Read xamtanga 1ይዃንስት እፃ 2 Bible Online

1ይዃንስት እፃ 2 - xamtanga bible

1ይዃንስት እፃ 2

¹ይቝርወ! እኒንት ክታጭስ ፃፈውድ ኽጥያት ሰራሻይርነጘ የር የጝ፤ ኣውማውቅ ኽጥያት ሰራሽሽ ግን ኣይርትል ጠቨቀ ፃይንኵኑን፤ ጘጝም ፃድቅ ኣቐው እየሱስ ክርስቶስ የጝ።

²ጘጝም ይናኽጥያትድ ዲምስሰኵ፤ ዲምስሰውድም ይናኽጥያትድ ጭቝ ኣይጝቀ ኣልሚዙ ኽጥያትድየንትቅ የጝ።

³ጝትዛዛንድዛት ሊሚድናን፣ ጝት ኣርቕነቅ ኣነጘ እንዝ ኣርቕነኵን።

⁴«እደረት ኣርቐኵን» ያⶖ ጝትዛዝድ ሊሚዳው እጅር ፅብሽ ግን፣ ጘጝ ኻሽወረ የጝ፤ እማንም ጝግል እጀውም።

⁵ዊገድ ግን ኣውማው እጅር እደረት ቃልድ ሊሚዳን፣ እማንዝ እደረት ፍቅርድ ጝዝ ፍፅም ኣቐኵ፤ እደረትውዝ ፅብነቅ ኣነጘ ኣርቕነውድ እንዝ የጝ።

⁶ኣውማው እደረትውዝ ፅበኵን የው እጅርድቅ እየሱስ ፅበጘ ጘጝም ፅብጠ ጥውሸኵ።

⁷ይፅንወ! እኒን ፃፈው እፃድ በውገ ኪርም ክታጅቅ ዊነው ትዛዝ የጝጚ ኣይር ትዛዝም ኣየው፤ እኒን በውገቱ ትዛዝድም ወሽርነው ቃልድ የጝ።

⁸ላየ ጋቢዝ ቈሽ ክታጭስ ፃፈውድ፣ ክርስቶስት ርዅየይዝ፣ ክታርዅየይዝም እማን ኣቕ ጋልፅሽተው ኣይር ትዛዝድ የጝ፤ ምላሰንድም ጥመድ ዲቋⶖ እማንተው ብርኻንድ ኣቭርኻⶖ ኣቓንስቅ የጝ።

⁹ብርኻንዝ ፅበኵን ያⶖ ጝዝንድየንት ሽክተውድቅ ገነ ጥመይል የጝ ፅበውድ።

¹⁰ጝዝንት ቀነውድቅ ብርኻኒል ፅበኵ፤ ምላሰንድም ጝት ፅጋሰው ዊገ እጀውም።

¹¹ዊገድ ግን ጝዝንት ቀናው እጅር፣ ጥመ ኣቒል ፅበኵ፤ ጥመይዝም ዋጥርጥረኵ፤ ጥመድም ጝት ኻርቭዛንስቅ ኣውል ፊርጠጘ ኣርቓውም።

¹²እፈርወ! ክታኽጥያትድ ጝሽⶔዝቍዝ ይቅር ይሽታንስቅ ክታጭስ ፃፈኵን።

¹³ኣቅልወ! በውገ ዊነውድየንት ኣርቕርናንስቅ ክታጭስም ፃፈኵን፤ ውርጋጥወ! ጭቓድየንት ኻቕርናንስቅ ክታጭስም ፃፈኵን፤ እፈርወ! ኣይርት ኣርቕርናንስቅ ክታጭስ ፃፈኵን።

¹⁴ኣቅልወ! በውገ ዊነውድየንት ኣርቕርናንስቅ ክታጭስ ፃፈኵን፤ ውርጋጥወ! ጠጝካራን ኣቕርናንስቅ፣ እደረት ቃልድም ክታግል ፅባንስቅ፣ ጭቓድም ኻቕርናንስቅ፣ ክታጭስ ፃፈኵን።

