Read xamtanga ይዃንስት እትለ 1 Bible Online

ይዃንስት እትለ 1 - xamtanga bible

ይዃንስት እትለ 1

¹እኒን እትለድ በውዝ ኣጡ ዊገድየንት ጝኣገልጋያኒዝ ቓሊሳንስ ማጥን እደረ እየሱስ ክርስቶስስ ይወው እትለ የጝ፤ እየሱስ ክርስቶስም ጝመላክድየንት እፃቕ ጝኣገልጋይ ይዃንስስ ጋልፁ።

²ይዃንስም እደረት ቃሊዝቍዝመ እየሱስ ክርስቶስት ሚዝርነይዝቍዝ ቓለውድየንትቅ እማንዝ ሚዝርዱ።

³ዚምንድ ችጝኩ፤ ነስየ እኒን ትንቪቲዙ ቃልድየንት ኣንቭቨውድ ቀቫሸው የጝ፤ እኒዝጘም ጝት ወሸቊዝመ ጝኣቒል ፅበው ቃልድየንት ሊሚደቊዝ ቀቫሸቍ ጛይ።

⁴ይዃንስቲስ፦ እስየ ችጝሸቍ ላጝጠ ምከንጣኒዝ እፃሽተው ዲግተ፤ ፅበው፣ ዊነው፣ ተርጡ፣ እደረቲስ፣ ጝዙፋኒዝ በዊል ፅበቍ ላጝጠ መንፈሳኒስም እኒዝጘም ኣምንሽተው ሚዝር፣ ክርጘይስ ጐነውዝ ባር፣ ዝቨይዝቍ ንጕሳኒዝም ቅመተ ኣቐው እየሱስ ክርስቶስቲስ ፃገዝመ ዲግተዝ ክታጭስ ኣነ። ይናት ቀነው፣ ይናኽጥያቲስም ጝብሪዝ ኻርነይ ፊሰው፣

⁶ጝኣምላክ ጚርም ኣቐው እደረት ኣግልግልነ ማጥንም ይናት ካኽነጣነ ምጝግስት ፃቨው፣ እየሱስ ክርስቶስስ ክቭርዝመ ኻይልዝ ዘላልም ኣልም ኣሽ ኣነ፤ ኣሚን።

⁷እንወ ድምነዝ ተርጡ፤ ጝት ኣጭነዝ ሲቨቍድ እኳ እዳቒጝቀ እጝቅ እጅርድቅ ጝት ቓልጡ፤ ዝቨይዙ ኽዝቭድቅ እጝቅ ጝት ቓላንድ ዋይ ዋይ ያ ሊዝጡ፤ እንቅ እጝቅቅ ኣጡ፤ ኣሚን።

⁸«ፅበው፣ ዊነው፣ ተርጡ፣ እጝቅትቅ ቅመው ኣደረ ኣምላክ ኣልፈይዝመ ወሚገይዝ ያን የጝ»[1] የኵ።

⁹ያን ክታዝን ይዃንስ ክታጅቅ ላብጠ እየሱስ ክርስቶስቱ ሚከረይዝመ ጝምጝግስቲዝ ጝኣቕሊዝም ክታጅቅ ላብጠ ኣድልጨር ኣቐር፣ እደረት ቃሊዝቍዝመ እየሱስ ክርስቶስት ሚዝርነይዝቍዝ ፍጥመው የነይ ደስየትየንትል እፁጭ ዊኑን።

¹⁰ኣደረት ግርየይዝ መንፈስዝ ሚስጥጭ ዊኑን፤ ይእግርገይስም መለከትዙ ድመ ተከው ኽየው ድመ ወጩን።

¹¹ድመድም ይት፦ «ነን ቓልደውድየንት መፃፍዝ ፃፍር እፊሰውን፣ ሰምርነስ፣ ቢርጋሙን፣ ትያጥሩን፣ ሰርዲስ፣ ፍላድልፍየ፣ ለዱቅየ፣ እንዛይ ላጝጠ ምከንጣኒል እፃቕ» ዩ።

¹²ያንም ይት ዊግተው ድመድየንት ቓልጨ እግርገ ብሩ ዩን፤ ብሩ ያንድም ላጝጠ ዊርቀዝቍ መቅረዛን ቓሉን።

¹³መቅረዛኒዝ ማኽሊልም እጅር ዅር ተከው ቓሉን፤ ጘጝም ጝሊኲል ኣሽ ችጘው ኣልቨ ሲረው፣ ጝይውድየንትም ዊርቀዙ ቅናትዝ ከምረው ዊኑ።

¹⁴ጝኣውሪዝመ ጝኣውሪዙ ፅቭቀይዝም ፃረው ቢገዙ ፅቭቀዝመ ኣዝ ተከቍ ፃረቍ ዊን፤ ጝእልጣንድም ልየ ለቕላቐድ ተከቍ ዊን።

¹⁵ጝልኵጣንድም ኽየው ልጂዙ ኻኽመዝ ብረው ብረት ተከቍ ዊን፤ ጝድመድም ኽየው ዊርቨዙ ገፍ ድመድ ተከው ዊኑ።

¹⁶ጝለወ ናኒዝም ላጝጠ ፅግልውጥ ፃይ ዊኑ፤ ጝምቸይስም ሊጘይዝቅ ቀቨው ስላትም ሰይፍ ፋ ዊኑ፤ ጝጋፅድም ጭቕጘ ኣቭርኸው ኰረይዝጘ ዊኑ።

¹⁷ያንም ጝት ቓላንድ ክረው እጅሪዝጘ ኣቕ ጝበዊል ሊቩን፤ ጘጝም ጝለወ ናንድ ይዲጊል ፃቭ እንት ዩ፦ «ጐውተ! ኪርመነይዝመ ኻትሸነይዝ ያን የጝ።

¹⁸ያን ፅበር የጝ፤ ክጥ ዊኑን፤ እንወ ነን ግን ዘላልም ኣልም ኣሽ ፅበር የጝ፤ ክርጘዙ ቝልፊዝመ ሲወልቱ ቝልፍዝም ፃቅኩን።

¹⁹ነስየ ቓልደውድየንት፣ ነን ፅበውድየንት፣ ነስየይስቅ ኣጡድየንትቅ ፃፍ።

²⁰ይለወ ናኒል ቓልደቍ ላጝጠ ፅግልውጢዝመ ላጝጠ ዊርቀዝቍ መቅራዛኒዝዙ ምስጢርድየንት ድቍጭር፤ ላጝጠ ፅግልውጥድ፣ ላጝጠ ምከንጣኒዝቍ መላካንድ ጛይ፤ ለጝጠ መቅረዛንድ ቈሽ ላጝጠ ምከንጣንድ ጛይ።»