገነ ቈሽ ፃልዩ፤ ሲማይስም ስወ ሊቩ፤ ዝቨየንም ቢቈለ ቢቍልዝች።

¹⁹ይፅንወ! ክታጊስ ላው እጅር እማንተው ⶔደነይስ ቀር ፍሽ፣ ላውድ ቈሽ እድ እጅርድየንት እማንተው ጒደነይዝጐ ዊስሽ፣

²⁰እኒን እጅርድ እድ ቀረው እጅሪዝ ኒፍስሸንት ክርጘይስ ቓዘጘ፣ ሰራሸው ኽየው ኽጥያቲስም ስቝርት ችጝጠ ፃቨጘ ኣርቕነ።