Read xamtanga 2ቢጥሮስት እፃ 1 Bible Online

2ቢጥሮስት እፃ 1 - xamtanga bible

2ቢጥሮስት እፃ 1

¹እየሱስ ክርስቶስት ኣገልጋይ ኻወርየም ኣቐር ስሙን ቢጥሮስቲስ፦ ይናኣምላክ ይናቓዘተም ኣቐው እየሱስ ክርስቶስት ፅድቂዝ ኣመካይነትዝ ይናእምንቲዝጘ ኪብረው እምንት ለምረቊዝ እፃሽተው እፃ።

²እደረስመ ይናኣደረ እየሱስስ ኣርቐነውዝ ፃገዝመ ዲግተዝ ክታጭስ ንቕፅነ።

³በገዘ ጝክቭሪዝመ ጝደግነቲዝ ይናት ጭጘውድየንት ኣርቐነውዝ ጝመለኰቲዙ ኻይልድየን ርዅየዝመ እደረት ጐውተነውዝ በንዘውድየንትቅ ይናጭስ ነይኩ።

⁴እንዛዝ ኣመካይነትዝም ጭቕጘ ኽየው፣ ኪብረውም ኣቐው ቲስፈ ይናጭስ ነይኩ፤ እንም እኒን ቲስፈይዝ ኣመካይነትዝ ጭቓ ምርቕፀይዝ ምላሰንዝ ኣልሚል ፅበው ጨክሸው ፅበጘይስ ኣምልጥርን መለኰቲዙ ባኽርዪስ ኣድልሽርናንስ ማጥን የጝ።

⁵እንዝ ምላሰንዝ ጭቕጘ ቲግይርና ክታእምንቲል ደግነት ቈሽጥን፤ ደግነቲል ኣርቕት ቈሽጥን፤

⁶ኣርቕቲል ጛቕምት ቅመነው ቈሽጥን፤ ጛቕምት ቅመነዊል ፀናቐነው ቈሽጥን፤ ፀናቐነዊል እደረት ኣምልከነው ቈሽጥን፤

⁷እደረት ኣምልከነዊል ዚኒዝጘ ቀንሸነው ቈሽጥን፤ ዚኒዝጘ ቀንሸነዊል ፍቅር ቈሽጥን።

⁸እንዛይ ክታጭስ ንቕፀዝ ፅብጛን ይናኣደረ እየሱስ ክርስቶስት ኣርቐነዊዙ ውላይዝ ጊነትቍ፣ ፍርም እጅርነቅ ኣቓይርነጘ ሊሚድጥቍ።

⁹እንዛት እጀው እጅርድ ግን እክሊዝውድ ቓላው ኻርቨ የጝ፤ በውገቱ ጝኽጥያቲስም ዊር የነውድ ሚርኩ።

¹⁰እንዝ ማጥን ይፅንወ! ክታጭጝቲዝመ ማርፅሽትኒዝ ፀናዝትርነ ማጥን በውገትዊስ ዲቍስርን ቲጊጥን፤ እኒንትቅ ፃቭርነውዝየ ስሪስቅ ፅጋራይርነቅም።

¹¹እንዝም ይናኣደረ፣ ይናቓዘተም ኣቐው እየሱስ ክርስቶስት ዘላልምዙ ምጝግስቲል ጥወነው ምሉ መቭት ችጝትርንቅ።

¹²እንዝ ማጥን ውርም እኳ እንዛት ኣርቕርነቅ ኣቕርናንም፣ ፃይርነው እማኒዝም ፀናቕርነቅ ኣቕርናንም፣ ዊትርቅ እንዛይ ዊቅድዛት ክታጭስ ኻስቭዘነውድ ቸለል የቅም።

¹³እን ዝቨይል ይርዅየዝ ፅባ ክታት ኻስቭዘነውድ ይጭስ ጥውሸው ተክ እትለኵ።

¹⁴ምላሰንድም ይናኣደረ እየሱስ ክርስቶስ ይጭስ ጋልፀጘ ቃዝየዝ እን ኣልሚስ ቲጥ ፊጨጘ ኣርቐኵን።

¹⁵ያን ኣልሚስ ቲጠት ግረም እንዛት ዊትርቅ ኻስቭርናንስ ነን ቲግየኵን።

¹⁶ይናኣደረ እየሱስ ክርስቶስት ኻይሊዝመ ጝተረነይዝቍዝ ክታጭስ ድቍነውድ ጝግርመድየንት ይናእልጣኒዝ ቓልን የጝጚ፣ እቀ ብልኻትዝ ፋጥርሸው ሲነድየንት ቲክንንም ኣየው።

¹⁷ምላሰንድም፦ «ያን ጝቍዝ ዲስ የው ይቀነው ይዅርድየን እኒን የጝ» የው ቃል ጝግርመይዙ ክቭሪስ ጝጭስ ተራንድ እደረ ኣይርቲስ ክቭርዝመ ግርመዝ ለምርኩ።

¹⁸እኒን ቃልድየንትም ጝጅቅ ቅዱስ ኣበይል ፅብና ሲመይስ ተራንድ ይናቕም ወሽንኵኑን።

¹⁹እደስለስ ትንቪትዙ ቃልድ እማን ኣቐጘ ይናጭስ ጭቕጘ ደደደድትሽኩ፤ ኻርድ ቅሽጢስቅ፣ ቅሸን ቢየድም ክታእዘኒል ፍጢስቅ ኣሽ ጥመል ኣቭርኸው መቭራትድ ስታየጘ ጣጝቅቅሸው እጅሪዝጘ ክትንም እኒን ቃሊዝ ጣጝቅቅሽርነቅ ኣርንሽ፣ ቀሰው ፃቭርነኵ የነት የጝ።

²⁰እጝቂስቅ በውገ እኒንት ኣርቕጥን፦ ቅዱስ መፃፍል ፅበው ትንቪትዙ ቃልድየንትቅ ኣውማው እጅር ጝት ሸጘቅ ቲርጕምጠ ቸላውም።

²¹ምላሰንድም ትንቪት እደረቲስ እፃሸቍ ቅዱሳን እቅ መንፈስ ቅዱስዝ ቃውሽጝ ዊግትጚ ስሪስቅ እቀ ፍቃድዝም ተሪየው።