Read xamtanga 2ቢጥሮስት እፃ 3 Bible Online

2ቢጥሮስት እፃ 3 - xamtanga bible

2ቢጥሮስት እፃ 3

¹ወደጃንወ! እኒን ፃፈው እፃድ ሊጘትረድ የጝ። ሊጘድቅ ፃፈውድ ጭቅ የው ኣስተሳሰቭ ፃይርናንስ ማጥን ኻስቭዝጨ የር የጝ።

²እንዝ ሚቅ ቅዱሳን ነቭያታኒዝ ድቍሽተው ቃልድየንት፣ እኒዝጘም ክታኻዋርያታኒዝ ኣመካይነትዝ ክታጭስ ነይሽተው ይናኣደረይዝመ ይናቓዘተይዝዙ ትዛዝድየንት ትዝ ይትርነ በነኵን።

³እጝቂስቅ በውገ፣ ኻትሸነይዙ ዚምኒዝ ጝታቕምቱ ጭቓ ምርቕፀድየንት ቲክነቍ ፈዘኝጥ እቅ ተዘቫቭትሽጛ ተርጥጘጘ ኣርቕጥን።

⁴ጛይም፦ «ጝተረነይዝቍዝ ድቍሽተው ቲስፈይዙ ቃልድ ኣውል እኩ? ኽፅምትቍ ኣቅልድ ክርጘት ኪርም እጝቅ ዊገድቅ በውገ ኣልም ፋጥርሻንድ ኪርም ዊነጘ የጝ ፅበውድ» ይጥቍ።

⁵ዊገድ ግን እንዛይ እቅድ ሲመይስመ ዝቨዝ ኽፅምስ ኪርምጝ እደረት ቃልዝ ፋጥርሽጝ ፅብጘጘ፣ ዝቨም ኣቘይስ ኣቘ ማኽሊልም ተሲትረጘ ፅብጝ ኣርቕጛ ኻዲጘኵ።

⁶እኒን ኣቘይዝ ኣይንድ ዊነው ኣልምድ ስርሽ ድዙ።

⁷ነን ፅበቍ ሲመይዝመ ዝቨይዝ ግን ኽጥያትኝጥድ ድዝጘው ፍርድ ግርየይል ኣሽ ልየዝ ድዝጥጘ፣ ጘጝ ቃሊዝ ሊሚድሽጝኵ።

⁸ወደጃንወ! ኣደረስ ላው ግርየድ ሽኽ ምቲዝጘ፣ ሽኽ ምትም ላው ግርየይዝጘ ኣቐጘ እኒንት ላው ዊገ ሚርትርነ።

⁹ላው ላው እቂዝ ደየው ተካንትጘ ኣደረ ጝቲስፈዙ ቃልድየንት ፋፅመነውድ ደያውም፤ ዊገድ ግን ኣውማውቅ ድዛየጘ በን እጝቅቅ ንስኻል በቃጥጘ ማጥን ክታቍዝ ታግሽተኵ።

¹⁰ኣቕሽም ኣደረት ግርየድ ቓፅጘይዝጘ ድጝግት ተርጡ፤ ኣይንድ ሲመይ ኻይሉ ድመዝ ድዝጡ፤ ሲመይቱ ፍጥርትድም ልየዝ ቃጥልሽ ድዝጡ፤ ዝቨስመ ጝርዲጊል ፀበዊዝም እጝቅ ልየዝ ቃጥልሽጡ።

¹¹ነስየ እንቅ እጝቅ እነይ ድዘው ኣቐውዝየ፣ ክትን ኣወይርነቅ እቅ ኣትርነ የጝ ጥውሸውድ? ቅድስነዝመ እደረት ጐተነውዝ ፅብትርነ ጥውሸኵ።

¹²ቈሽም እደረት ግርየድየንት በንዝ ኣርውድርና ቃዝየዝ ተራንስ ማጥን ደርስትርነ ጥውሸኵ፤ ኣይንድ ሲመይ ልየዝ ቃጥልሽ ድዝጡ፤ ሲመይቱ ፍጥርትድም ኻይሉ ትኵሳትዝ ቃልጡ።

¹³ይን ግን ፅድቅ ችጝሸው ኣይር ሲመይዝመ ኣይር ዝቨዝ ጝቲስፈይዙ ቃሊዝ ሚስርትዝ ኣርውድነኵን።

¹⁴እንዝ ማጥን ወደጃንወ! እንቅ ኣቐው ግርየርየድንት ኣርውድርነቅ ኣቕርናንስቅ፣ ኒውርዝመ ነቐፈዝ እጅርነቅ፣ ጝጅቅም ዲግተ ፃይርነቅ ኣቕርን ችጝሽርናንስ ማጥን ቲጊጥን።

¹⁵ይናኣደረት ኣቕልድ ክታጭስ ቓደነ ኣቐነውድ ኻስቭጥን፤ ቀንሸው ይናዝን ባውሎስም እደረ ጝጭስ ይወው ጥቨቪዝጘ እኒንት ክታጭስ ፃፍኩ።

¹⁶ጘጝ እን ዊገይዝቍዝ ጝእፃይዝቍ መፃፋኒዝቅ እኒዝጘ የጝ ፃፈውድ፤ ጝእፃይዝቍ መፃፋኒል ላው ላው ተረድሸናንስ ቺግርዝቍ ዊቅ እኵ፤ ኣርቕት እጀቍ ፅናትም እጀቍ ላው ላው እቅ ላጥ መፃፋንድዛት ጣምዝጘጘ እንዛትም ጣምዝጘኵ፤ እኒንት ፃቨነውዝም በገዘ ጝታቕምትል ድዘር ነስጘኵ።

¹⁷እንዝ ማጥን ወደጃንወ! እኒንት በውርስርን ኣርቕርናንስቅ ፀናቕርን ችብትርነው ሚስርቲስ ኣመፅኝጢዙ ቀተይዝ ዊትርሽርን ሊቫይርነጘ ጣጝቅቅጭጥን።

¹⁸ዊገድ ግን ይናኣደረ ይናቓዘተም ኣቐው እየሱስ ክርስቶስት ፃገዝመ ኣርቕትዝ ሊግዝጥን፤ ጝጭስ ንጭም ዘላልምም ክቭር ኣነ፤ ኣሚን።