¹⁵ኣልምድ ዊንም ኣልሚል ፅበው ዊገድየንትቅ ቀንትርነ፤ ኣውማው ኣልምድ ቀነው እጅር፣ ኣይርት ፍቅር ጝግል እጀውም።

¹⁶ምላሰንድም ኣልሚል ፅበውድቅ፣ ስየዙ ምርቕፀ፣ እልዙ በን፣ ፅብጘዙ ምክኸድቅ እጝቅ ኣልሚስጚ ኣይርቲስ ተረውም ኣየው።

¹⁷ኣልሚዝመ ጝምርቕፀይዝ ዲቍጘኵ፤ እደረት ፍቃድድ ፋፅመው እጅር ግን ዘላልም ፅበኵ።

¹⁸ይቝርወ! እኒን ኻትሸነይዙ ሰት የጝ፤ ወሽርነጘም ክርስቶስት ፃለትድ ተርጡ፤ ነን እኳን ንቕፀቍ ክርስቶስት ፃለታን ተርጝኵⶖ፤ ኻትሸነይዙ ሰት ኣቐጘ ኣርቕነውድም እንዝ የጝ።

¹⁹ይናማኽሊስ ፍጝኵⶖ፤ ኣነጚ ይናዊግንም ዊንየቍ፤ ይናዊግን ኣጛንመ ይናጅቅ ፀናቕጝ ችብርጥጘ ዊንⶖ፤ ዊገድ ግን እጝቅቅ ይናዊግን ኣየቍ ኣጘጘ ኣረስጛንስ ይናጊስ ቲትⶖ።

²⁰ክትን ግን ጝቅዱስ ቅቫቲስ እቓትርንኵርኑ፤ ኣቓንስቅም ክትን እጝቅ እማንድየንት ኣርቕርነኵ።

²¹ያን ክታጭስ ፃፈውድ እማንድየንት ኣርቓይርነቅ ኣቕርናንስቅም ኣየው፤ ዊገድ ግን እማንድየንት ኣርቕርናንስቅ እማንቲስም ውርቅ ኻሽት ፋው ኣቓንስቅ የጝ።

²²«ክርስቶስ ኣየውም» የው እየሱስት ኻድየዊዝለ ኻሽወረድ ኣው የጝ? እኒን ኣይርስመ ዅርስ ኻድየው ክርስቶስት ፃለትድ የጝ።

²³ዅርት ኻድየው እጝቅ ኣይርት እጀውም፤ ዅርት ኣምነውድቅ ኣይርትም ፃይኩ።

²⁴በውገ ወሽርነውድ ክታግል ፅብነ፤ በውገ ወሽርነውድ ክታግል ኣቐውዝየ፣ ክትን ዅርጅቅ፣ ኣይርጅቅም ፅብትርንቅ።

²⁵እኒን ጘጝ ነየው ቲስፈድየን ዘላልሚዙ ርዅየ የጝ።

²⁶ክታት ቀሰቍ እቂዝ እኒንት ፃፍኩን።

²⁷ክርስቶስቲስ ለምትርነው ቅቫትድ ክታጅቅ ኣቓንስቅ ላየ ክንሰተ በንዛውም፤ ዊገድ ግን እማንጚ ኻሽት ኣየው ጝቅባትድ እጝቅ ዊገድየንትቅ ክታጭስ ክንሰው ኣቐጘ፣ ጘጝ ክንሰውድም እማንጚ ኻሽት ኣየው ኣቐጘ፣ ክታት ክንሰጘ ጝዝ ፅብጥን።

²⁸ነስየ ይቝርወ! ጘጝ ጋልፅሽታንድ ድፍርት ችጝናንስ ማጥን፣ ተረው ግርየይዝም ጝበዊል ኣይቭታይነጘ ጝዝ ፅብጥን።

²⁹ጘጝ ፃድቅ ኣቐጘ ኣርቕርነውዝየ፣ ፅድቅድየንት ፃቨው እጝቅ እደረቲስ እዅርሸጘ ኣርቕርነኵ።