Read xamtanga 1ይዃንስት እፃ 1 Bible Online

1ይዃንስት እፃ 1 - xamtanga bible

1ይዃንስት እፃ 1

¹ርዅየዙ ቃሊዝቍዝ በውገይስ ዊነውድየንት፣ ወሽነውድየንት፣ ይናእልጣኒዝም ቓልነውድየንት፣ ኣስክሰነውድየንት፣ ይናናንጣንድም ዳቕጘውድየንት ኣውጅነኵን።

²ርዅየድም ጋልፅሽቱ፤ ይንም ቓልንኵኑን፤ ጝጭስም ሚዝርድነኵን፤ ኣይር ጅቅ ዊነውድየንት፣ ይናጭስም ጋልፅሽተው ዘላልሚዙ ርዅየድየንት ክታጭስ ኣውጅነኵን።

³ክትንም ይናጅቅ ላው ኽቭር ፃይርነቅ ኣቕርናንስ ማጥን ቓልነዊዝመ ወሽነዊዝ ክታጭስ ኣውጅነኵን፤ ይናኽቭርድም ኣይር ጅቅ ጝዅር እየሱስ ክርስቶስ ጅቅም የጝ።

⁴ይናዲስተድም[1] ፍፅም ኣቓንስ ማጥን እኒንት ክታጭስ ፃፍነኵን።

⁵ጝጊስ ወሽነውድ፣ ክታጭስም ድቍነው እፃድ፦ «እደረ ብርኻን የጝ፤ ጥመም ጝግል እጀውም» የው የጝ።

⁶ጥመዝ ዋጥርጥርናⶖ፦ «ጝጅቅ ኽቭር ፃይንኵኑን» ይናን፣ ኻሹነኵን፤ እማንትም ፃቫይነቅም።

⁷ዊገድ ግን ጘጝ ብርኻንዝ ፅበጘ ይንም ብርኻንዝ ዋጥርጥርናን ይናስ ይናይ ኽቭር ፃይንኵኑን፤ ጝዅር እየሱስ ክርስቶስት ብርድም እጝቅ ኽጥያቲስቅ ይናት ዊርሽጡ።

⁸ኽጥያት እጅነቅም ይናን ግን ይናቕምት ኻጝስነኵን፤ እማንም ይናግል እጀውም።

⁹ይናኽጥያትድየንት እደረስ ነዚትናን፣ ይናኽጥያትድ ይቅር ይጠ ኣመፅይስቅም ዊርሽጠ ኣምንሽተው ፃድቅ የጝ።

¹⁰ኽጥያት ሰራሺነቅም ይናን ግን ጝት ኻሽወረ ፃቭነኵን፤ ጝቃልድም ይናግል እጀውም።