Read xamtanga ይዅዳት እፃ 1 Bible Online

ይዅዳት እፃ 1 - xamtanga bible

ይዅዳት እፃ 1

¹ያን እየሱስ ክርስቶስት ኣገልጋይ ኣቐር ያይቈቭት ዝን ይዅዳቲስ፣ ጭጝሸቍ፣ እደረ ኣይርስ ቀንሽተቍ፣ እየሱስ ክርስቶስስም ሊሚድሸቍ እጝቅዝቅ እፃሽተው እፃ።

²ስቝርት፣ ዲግተ፣ ፍቅር ክታጭስ ንቕፅነ።

³ይወደጃንወ! ላብጠ ኣቕን ኣድልሽነው ይናቓድቲዝቍዝ ፃፍጨ ጭቕጘ በን ዊኑን፤ ዊገድ ግን ቅዱሳኒዝ ሊን ይውሽተው ኻይማነውቲዝቍዝ ቲግልሽርናስ ማጥን ማኽረነውዝ ፃፍጨ ግድ ኣቑ።

⁴እክሰው ግርየይስ በውገ እኒን ፍርዲዝ ፃፍሸቍ ላው ላው እቅ ጭልቕጝ ክታጐ ጥውጝኵ፤ እንዛይ እቅድ እደረት ጐውታቍም፤ ይናኣምላክት ፃገድየንት ሲስንደነውዝ ተገን ፃቭጘኵ፤ ጘጝ ጝቕም ጭቝ ይናት ቅመው፣ ይናኣደረም ኣቐው እየሱስ ክርስቶስት ኻዲጘኵ።

⁵ውርም እኳ እኒንትቅ እንዝ በውግ ክታቕም ኣርቕርነቅ ኣርንሽም፣ እደረ ጝኽዝብድ ኣወሽ ግቭፅ ኻግሪስ ፊሰጘ፣ እግረ ግን ኣምነቅ የቍድዛት ኣወሽ ድሰጘ፣ ክታጭስ ኣጅስጨ በነኵን።

⁶እኒዝጘም ጝታስልጣኒዙ መርግድየንት ሊሚደቅ ይጝ ጝታስፍረድንት በረቍ መላካንድዛት ዘላልምስ እፁሽጝ ኽየው ፍርድዙ ግርየይል ኣሽ ጥመ ውድቅቲል ጐይጥጘ ፃቭኩ።

⁷ላየ ቈሽ ሰደውምስመ ጐመረስ፣ ጝታጅልወይል ዊነቍ ኻትምጥድም ሲስንደነውዝ ጝታተፈጥረዊዙ ስረትዝ ኣየው ሽርሙጥነ ፋፅም፤ ኣቓንስቅም ጛይ ዘላልምዙ ልየዝ ዀሽትጛ ፅበቊዝ ተከ ኣቕ።

⁸እንዛይ እቅድም ጝታኒቪዝ ቃውሽጛ ጝታሰውነትድየንት ኣርክስጘኵ፤ እደረት ስልጣንድየንት ተቃውምሽጘኵ፤ ስልጣን ፃየቍድዛትም ዛሽጘኵ።

⁹መላካኒዝ ኻልቀ ምካይል እኳ ሙሴት እርሸይዝቍዝ ዳቪሎስ ጅቅ ተከራክርሻንድ፦ «እደረ ጋስፅናክት!» ዩጚ ላየ ዛንዙ ፍርድዝ ዊግትጠ ዲፍሪየውም።

¹⁰እንዛይ እቅድ ግን ኣርቓይጘቍድዛትቅ ዛሽጘኵ፤ ኣይምረው እጀቍ እንሰሲዝጘ ደመ ነፍስዝ ኣርቕጘዊዝቅ ድዝጘኵ።

¹¹እን እቂዝ ወየው! ቃየልት ጒደነይዝ ፊርጝኵ፤ ጊዝንዝብዝቍዝ ሲግቭግቭሽጛ በላምት ቀተይዝ ሊቭጝኵ፤ ቈርየ ተቃውምሸጘ ጛይም ተቃውምሸነውዝ ድዝጝኵ።

