Read xamtanga 1ቢጥሮስት እፃ 2 Bible Online

1ቢጥሮስት እፃ 2 - xamtanga bible

1ቢጥሮስት እፃ 2

¹ነስየ ጭቕትድየንትቅ፣ ኻጝሰነውድየንትቅ፣ ተክዘነውድየንት፣ ቅንየድየንት፣ እርየድየንትቅ እንዛትቅ እክልስጥን።

²ኣደረ ቀሰው ኣቐነውድ ጣምርናንስቅ ክታቓድቲዝ ሊግዝርናንስ ማጥን ነን እዅርሽቍ ድድሚዝጘ ንፅዅ መንፈሳዊ ፃቭድ በንጥን።

⁴እቅዝ ነቅሸው፣ እደረስ ግን ማርፅሽተው ኪብረውም ኣቐው ፅበው ቕርጘይዝጐ ኣልትርና፣

⁵ክትን ቈሽ እየሱስ ክርስቶስት ኣማካይነትዝ እደረት ዲስ ሸው መንፈሳዊ ምስዋይት ኣልስርናንስ ማጥን፣ ቅዱሳን ካኽነጣን ኣቕርናንስ፣ ርዅየ ጕይጥ ቕርጚዝጘ መንፈሳዊ ጝን ኣቕርናንስ ተሲትጥን።

⁶ምላሰንድም መፃፍዝ፦ «እንወ! ማርፅሽተው፣ ኪብረው፣ ማእዘንዙ ቕርጘ ፂወንትል እቝርጭር፤ ጝት ኣምነውድም ኣይቭታውም» ይሽት ፃፍሽትኩ።

⁷ነስየ ክትን ኣምንድርነቂዝ እን ቕርጘድ ኪብረው የጝ፤ ኣምናቊዝ ግን፦ «ግንበኝጥድ ነቅጝ ማልጝው ቕርጘድ፣ ጘጝ ማዘኒዙ ኣውር ኣቑ።»

⁸ቈሽም፦ «እንወ! እቅድ ፅጋሰው ቕርጘ፣ ፅጋሰው ፃፀም ኣቑ» ፅጋርጘውድም ቃሊዝ ኣዚታቍ ኣጛንስቅ የጝ፤ ምላሰንድም በውርስጝ እንዝ ሚድቭሸቍ ጛይ።

⁹ክትን ግን ጥመይስ ዲንቅሰው ጝብርኻኒዝጐ ጭጘው እደረቱ ኽየው ሰቭድየንት ኣውጅርናንስ ማጥን፣ ማርፅሽተው ዅለ፣ ንጕስዝ ካኽነጣን፣ ቅዱስ ኽዝቭ፣ ጝርስቲል ቲተው ኽዝቭ፣ እቕርንኵርኑ።

¹⁰በውገ እደረት ኽዝቭ ዊኒርነቅም፤ ነን ግን ጝኽዝቭ ኣቕርንኵርኑ፤ በውገ ስቝርት ቺጚርነቅም ዊንድርኑ፤ ነን ግን ስቝርት ችጝርንኵርኑ።

¹¹ይወደጃንወ! እን ኣልሚል ኣብን፣ ስድትኝጥም፣ ኣቕርናንስቅ ኒቭስት ተቃውምሸው ስየዙ ምርቕፀይስ እክልድርናንስ ማጥን ጨወኵን።

¹²ውርም እኳ ጭቓ ሰራሽርነቅ ፃቭጝ ክታት እሪጛንም፣ ፍርድዝ ተራንድ ክታቀሰው ሰቭድየንት ቓልጝ እደረት ኪብርዝጛንስ፣ ኣኽዛቫኒዝ በዊል ቀሰው ሰቭዝ ፅብጥን።

¹³ኣደረት ማጥን ይርን ስልጣን ጕጢዝቅ ቅምጭጥን፤ እጝቅዝቅ ኒየቱ ንጕሲዝም ኣነ፣

¹⁴ጭቓ ሰራሸቍድዛት ቐፃጥጘ፣ ቀሰው ፃቨቍድዛት ቈሽ ሚዝየንዝጥጘ ንጕስድ ይመቍ መኳንንታኒዝቅ ቅምጭጥን።

¹⁵ምላሰንድም ክትን ቀሰው ሰራሸነውዝ ጊነቱ ዊገ ዊግተቍ ኣርቕት እጀቍ ኻጘፃን እቅድዛት ዝም ሽርናንስ እደረት ፍቃድ የጝ።

¹⁶እደረት ኣገልጋያኒዝጘ ኣቕርን ኻርነይዝ ፅብጥን፤ ኣነጚ ክታኻርነይድየንት ጭቕት ሺፍነነ ፃቭትርነ።

¹⁷እጝቅትቅ ኪብርዝጥን፤ ዚንድዛት ቀንጥን፤ እደረት ጐውትጥን፤ ንጕስም ኪብርዝጥን።

¹⁸በር ክታትርነ! ቀሰቊዝመ ገርኻን ክታቅመቲዝ ጭቝ ኣይጝቀ ጭቒዝም ፍፅም ኪብርዘነውዝ ኣዚትጥን።

¹⁹እደረት ማጥን የው ግፍዝ ሚከረ ለምረው እጅር ሚዝየነ ችጘኵ።

²⁰ጭቓ ሰቭ ሰራሽርን ቕፃር ለምትርናን፣ ኣወየው ሚዝየነ ችጝትርና? ዊገድ ግን ቀሰው ሰቭ ሰራሽርን ሚከረ ለምትርናንድ ታግሽትርናን፣ እኒን እደረቲስ ክታጭስ ሚዝየነ ችጚስጡ።

²¹ጭጝሽርነውድም እንዝ ማጥን የጝ፤ ምላሰንድም ክርስቶስ ክታቍዝ ሚከረ ለምረውድ ጝፊልየድየንት ቲክንድርናንስ ተከ በርጠ የጝ።

²²«ጘጝ ኽጥያት ሰራሽየውም፤ ጝምቸይስም ተኰል ችጝሽየውም።»

²³ዛሽጛንድ ዊስ ዛሽየውም፤ ሚከረ ለምራንድ ጐውስውስየውም፤ ዊገድ ግን ፅድቅዝ ፊርደዊዝ ጝቕምት ዲቍስ ይወው።

²⁴ኽጥያቲስ ክርን ፅድቅዝ ፅብናንስ፣ ጘጝ ጝቕም ጝስየይዝ ይናኽጥያትድየንት ሚስቅሊል መውሩ፤ ጝልኻኒዝም ክትን ቓድርኑ።

²⁵ድዘቍ ቢቂዝጘ እንዝ ሚቅ ቅቭዝቭዝ ይርናⶖ ዊንድርኑ፤ ነን ግን ክታኒፍስዙ ምቓይዝመ ሊሚደተይዝጐ ዋጥርድርንኵርኑ።