Read xamtanga ይዃንስት እትለ 10 Bible Online

ይዃንስት እትለ 10 - xamtanga bible

ይዃንስት እትለ 10

¹እንዝ ግረ ላየ ኻይሉ መላክ ድምነ ሲር ሲመይስ ጊማንድ ቓሉን፤ ጝኣውሪዝ ንየይልም ቀስተ ደመነ ዊኑ፤ ጝጋፅድ ኰረ ተከው፣ ጝልኵጣንድም ልየዙ ዲቭየ ዊን።

²ጝናኒዝም ቢትረይ መልወ ጥቅልል ማፃፍት ፃይ ዊኑ፤ ጘጝም ጝፃግቭ ልኵድ ባኽሪል፣ ጝለወ ልኵድ ቈሽ ዝቨይል ፃቩ።

³ቕድረው ኣብዘይዝጘም ጝድመድ ኣጕስ ሸው ቓፁ፤ ቓፃንድም ላጝጠ ነጐድጓዳኒዝቍ ድማንድ ዊግት።

⁴ላጝጠ ነጐድጓዳንድ ዊግትጛንድም ፃፍጨ ኣስልጩን፤ ዊገድ ግን፦ «ላጝጠ ነጐድጓዳንድ ዊግትጘውድየንት ማኽተምዝ ኣሽግጚ ፃፍተ» የው ድመ ሲመይስ ወጩን።

⁵እንዝ ግረ ያን ባኽሪል፣ ዝቨይልም ችብር ቓለው መላክድ ጝለወ ናንድየንት ንየ ሲመይ ጕዩ።

⁶ጘጝም ዘላልም ኣለም ኣሽ ፅበው፣ ሲመይስመ ጝኣቒል ፅበቍድዛትቅ፣ ዘቨስመ ጝርኣቒል ፅበቍድዛትቅ፣ ባኽሪዝመ ጝኣቒል ፅበቍድዛትቅ ፋጥረዊዝ ፃር፦ «ነስየ ደያውም።

⁷ዊገድ ግን ላጝጠትረ መላክድ ጝመለከተድ ዋሰቍ ግርቂዝ እደረ ጝኣገልጋያን ነቭያታኒዝ ጋልፀጘ ጝምስጢርድ ፋፅምሽጡ» ዩ።

⁸እንዝ ግረ ሲመይስ ወጨው ድመድ እንደ ገነ፦ «ፊጥ ባኽሪዝመ ዝቨይል ችብረው መላኪዝ ናኒስ ቢትረይ መፃፍሸንት ፊሽ» የው ይት ዊግቱ።

⁹ያንም መላኪል ፊጥ፦ «መልወ መፃፍሸንት ነቅ» ዩን፤ ጘጝም፦ «ፊሽነ ጝርት ዃይ፤ ክጊዝውድየንት ማረው ፃቭቲ፤ ክምቸይዝ ግን ሳረ ጣምቲ» ዩ።

¹⁰መልወ መፃፍሸንትም መላኪዝ ናኒስ ለምጥ ኹን፤ ይምቸይዝ ሳረይዝጘ ጣምትች፤ ዀት ግረ ግን ይጊዝውድ ማረው ኣቑ።

¹¹ጝዝ ግረ፦ «ንቕፀቍ ኽዝቭዝ፣ ዊግናንዝ፣ ቋቋጥዝ፣ ንጕሳንዝ ማጥን እንደ ገነ ትንቪት ዊግተ ጥውሸኵ» ይሽጡን።