¹²እንዛይ እቅድ ክታፍቅርዙ ተጋቭዝሸተነዊል ኣይቭቲጝቀ ክታጅቅ ላብጠ ጐይጛንድ ኒውርሰቍ ጛይ፤ ጛይ ኻሊጘውድ ጝታቕምስ ጭቝ የጝ፤ እን እቅድ ፊግየዝ ሸምሸቍ ስወ እጀቍ ድምኒዝጘ ጛይ፤ ማፅወ ግርየይዝ እኳ ፍር ፃያቍ ጝታስሪስ ኒቅልሽጝ ሊን ክረቍ ዘፋኒዝጘ ጛይ።

¹³ጝታኒውርዙ ገፍረድየንት ብፅቕንደቍ፣ ባኽሪዙ ቈጣሸው ማይበልድ ተከቍ ጛይ፤ ጥመ ውድቅትድየንት ሊመደቍ ከርታታን ፅግልውጢዝጘ ጛይ።

¹⁴ኣዳምቲስ ኪርም ላጝጠትረ ዚረ ኣቐው ኺነኵ እንዛይ እቂዝቍዝ እንት የው ትንቪት ዊግትኩ፦ «እንወ ኣደረ ጝእልፍ ኣይላፋን ቅዱሳኒጅቅ ተርጡ።

¹⁵ተረውድም እጅርልቅ ፊርድጠ፣ ኣመፅኝጢዝመ ኽጥያትኝጥ እቂዝዛትቅ ጝታጭቕቲዙ ሰቪዝቍዝመ እደረትል ዊግትጘው ዛንዙ ዊገይዝቍዝቅ ዊቅስጠ የጝ»

¹⁶እንዛይ እቅድዛይ ዊትርቅ ኣጕርምርመቍ ጛይ፤ ጝታምቸድ ትእቪትዙ ዊገዝ እቻቐው የጝ፤ ኣጥጘች የነው ኣርቓቍም፤ ጝታኣርወዝ ማጥን ይጝ ላጥ እቅድዛት ኣምጕስጘኵ።

¹⁷ክትን ግን ይወደጃንወ! ይናኣደረ እየሱስ ክርተውስት ኻወርየታንድዛይ እንዝ በውገ ዊግትጘው ቃልድየት ኣጅጥን።

¹⁸ጛይ «ኻትሸነይዙ ዚምኒዝ ጝታርኵስ ምርቕፀድየንት ቲክነቍ ዘቨትኝጥ እቅ ትርጥቍ» ይጝ ዊግትጝኵ።

¹⁹እንዛይ እቅድ ክታማኽሊል ቲዘ ቲዘው ዊገ ነሰቍ፣ ደመ ነፍስዝ ፃጘቍ፣ መንፈስ ቅዱስ እጀቍ፣ ጛይ።

²⁰ክትን ግን ይወደጃንወ! እጝቂስቅ ኒየ ክታቀድስሸተው እምንቲዝ ክታርዅየድየንት ኻንፅጥን፤ መንፈስ ቅዱስዝም ፃልይጥን።

²¹ዘላልምቱ ርዅየይል ችጝዘው ይናኣደረ እየሱስ ክርስቶስት ስቝርትድየንት ሊሚድርና፣ እደረት ፍቅርዝ ክታቕምት ሊሚድጥን።

²²ተጠራጥርሸቍ እቂዝ ርኽርኽነ ፃቭጥን።

²³ላው ላውድ ልየይስ ናጥቅርን ፊስጥን፤ ላጢዝ ቈሽ ኽጥያትዝ ኣርክሽተው ጝታሰውነቲዙ ኣልቨድየንት እኳ ሽክትርና ጐውትዝ ጛጭስ ርኽርኽነ ፃብጥን።

²⁴ሊባይርነጘ ሊምድጠ፣ ነቐፈም ችጚጝቀ ዲስተዝ ጝክቭሪዝ በዊል ክታት ኣልስጠ ቸለው፣

²⁵ጘጝ ጭቝ ይናቓዘተ ኣቐው ኣምላክስ፣ ይናኣደረ እየሱስ ክርስቶስት ኣማካይነትዝ ዚምናኒዝ በውገ፣ ነንም ዘላልምም ኣሽ፣ ክብር፣ ግርመ፣ ኻይል፣ ስልጣን፣ ኣነ፤ ኣሚን።