Read xamtanga 2ቢጥሮስት እፃ 2 Bible Online

2ቢጥሮስት እፃ 2 - xamtanga bible

2ቢጥሮስት እፃ 2

¹ዊገድ ግን በውገ ኻሽወጥ ነቭያታን ኽዝቪዝ ማኽሊል ዊንጘጘ፣ ክታማኽሊልም ኻሽወጥ ክንሰጥ ጕጥቍ፤ ጛይም ጛት ኻርነይ ፊሰው ኣደረት እኳ ከድጝ ድዘር ቲክንዘው፣ ቀርሰው፣ ክንድጝ ስውርዝ ድውጥቍ፤ እንዝም ጝታቕምትል ድጝገትኘ ድዘር ነስጥቍ።

²ንቕፀቍም እን ኒውርሰው ጝታሰቭድየንት ቲክንጥቍ፤ ጝታቍዝም እማንተው ጒደነድ ዛሽሽጡ።

³እንዛይ ኻሽወጥ ክንሰጥድ ጊንዝቭ ችጝጥጘ ማርቕፅጛ ጝታቕም ፋጥርጘው ታሪክድ ዊግተነውዝ ክታት ቢዝብዝጥቍ፤ ጝታፍርድድ ኽፅምስ ኪርም ጛጭስ ኣስልሸው የጝ፤ ጝታድዘርድም ደያውም።

⁴እደረ ኽጥያት ሰራሸቍ መላካኒዝ ኣርኽርኺጝቀ ግኻነመሳትል ማል ጥመዙ ቢል ኣቕጝ ጝታፍርድድየንት ኣርውድጥጘ ፃቭኩ።

⁵እኒዝጘም ፅድቅ ኣውጀው ነዅት ላጥ ላጝጠ እቅ ጅቅ ፃቭ ቓዝ፣ ኽፅምቱ ኣልሚዝ ኣርኽርኺጝቀ ኽጥያትኝጥ እቂል ድሰው ኣቘድየንት ጊምዝኩ።

⁶ቈሽም ኽጥያት ሰራሸቊዝቅ ተከ ኣጛንስ ማጥን፣ ሰደውምስመ ጐመረስት ኻትምጥድዛት ፃብር ኣጥጚስቅ ልየዝ ዀሰነውዝ ፊርድኩ።

⁷ኣመፅኝጢዙ ኣይቭሰው ጝታሰቪዝ ሲቅሻ ፅበው ፃድቅ ለውጥት ግን ቓዝኩ።

⁸እኒን ፃድቅ እጅርድ ጝታማኽሊል ፅባንድ ግሪ ጨቨቅ ቓለዊዝመ ወሸው ኣመፂዙ ጝታሰቪዝ ጝፃድቅ ኒፍስሸን ጨጝቅሽራ ዊንች።

⁹ነስየ እንቅ እነየው ኣቐውዝየ ኣደረ እማንተውዝ ጝት ኣምልክጛ ፅበቍድዛት ፊተነይስ ኣወሽ ፊስጠጘ፣ ኣመፅኝጥድዛት ቲተዝም ጝታኽጥያትኘ ባኽሪዙ ርኵስ ምርቕፀድየንት ቲክነቍድዛት፣ እደረት ስልጣንድየንት ነቀቍድዛትም ቐፃቓ ፍርድ ግርየይል ኣሽ ኣወሽ ጐይስ ሊሚደው ኣቐጘ ኣርቐኵ የነት የጝ፤ እንዛይ እቅድ ዲፋራን ትቪትኝጥም ኣጛንስቅ ሲመይትቍ ስልጣን ጒጥድዛት ዛሽጛንድ ጐውታቍም።

