Read xamtanga ይዃንስት እትለ 11 Bible Online

ይዃንስት እትለ 11 - xamtanga bible

ይዃንስት እትለ 11

¹እንዝ ግረ ሊክየነ ዚግ ተከው ኣቲነ ይጭስ ነይሽቱ፤ ያንም፦ «ፊትር እደረት መቅደሲዝመ መሰዊየዝ ሊኪ፤ ጝግል ሲግደቍድዛትም እግዝ።

²መቅደስ ጝኒዙ ቢዘ ኣደቫቫይድ ግን በጭ፤ ጘጝ ኣኽዛቫኒዝ ይውሽተው ኣቓንስቅ ሊኪተ፤ ጛይ ቀድስሽትረይ ኻትመየንት ኣርቭዝ ሊጘ ርፍ ደድጥቍ።

³ያንም ይሊጘ ሚዝረጫኒዝ ኻይል ይውጭር፤ ጛይም ግምር ሲርጝ ሽኽዝ ሊጘ ላዝ ዋልጥርጝን ግርቅ ትንቪት ዊግትጥቍ» ይሽጡን።

⁴ጛይም ዝቨት ኣደረይዝ በዊል ችብረቍ ሊጘ ዊጥ ዘፋኒዝመ ሊጘ መቅረዛኒዝ ጛይ።

⁵ኣውማውቅ ጛት ጒዲጠ በንሽ ጝታምቸይስ ልየ ፍ ጝታፀለታንድዛት ዅጡ፤ ጛት ጒዲጠ በነውድቅ እንዝ ኣይንትዝ የጝ ክርጠ ጥውሸውድ።

⁶እንዛይ እቅድ ትንቪት ዊግትጘው ወራቲዝ ስወ ሊቫየጘ ሲመይት ዲቨነው ስልጣን ፃይጝኵ፤ እኒዝጘም ኣቝድዛት ብሪዝጐ ላውጥጘ፣ በንጘው ግርየይዝም ዝቨት ኣውማው መቅሰፍቲዝቅ ጣዝጥጘ ስልጣን ፃይጝኵ።

⁷ጝታሚዝርነይድ ኻትጘት ግረ ጥልቂዙ ቢⶔስ ፈው ኣረዊትድ ጛት ጋጥም ድል ፃቭጡ፤ ቍውጡውም።

⁸ጝታእርሸድም ኽይረይ ኻትመየንት ኣደቫቫይል ማልሽትጡ። እኝቸን ኻትመየን ሰደውም ዊንም ግቭፅ ይሽትራ ተከዝ ጭጝሽረይ ጝታኣደረድ ሲቅልሸይሸን ጚ።

⁹ዊግኒስ፣ ነገዲስ፣ ቋቈይስ፣ ኽዝቪስ፣ ተረቍ እቅ ጝታእርሸድየንት ሻቘ ግርቅዝመ ግቨርዝ ቓልጥቍ፤ ጝታእርሸድም ዲቭሽታየጘ ኪልክልጥቍ።

¹⁰እንዛይ ሊጘ ነቭያተንድ ዝቨይል ፅበቍድዛት ጨጝቅዝጝ ዊንጛንስቅ፣ ዝቨይል ፅበቍድዛይ ጝታክርጘይዝ ዲስ ይጥቍ፤ ዲስተዝም ጛስ ጛይ ይውት ለምረለምርሽትጥቍ።

¹¹ሻቘ ግርቅዝመ ግቨርዝ ግረ ግን እደረቲስ ተረቍ ርዅየዝቍ ፈውጥ ጛግል ጥው፤ ጛይም ጕጝ ጝታልኲዝ ችብር፤ ጛት ቓልጛ ዊነቍ እቅድም ጭቕጘ ዳጝግፅ።

¹²እንዝ ግረ፦ «እንጐ ንየ ፍጥን» የው ድመ ሲመይስ ወሽ፤ ጛይም ጝታፃለታንድዛይ ቓልጛ ንየ ድምነዝ ፍ።

¹³ኣይንድም ዝቨይል ኽየው ንውፅውፅተ ኣቑ፤ ኻትመድም ፅቃ ናንድ ፋይሩ፤ ናውፅሽተነይዝም ላጝጠ ሽኽ እቅ ክር፤ እዳቐቍድም ጐውትዝ ፃይሽ፤ ሲመይት ኣምላክስም ክቭር ይው።

¹⁴ሊጘትረ ወየውድ ዲቅኩ፤ እንወ ሸወትረ ወየውድ ቃዝየዝ ተርጡ።

¹⁵ላጝጠትረ መላክድም ጝመለከትድ ዋሱ፤ ሲመይስም፦ «ኣልሚዝ ምጝግስትየን ይናኣደረ ኣቐው ኣምላክስመ ጝመሲኺዝወ ኣቕች፤ ጘጝም ዘላልም ኣልም ኣሽ ኒግስጡ» የቍ ኽየቍ ድማን ወይሽት።

¹⁶እደረት በዊል ጝታዙፋናኒል ጐየቍ ለርን ሲዘ ሽመቅልድም ጝታግምባሪዝ ደፋሽጝ እደረስ ሲግድ።

¹⁷እንትም ይ፦ «ፅብረር፣ ዊንደር፣ እጝቅትቅ ቸልደር ኣደረ ኣረር እደረወ! ክት ክኽየው ኻይልድየንት ክናኒዝ ፃይራንስቅ፣ ኒግስራንስቅም ሚዝየንዝነኵን።

¹⁸ኣኽዛቫንድ ቈጣሽጝ ዊን፤ ክቍጠድም ተሩ፤ ክረቍዝ ፊርድረው፣ ክኣገልጋያን ነቭያታኒዝ፣ ቅዱሳኒዝ፣ ክሽድም ጐውተቊዝ፣ መልቊዝመ ኽየቊዝቅ ጝታወየድ ይውረው፣ ዝቨት ድሰቍድዛትም ድስቱ ግርየድ ችጝኩ።»

¹⁹እንዝ ግረ ሲመይ ፅበው እደረት መቅደስ ጝንድ ቢቱ፤ መቅደሲዝ ኣቒልም ቃል ኪዳኒዙ ታወትድ እትሉ፤ መቭረቅ፣ ድመ፣ ነጐድጓድ፣ ዝቨዙ ንውፅውፅተ፣ ኽየው ኣም ተሩ።