Read xamtanga 1ቢጥሮስት እፃ 3 Bible Online

1ቢጥሮስት እፃ 3 - xamtanga bible

1ቢጥሮስት እፃ 3

¹እቍን ክታትርነ! ክትንም ክታግልቍዝ ቅምጭጥን፤ እደረት ቃሊዝ ኣዚታቍ ላው ላው ግልቍ ፅብጝሽ እኳ ዊግተነው በንዚጝቀ ጝታቍኒዙ ቀሰው ፅብጘይዝ ዊትርሽጝ ዋጥርጥጘ ቸልጥቍ።

²እንም ኣቐውድ ንፅኽነዝመ ኪብርዘነውዝ እቻቐው ክታፅብጘድየንት ቓልጛንድ የጝ።

³ክታውቨትድም ግልቭጭ ቈንሸነውዝ፣ ዊርቀዝ ገይፀነውዝ፣ ኪብረው ኣልቨ ሲርን እትልጥነ በነነውዝ ኣቒነ።

⁴ኽሽስ ክታውቨትድ እደረት በዊል ጝወየድ ጭቕጘ ኪብረው፣ ገርኽትዝመ ጨምተው መንፈስ ፃየው፣ ኣውንቅ ድዛው ኣቐይ ሰውነቲዙ ሚልክ ኣነ።

⁵ጝታቲስፈድ እደረትል ፃቨቍ በውገት ዚምንዝቍ ቅዱሳን እቍንድ ገይፅጘውድ እነይን ጝታግልቊዝ ቅምሸነውዝ ዊኑ።

⁶ሳረም እኒዝጘ ኣቭርኻምት፦ «ይኣደረወ» ይራⶖ ኣዚትረይ ዊንች፤ ክትንም ውረውረዝቅ ጐውቲንቀ ቀሰው ፃቭርንሽ፣ ጝርቝር የጝ።

⁷ግልቍ ክታትርነ! ክታቍኒጅቅ ኣስክሰነውዝ ፅብጥን፤ ክታጊስ ሽ ጛይ ዝላቐጥ ፍጥርታን ኣጛንስቅ፣ ክታጅቅም ርዅየዙ ፃገድየንት ላብጠ ዊርሰቍ ኣጛንስቅ ኪብርዝጥን፤ እነየው ኣቐውዝየ ክታፀለውቲዝ ፅጋ ኣቐው ዊገ ዊናውም።

⁸ኻትሸነይዝም ክትን እጝቅቅ ክታስ ክታይ ቲስመመነውዝ ፅብጥን፤ ላየ እጅሪዙ ሚከረድየንት ክታቕምቱ ፃቭርን እግዝጥን፤ ዚኒዝጘ ቀነቀንሽጥን፤ ደጋን፣ ትኽትነ ፃይርነቅም ኣጥን።

⁹ጭቓ ዊገድየንት ጭቕትዝ፣ ዊንም ዛንድየንት ዛንዝ ፊንተ ዊስትርነ፤ እንዝ ሽⶖ ጊቭርጥን፤ ምላሰንድም ክትን ጭጝሽርነውድ በረከት ዊርስርናንስ ማጥን የጝ።

¹⁰መፃፍ ያንትጘ፦ «ርዅየድየንት ቀነው፣ ቀሰቍ ግርቅድዛትም ቓልጠ በነውድቅ፣ ጝላቕድየንት ጭቕቲስ፣ ጝምቸድየንትም ተኰል ዊግተነዊስ ኪልክልነ።

¹¹ጭቕቲስ እክልድነ፤ ቀሰውድየንትም ፃቭነ፤ ዲግተድየንትም ደምዝነ፤ ቲክነም።

¹²ምላሰንድም ኣደረት እልጣንድ፦ ፃድቃንድዛት ቓልጘኵ፤ ጝቀርዝጣንድም ጝታፀለውትድ ወሽጥጘ ቢትጝኩⶖ፤ ኣደረት ቍጠድ ግን፦ ጭቃ ፃቨቊል የጝ።»

¹³ቀሰው ዊገ ፃቭትርነ በንርናን ክታት ጒድየውድ ኣው የጝ?

¹⁴ዊገድ ግን ፅድቅዝቊዝ እኳ ሚከረ ለምትርናን ቀቫሽርነቅ የጝ፦ «ጝታዘቸድ ጐውትርነ፤ ኻውክሽትርነም።»

¹⁵ክርስቶስት ኣደረ ፃቭርን ክታዘኒዝ ቀደስጥን፤ ክትን ፃይርነው ቲስፈይዝቍዝ ዋቕረቊዝቅ ዊሰ ይውርናንስ ማጥን ዊትርቅ ኣስልሽርነቅ ኣጥን፤ ዊገድ ግን እኒንትቅ ትኽትነዝመ ኪብርዘነውዝ ፃቭጥን።

¹⁶ክርስቶስትቍ ኣቕርናንስቅ ፃይርነው ቀሰው ኣምልድየንት ጭቓ ፃቭጝ ዊግተቍ እቅ ጝታእሪጘው ዊገይዝ ኣይቭትጛንስ ማጥን ቀሰው ኽሊነ ፃይርነቅ ኣጥን።

¹⁷ጭቕት ሰራሽን ሚከረ ለምረነዊስ ሽⶖ እደረት ፍቃድድ ኣቐውዝየ ቀሰው ሰራሽን ሚከረ ለምረነው ቺዘኵ።

¹⁸ክርስቶስ ቈሽ ይናት እደረ ትጐ ኣልስጠ፣ ጘጝ ፃድቅ ኣቕ ፅባⶖ ኣመፅኝጢዝቍዝ ሊን ኽጥያትዝ ምላሰንዝ ክርኩ፤ ክረውድም ስየዝ የጝ፤ መንፈስዝ ግን ፅበው ኣቑ።

¹⁹ጘጝ መንፈሲዝም ፊር ወኽኒ ጝኒል ዊነቍ ነፍሳኒዝ ሲቭኩ።

²⁰እንዛይ ነፍሳንድዛይ በውገ ነዅ ሚርክቭ ሰራሻ ዊነው ዚምኒዝ እደረ ኣቕልዝ ሊሚዳⶖ ዊነቍ እምቢተኝጥድ ጛይ፤ ሚርክቪል ጥውጝ ኣቚዝ ቓደቍድ ዊትቍ፣ የነትም ሰውጠ እቅ ጭቝ ጛይ።

²¹እን ኣቝድም ነን ክታት ቓዘው ጥምቅቲዝ ተከ የጝ፤ እኒን ጥምቅትድም ሰውነቲዙ እምቘድየንት ዊርሸነው ኣይጝቀ፣ ንፅዅ ኽሊነ ችጘናንስ ማጥን እደረስ ኣልተው ጨውን የጝ፤ ክታት ቓዘውድም እየሱስ ክርስቶስት ክርጘይስ ጐነይዝ ኣማካይነትዝ የጝ።

²²ጘጝም ሲመይ ፊር እደረት ለዊል እኩ፤ መላካን፣ ስልጣናን፣ ኻይላን እጝቅቅ ጝጭስ ቅምሽጘኵ።