Read xamtanga 1ይዃንስት እፃ 5 Bible Online

1ይዃንስት እፃ 5 - xamtanga bible

1ይዃንስት እፃ 5

¹እየሱስ ጘጝ ክርስቶስ ኣቐጘ ኣምነውድቅ እደረቲስ እዅርሽኩ፤ ኣይርድየንት ቀነውድቅ ዅርድየንትም እኒዝጘ ቀነኵ።

²ይን እደረት ቀናንድ ጝትዛዛንድም ፋፅምናንድ፣ እደረት ቍርት ቀነቅ ኣነጘ እንዝ ኣርቕነኵን።

³እደረት ቀነነውድ ጝትዛዛንድዛት ፋፅመነው የጝ፤ ጝትዛዛንድም ፅጐወቍም ኣየቍ።

⁴ምላሰንድም እደረቲስ እዅርሸውድቅ ኣልምድየንት ኻቐኵ፤ ኣልምድየንት ኻቐውድም ይናእምንትድ የጝ።

⁵እየሱስ እደረት ዅር ኣቐጘ ኣምነው እጅሪዝለ ኣው የጝ ኣልምድየንት ኻቐውድ?

⁶ኣቝዝ ብርዝም ተረውድ እኒን እየሱስ ክርስቶስ የጝ፤ ጘጝ ኣቚዝ ብርዝምጚ ኣቝዝ ጭቝ ተርየውም፤ ሚዝርደውድም መንፈስ የጝ፤ መንፈስም እማን የጝ።

⁷እንዝ ማጥንም ሻቘ ሚዝረጫን እኵⶖ።

⁸ጛይም መንፈስ፣ ኣቚ፣ ብር፣ ጛይ፤ ሻቘድም ቲስመምጘኵ።

⁹እቀ ሚዝርነይድ ለምርነውዝየ፣ እደረት ሚዝርነድ እቀ ሚዝርነይስ ዲቈኵ፤ ምላሰንድም እደረ ጝዅርትቍዝ ሚዝርደው ሚዝርነይድ እኒን የጝ፦

¹⁰እደረት ዅርት ኣምነውድቅ ጝኒቭሲዝ ሚዝር ፃይኩ፤ ኣውማው እደረት ኣምናውድቅ እደረ ጝዅርት ማጥን ይወው ሚዝርነይድየንት ኣምኒየው ኣቓንስቅ እደረት ኻሽወረ ፃቭኩ።

¹¹ጝሚዝርነይድም እኒን የጝ፦ እደረ ይናጭስ ዘላልምዙ ርዅየ ነዩ፤ እኒን ርዅየድም ፅበውድ ጝዅርትል የጝ።

¹²እደረት ዅርት ፃየውድ ርዅየ ፃይኩ፤ እደረት ዅርት እጀውድ ግን ርዅየ እጀውም።

¹³እደረት ዅርት ሽዝ ኣምንድርነቅድቅ እጝቅ ዘላልምዙ ርዅየ ፃይርነቅ ኣቕርነጘ ኣርቕርናስ ማጥን እኒንት ክታጭስ ፃፈኵን።

¹⁴እደረት በዊል ኣልተናንስ ፃይነው ድፍርትድ እኒን የጝ፤ ኣውማው ዊገድቅ ጝፍቃዲዝጘ ጨውናን ጘጝ ወሽጡ።

¹⁵ጨውነውድየንትቅ ወሸው ኣቐጘ ኣርቕነውዝየ፣ ጨውነው ዊገድየንትም ለምርነጘ ኣርቕነኵን።

¹⁶ኣውማው እጅር ጝዝንድ ክርጘል ችጝዛው ኽጥያት ሰራሻንድ ቓልሽ፣ ፃልይነ፤ እደረም ክርጘል ችጝዛው ኽጥያት ሰራሸቍዝ ርዅየ ይውጡ፤ ክርጘል ችጝዘው ኽጥያት እኩ፤ እንዝ ግን ፃልይነ የቅም።

¹⁷ኣመፅ እጝቅ ኽጥያት የጝ፤ ክርጘል ችጝዛው ኽጥያትም እኩ።

¹⁸እደረቲስ እዅርሸውድቅ ኽጥያት ሰራሻው ኣቐጘ፣ ዊገድ ግን እደረት ዅር ሊሚደው ኣቐጘ፣ ጭቓም ጝት ዳቓው ኣቐጘ ኣርቕነኵን።

¹⁹ይን እደረቲስ ኣነጘ፣ እጝቅ ኣልምድ ግን ምሉዝ ጭቓይዝ ቅምሸው ኣቐጘ ኣርቕነኵን።

²⁰እደረት ዅር ተረጘ፣ እማንተው ኣቐው ጝት ኣርቕናንስ ማጥንም ኣስክሰነው እዘን ነየጘ፣ ኣርቕነኵን፤ ይንም እማንተው ኣቐው ጝዅር እየሱስ ክርስቶስትውዝ እኵኑን፤ ጘጝም እማንተው ኣምላክ ዘላልምዙ ርዅየም የጝ።

²¹ይቝርወ! ክታቕምት ጣወት ኣምልከነዊስ ሊሚድጥን።