Read xamtanga 1ይዃንስት እፃ 4 Bible Online

1ይዃንስት እፃ 4 - xamtanga bible

1ይዃንስት እፃ 4

¹ይወደጃንወ! መንፈስድቅ ኣምንትርነ፤ ዊገድ ግን መንፈሳንድ እደረቲስ ኣቐነውድ ሚርምርጥን፤ ንቕፀቍ ኻሽወጥ ነቪያታን ኣልሚዝጐ ፍጝኵⶖ።

²እደረት መንፈስድየንት እንዝ ኣርቕትርንቅ፦ እየሱስ ክርስቶስ ስየዝ ጋልፅሽተጘ ለምረው መንፈስድቅ እደረቲስ የጝ።

³እየሱስት ለምራው መንፈስ ግን እደረቲስም ኣየው፤ ተርጠጘድ ወሽርነው ክርስቶስት ተቃውምሸው መንፈስድ እኒን የጝ፤ ነንም እኳ ኣልሚል እኩ።

⁴ይቝርወ! ክትን እደረትቍ የጝ፤ ኻሽወጥ ነቪያታንድዛትም ኻቕርንኵርኑ፤ ምላሰንድም ክታግል ፅበውድ ኣልሚል ፅበዊስ ዲቈኵ።

⁵ጛይ ኣልሚስ ጛይ፤ እንዝ ማጥን ዊግትጘውድም ኣልሚዝጘ የጝ፤ ኣልምድም ጛት ወሸኵ።

⁶ይን እደረቲስ የጝ፤ እደረት ኣርቐውድቅ ይናት ወሸኵ፤ እደረቲስ ኣየውድ ግን ይናት ወሻውም፤ እንዝም እማንተው መንፈሲዝመ ኻሽትዙ መንፈሲዝ ኣርቕነኵን።

⁷ይወደጃንወ! ፍቅር እድረቲስ ኣቓንስቅ ይናስ ይናይ ቀነቀንሽትነ፤ ፍቅር ፃየውድቅ እደረቲስ እዂርሸው የጝ፤ እደረትም ኣርቐኵ።

⁸ፍቅር እጀውድ እደረት ኣርቓውም፤ ምላሰንድም እደረ ፍቅር የጝ።

⁹እደረ ጝፍቅርድ ይናጭስ ጋልፀውድ እነየውዝ የጝ፦ ይን ጝኣማካይነትዝ ርዅየዝ ፅብናንስ ማጥን እደረ ላው ጝዅርድየንት ኣልሚል እፃቑ።

¹⁰ፍቅር እኒን የጝ፤ ይን እደረት ቀነጘ ኣዪጝቀ ጘጝ ይናት ቀነጘ፣ ይናኽጥያትድየንትም ዲምስስጠ ማጥን ጝዅርት እፃቐጘ፣ የጝ።

¹¹ይወደጃንወ! እደረ ይናት እነሽ ቀነውዝየ፣ ይንም ይናስ ይናይ ቀነቀንሽትነ ጥውሸኵ።

¹²እደረት ቓለው ኣውማውም እጀው፤ ይናስ ይናይ ቀነቀንሽትናን ግን እደረ ይናጅቅ ፅብጡ፤ ጝፍቅርድም ይናግል ፍፅም ኣጡ።

¹³ጘጝ ጝመንፈስድ ነያንስቅ፣ ጝጅቅ ፅብነጘ፣ ጘጝም ይናጅቅ ፅበው ኣቐጘ ኣርቕነኵን።

¹⁴ኣይር ጝዅርት ኣልሚዝ ቓዘተ ፃቭ እፃቐጘ ቓልንኵኑን፤ ሚዝርድነኵንም።

¹⁵እየሱስ እደረት ዅር ኣቐጘ ኣምን ሚዝርደዊዝቅ እደረ ጝጅቅ ፅብጡ፤ ጘጝም እደረ ጅቅ ፅብጡ።

¹⁶እንዝ ማጥንም እደረ ይናግል ፃየው ፍቅርድ ኣርቕነኵን፤ ጝፍቅሪዝም ኣምነኵን፤ እደረ ፍቅር የጝ፤ ፍቅርዝ ፅበውድቅ እደረ ጅቅ ፅብጡ፤ እደረም ጝጅቅ ፅብጡ።

¹⁷እን ኣልሚስ ጝት ተክነኵን፤ ፍርዲዙ ግርየዝ ድፍርት ችጝናንስ ማጥን ፍቅር እንዝ ኣይንትዝ ይናማኽሊል ፍፅም ኣቕኩ።

¹⁸ፍቅርዝ ጐውት እጀውም፣ ፍፅም ፍቅር ጐውትድየንት ፊስ ማለኵ፤ ጐውት ቕፃርጅቅ ፃየፃይሽተው ኣቓንስቅ፣ ጐውተው እጅር ጝፍቅርድ ፍፅምም ኣየው።

¹⁹ጘጝ በውርስ ይናት ቀናንስቅ ይንም ጝት ቀነኵን።

²⁰ኣውማውቅ፦ «እደረት ቀነኵን» ያⶖ ጝዝንድየንት ሽክታን፣ ጘጝ ኻሽወረ የጝ፤ ጝጋቢል ፅበው ጝዝንድየንት ቀናውድ፣ ቓሊየው እደረት ቀንጠ ቸላውም።

²¹ጘጝም፦ «እደረት ቀነውድቅ ጝዝንድየንት ቀንጠ ጥውሸኵ» የው ትዛዝ ይናጭስ ነይኩ።