Read xamtanga 1ቢጥሮስት እፃ 5 Bible Online

1ቢጥሮስት እፃ 5 - xamtanga bible

1ቢጥሮስት እፃ 5

¹ነስየ ጝታጅቅ ሽሚር ኣቐር፣ ክርስቶስት ሚከረይዝም ሚዝር ኣቐር፣ እኒዝጘም ተረው ክቭሪስም ኣድልጨር ኣቐር ያን፣ ክታማኽሊል ፅበቍ ሽመቅልድዛት ማኽረኵን።

²ክታጭስ ኽድር ነይሽተው እደረት መጝገድ ሊሚድጥን፤ ሊሚድርነውድም ግድዝ ኣይጝቀ እደረ ክታጊስ በነዊዝጘ ጝውድየተዝ፣ ጊንዝቭ ማርቕፀነውዝ ኣቒጝቀ ኣግልግልትርነ ፃይርነው በኒዝ፣ ኣነ።

³እኒዝጘም ክታጭስ ኽድርዝ ነይሽተው እደረት መጝገይዝ ቀሰው ተከ ኣቐነውዝጚ ኻይልዝ ቅምትርነ።

⁴እኒንት ፃቭርንሽ ምቒዝ ኻልቀድ ጋልፅሽታንት ኰር ድዛው ክቭርዙ ኣክሊል ለምርትርንቅ።

⁵እኒዝጘም ውርጋጥ ክታትርነ! ሽመቅሊዝ ቅምጭጥን፤ ክታእጝቅም ላውድ ላየድየንት ኪብርዘነውዝ ትኽትነ ሲትጥን፤ ምላሰንድም፦ «እደረ ትእቪተኝጥድ ተቃውምሸኵ፤ ትኽትነ ፃየቊዝ ግን ፃገድየንት ይወኵ።»

⁶እንዝ ማጥን ጘጝ ዊስነው ግርየይዝ ንየስ ሻንስ እደረት ኻይሉ ናኒዝ ሳይል ክታቕምት ዝጥቅ ሽጥን።

⁷ጘጝ ክታጭስ ኻስቨው ኣቓንስቅ ክታት ጨጝቅዘውድየንትቅ ጝግስ ማልጥን።

⁸ክታቕምት ቅምርነቅ ኣጥን፤ ነቃጥንም፤ ምላሰንድም ክታፃለት ዳቪለውስ ስⶖረነው በን ቕድረው ኣብዘይዝጘ ጅልወኵ።

⁹ኣልሚልቅ ፅበቍ ክታፅንድም እኒን ሚከረድየንት ለምረቍ ኣጘጘ ኣርቕርን፣ እምንትዝ ፀናቕርን ጝት ተቃውምሽጥን።

¹⁰ክርስቶስት ኣማካይነትዝ ዘላለምቱ ጝክቭሪዝጐ ጭጘው ፃገዝቅ ኣምላክ ዊቱ ግርየ ሚከረ ለምትርነት ግረ ጘጝ ጝቕም ፍፅማን፣ በርታቕርነቅ፣ ፀናቕርን ችብትርነቅ፣ ፃቭጡ።

¹¹ኻይልዝመ ክቭርዝ ዘላልም ኣልም ጝጭስ ኣነ፤ ኣሚን።

¹²ኣምንሽተው ዚነይዝጘ ፃቭ እግዘው ስልዋኑስት[1] ኣማካይነትዝ እኝቸን እጅጝ እፃሸንት ክታጭስ ፃፍኩን፤ ፃፈውድም ክታት ማኽርጨ፣ እኒን እማንተው እደረት ፃገ ኣቐነውድም ሚዝርድጨ የጝ፤ እኒን ፃገይዝም ፀናቕርን ችብትጥን።

¹³ክታጅቅ ማርፅሽትረይ፥ ባቪሎን ፅብረይ ምከንሸን ዲግተ ኣልሰች፤ እኒዝጘም ይዅር ማርቈስም ዲግተ ኣልሰኵ።

¹⁴መንፈሳዊ ፍቅርዝ እምቘ እምቝተነውዝ ክታስ ክታይ ድምቅሽጥን። ክርስቶስትቍ ኣቕርነቂዝቅ ዲግተ ኣነ።