Read xamtanga 1ይዃንስት እፃ 3 Bible Online

1ይዃንስት እፃ 3 - xamtanga bible

1ይዃንስት እፃ 3

¹እደረት ቝር ይሽትን ጭጝሽናንስ ማጥን ኣይር ኣወየው ፍቅር ቐናዝ ይናጭስ ነየጘ ቓልጥን፤ እርግጥም ይን ጝቝር የጝ፤ ኣልምድ ግን እደረት ኣርቕየው ኣቓንስቅ ይናትም ኣርቓውም።

²ይወደጃንወ! ይን ነን እደረት ቝር የጝ፤ እግረ ወረጘ ኣንቅ ኣነጘ ገነ ጋልፅሽቲየውም፤ ዊገድ ግን ክርስቶስ ጋልፅሽታንድ እማንተው ጝሚልክድ ቓልንቅ ኣናንስቅ፣ ጝት ተክነቅ ኣነጘ ኣርቕንቅ።

³ክርስቶስት ቲስፈ ፃቨውድቅ ክርስቶስ ንፅዅ ኣቐጘ ጘጝም ጝቕምት ንፅዅ ፃቨኵ።

⁴ኽጥያት ሰራሸነውድ እደረት ኽግ ፋዘነው ኣቓንስቅ፣ ኽጥያት ሰራሸው እጅርድቅ እደረት ኽግድየንት ፋዘኵ።

⁵ክርስቶስ እቀ ኽጥያትድ ዲምስስጠ ጋልፅሽተጘ ኣርቕርነኵን፤ ጝግልም ኽጥያት እጀውም።

⁶እንዝ ማጥን ክርስቶስትውዝ ፅበው እጅርድቅ ኽጥያት ሰራሻውም፤ ኽጥያት ሰራሸው እጅር ግን ክርስቶስት ቓሊየውም፤ ዊንም ኣርቒየውም።

⁷ይቝርወ! ኣውማውቅ ቀሳየጘ ጣጝቅቅጭጥን፤ ክርስቶስ ፃድቅ ኣቐጘ፣ ፅድቅ ሰራሸውድቅ ፃድቅ የጝ።

⁸ኽጥያት ሰራሸውድቅ ዳቪለውስቲስ የጝ፤ ምላሰንድም ዳቪለውስ በውገ ኪርም ኽጥያት ሰራሸው የጝ፤ እደረት ዅር ጋልፅሽተውድም፣ ዳቪለውስት ሰቭድየንት ፋዝጠ የጝ።

⁹እደረቲስ እዅርሸውድቅ ኽጥያት ሰራሻውም፤ እደረት ዚረድ ጝግል ኣቓንስቅ፣ እደረቲስም እኵርሻንስቅ ኽጥያት ሰራሽጠ ቸላውም።

¹⁰እደረት ቝሪዝመ ዳቪለውስት ቝሪዝ ኣረስጘውድ እንዝ የጝ፦ ፅድቅ ሰራሻው፣ ጝዝንትም ቀናው፣ እጅርድቅ እደረት ዅርም ኣየው።

¹¹በውገ ወሽርነይ፦ «ይናስ ይናይ ቀነቀንሽነ ጥውሸኵ» ይረይ እፃሸን እኝቸን ጚ።

¹²ጭቓዙ ዊግነ ኣቕ ጝዝንት ቍወው ቃየልትጘ ኣትርነ፤ ውር ማጥን የጝ ቍወውድ? ምላሰነድም ጝሰቭድ ጭቓ፣ ጝዝንት ሰቭድ ግን ፅድቅ ዊናንስቅ የጝ።

¹³ይፅንወ! ኣልም ክታት ሽክታን ዲንቅሽትርነ።

¹⁴ይን ይናፅንድዛት ቀነቅ ኣናንስቅ፣ ክርጘይስ ርዅየዝጐ ከርነጘ ኣርቕነኵን፤ ፍቅር እጀውድቅ ክርጘዝ ፅበኵ።

¹⁵ጝዝንት ሽክተውድቅ ኒቭስ ቍወተ የጝ፤ ኒቭስ ቍወውም ዘላልምዙ ርዅየ እጀው ኣቐጘ ኣርቕርነኵ።

¹⁶እየሱስ ክርስቶስ ጝርዅየድ ይናቺ ዲቍስ ነያንስቅ፣ ፍቅር ወረጘ ኣቐጘ እንዝ ኣርቕነኵን፤ ይንም ይናፅኒዝ ቺ ይናርዅየድየንት ዲቍስን ይውነ ጥውሸኵ።

¹⁷ኣውማው እጅር ኻፍት ፃይ ፅባ ጝዝንድ ቺግርሻንድ ቓል ኣርኽርኺየውዝየ፣ እደረት ፍቅርድ ኣወይ የጝ ጝግል ኣቐውድ?

¹⁸ይቝርወ! ይናፍቅርድ እማንዝመ ሰቭዝ ጋልፅሽተው ኣነጚ፣ ቃልዝ ዊንም ዊገዝ ጭቝ ኣቒነ።

¹⁹ይን እማንት ዊግን ኣነጘ እንዝ ኣርቕነኵን፤ ይናእዘንድም ጝበዊል ፈውስነኵን።

²⁰እንም ይናእዘንድ ይናቕምትል ፊርደው ዊገይዝቅ የጝ። እደረ ይናዘኒስቅ ሽ ኽየው ኣቓንስቅ እጝቅ ዊገድየንትቅ ኣርቐኵ።

²¹ይወደጃንወ! ይናእዘንድ ይናት ፊርዳው ኣቐውዝየ፣ እደረት በዊል ድፍርት ፃይነቅ የጝ።

²²ጝትዛዛንድዛት ሊሚድነቅ፣ ጝት ዲስ ሸውድየንትም ፃቭነቅ ኣናንስቅ፣ ጨውነውድየንትቅ ጝጊስ ለምርነኵን።

²³ጝትዛዝድም ጝዅር እየሱስ ክርስቶስት ኣምናንስ፣ ጘጝ ኣዘጘም ይናስ ይናይ ቀነቀንሽናንስ የጝ።

²⁴ጝትዛዛንድዛት ሊሚደቍድም እጝቅ ጝዝ ፅብጥቍ፤ ጘጝም ጛግል ፅብጡ፤ እደረ ይናግል ፅበጘ ኣርቕነውድ ጘጝ ነየው መንፈሲዝ የጝ።