¹¹ዊገድ ግን መላካንድ እኳ ኻይልዝመ ብርታትዝ ጛጊስ ዲቈቍ ኣቕጝ ፅብጛ ኣደረት በዊል ጝታት ዛንዙ ክስ ዊግታቍም።

¹²እንዛይ እቅድ ግን ውረውረቅ ኣርቓይጘው ዊገይል ጥውጛ ዛሽጘኵ፤ ጛይ ፃውርሸናንስመ ክረናንስ እዅርሸቍ፣ ደመ ነፍስዝ ፃጘቍ፣ ኣይምረውም እጀቍ ኣረዊተን ጛይ፤ ኣረዊተኒዝጘም ፍፅምዝ ድዝጥቍ።

¹³ጝታኣመፂዝ ጥውሸው ወየድየንትም ለምርጥቍ፤ ኰረ ዳኺረይዝ ኒውርሰው ሰቭ ሰራሽጛንድ ዲስተ ፃቭጝ እግዝጘኵ፤ እነየቍ ኣቕጝ ፅብጛ ክታጅቅ ተጋቭዝሽጛንድ[1] ኒውርሰቍ እርኵሳንም ጛይ።

¹⁴ጝታኻሰቭድ ሽርሙጥነ የጝ፤ ኽጥያት ሰራሸነው ቀቫቍም፤ እምንትዝ ፀናቒየቍድዛት ኽጥያት ሰራሽጛንስ ማጥን ትክቭክቭጘኵ፤ ሲቭርቭረነው ክንደው ጊዙ ፃየቍ እፂተቍ ጛይ።

¹⁵ጭቅ የው ጒደነድየንት በርጝ ኣመፂዙ ወየድ ቀነው ቢወርት ዅር በለኣምት ጒደነድየንት ቲክንጝ ቀርጝኵ።

¹⁶በለኣም ግን ጝኽጥያቲዝቍዝ ዊቅሽትኩ፤ ዊግተነው ቸላው ድዃረ እቀ ቋቈዝ ዊግት ጘጝ ነቭዪይዝ ጕቝርንድየንት ኣግዱ።

¹⁷እንዛይ እቅድ ኣቝ እጀቍ ምኝጫኒዝጘ፣ ኣውለንፋስዝ ሸምሸቍ ድምኒዝጘ ጛይ፤ ግስም የው ጥመ ጛት ኣርውደኵ።

¹⁸ጊነትቍ ትቪትዝቍ ዊቅ ዊግትጛ ቀተዝ ፅበቍ እቂዝ ማኽሊስ ገነ ነን ኣምልጥጝ ተረቍ እቅድዛት ኽጥያት ሰራሽጛንስ ማጥን ስየዙ ሰሰኘ ምርቕፀዝ ትክቭክቭጘኵ።

¹⁹እንዛይ እቅድ፦ «ኻርነይ ፍትርንቅ» ይጛ ቲስፈ ይውጘኵ፤ ዊገድ ግን ጛይ ጝታቕም ኽጥያትዝ በር ጛይ፤ ምላሰንድም እጅር ላው ዊገዝ ኻሻንድ ጘጝ ኻሸው ዊገይዝ በረ የጝ።

²⁰ይናኣደረ፣ ይናቓዘተም ኣቐው እየሱስ ክርስቶስት ኣርቐነውዝ ኣልሚዙ እርኵስቲስ ኣምልጥጘት ግረ እንደ ገነ ጘጝ እርኵስቲዝ ፃይሽጝ ኻሽጘውዝየ ጝታኣቕንድ በውገትዊስ ሽ እግርገትውድ ወሰው ኣጡ።

²¹ፅድቅዙ ጒደነድየንት ኣርቕጘት ግረ ጛጭስ ይውሽተው ቅዱስ ትዛዚስ እግርገ ዋጥርጛንት ሽ በውገይስቅ ፅድቅዙ ጒደነድየንት ኣርቒጝቀ እደጛን ቺዝጠ ዊኑ።

²²«ግዝጝ ጝላቕተድየንት ዅጠ ዋጥረኵ» እኒዝጘም፦ «እቓረው ኣሰመ ዊስ ጭቀይል ብጥለኵ» ይሽተው ተከድ ጛግል ችጙ።