Read xamtanga 1ቢጥሮስት እፃ 4 Bible Online

1ቢጥሮስት እፃ 4 - xamtanga bible

1ቢጥሮስት እፃ 4

¹ነስየ ክርስቶስ ጝስየይዝ ሚከረ ለምራንስቅ ክትንም እኒን ኻሰቭድ ጠውርመሰሪዝጘ ከምሽርነቅ ኣጥን፤ ምላሰንድም ጝስየይዝ ሚከረ ለምረው እጅር ኽጥያት ሰራሸነውድ በርኩ።

²ነስየይስቅም እዳቐው ጝፅብጘድ እደረት ፍቃድድ ፋፅመነውዝጚ ስየይዙ ምርቕፀይዝጘም ኣየው።

³ኣኽዛቫንድ ዊድጝ ፃቭጛንትጘ ሺኵነነውዝ፣ ስየይዙ ምርቕፀዝ፣ እራቐነውዝ፣ ቅጥ እጀው ዚቨነውዝ፣ ልክ እጀው ዝየነውዝ፣ ስኽፍሸው ጣወትዙ ኣምልኰዝ፣ ዲቍስርነው ዚምንድ ኣጥጘች።

⁴እኒንት ተከው ልክ እጀው ቃቭጠነውዝ ጛጅቅ ውጥያይርነቅ ኣቕርናንስቅ ዲንቅሽጛⶖ ዛሽጘኵ።

⁵ዊገድ ግን ጛይ ክረቊዝመ ርዅየዝ ፅበቊዝ ፊርድጠ ኣስልሸዊዝ ዊሰ ይውጥቍ።

⁶ኣውማው እጅሪዝጘ ጝታሲየይስ ፊርድሽጝ ጝታመንፈሲዝ ግን እደረት ፍቃዲዝጘ ፅብጛንስ፣ ወንጌል ክረቊዝ እኳ እዳቒጝቀ ሲቭክሸውድ እንዝ ማጥን የጝ።

⁷እጝቅ ዊገይዙ ኻትሸነድ ኣልትኩ፤ ኣቓንስቅም ፃልየነው ቸልድርናንስ ማጥን ነቃቐው ኣይምረው ፃይርነቅ፣ ክታቕምትም ቅምርነቅ፣ ኣጥን።

⁸ፍቅር ንቕፀው ኽጥያትድየንት ሽፍነው ኣቓንስቅ እጝቂስቅ ዲቍስርን ክታስ ክታይ ቐናቕርን ቀነቀንሽጥን።

⁹ክታስ ክታይ ጋፅ ጨቂጝቀ ኣቭንወ ለምረለምርሽትጥን።

¹⁰ቲተቲተው እደረት ፃገይዝ ኣምንሽትርነቅ ኣገልጋያን ኣቕርናንስቅ ክታጊስ ኣውማውድቅ ጝጭስ ይውሽተው ፃገይዝ ላየድየንት ኣግልግልነ።

¹¹ክታጊስ ኣውማው ክንሰው ፅብሽ፣ ጘጝ ክንሰውድ እደረት ቃል ኣቐጘ ኻስቫ ክንስነ፤ ኣግልግለውም ፅብሽ፣ እደረ ይወው ኻይሊዝ ኣግልግልነ፤ እንም ኣቐውድ እደረ እየሱስ ክርስቶስት ኣማካይነቲዝ ኪብራንስ የጝ፤ ጝጭስ ክቭርዝመ ኻይልዝ ዘላልም ኣለም ኣነ፤ ኣሚን።

¹²ይወደጃንወ! ልየይዝጘ ፊትነው ሚከረ ለምትርናንድ ኣቭን ዊገ ችጘጘ ፃቭርን ዲንቅሽትርነ።

¹³ዊገድ ግን ክርስቶስት ክቭርድ ጋልፅሽታንድ ጭቕጘ ዲስ ይርናንስ ማጥን ጝሚከረይስ ኣድልሽርነቅ ኣቕርናንስቅ ዲስ ይጥን።

¹⁴ክርስቶስት ሽⶖዝቍዝ ዛሽሽርናን ክቭርዙ መንፈስ ኣቐው እደረት መንፈስድ ክታግል ጨው ኣቓንስቅ ቀቫሽርነቅ የጝ።

¹⁵ክታጊስ ኣውማውድቅ ኒቭስ ቍወው፣ ዊንም ቓፅጘ፣ ዊንም ወንጀልኘ፣ ዊንም ቀብራ ገቪል ጥወው ኣቕ ሚከረ ለምሪነ።

¹⁶ክርስቲያን ኣቓንስቅ ሚከረ ችጛንድ ግን እን ሽⶔዝ ማጥን እደረት ሚዝየንዝነጚ ኣይቭቲነ።

¹⁷ፍርድ እደረት ጝኒስ ጕ ኪርመው ግርየድ ችጝኩ፤ ነስየ ፍርድድ ኪርመውድ ይናጊስ ኣቐውዝየ እደረት ወንጌልዝ ኣዚታቍ እቂዝ ጝታኻትሸነድ ወረጘ ኣጡ ኣጢ?

¹⁸ነስየ፦ «ፃድቅ ቓደውድ ጭጝቅዝ ኣቐውዝየ፣ ኣመፀኘይዝመ ኽጥያትኘይዝ ኣወይጡ ኣጢ?»

¹⁹እንዝ ማጥን እደረት ፍቃዲዝጘ ሚከረ ለምረቍድቅ ቀሰው ኣቐው ዊገድየንት ፃቭጋ ጝታኒቭስሸንት ኣምንሽተው ፈጣሪስ ኽድር ይውጝነ።