Read xamtanga ይዃንስት እትለ 12 Bible Online

ይዃንስት እትለ 12 - xamtanga bible

ይዃንስት እትለ 12

¹እንዝ ግረ ኽየው ዲንቅሰው ምልክት ሲመይስ እትሉ፤ እንወ ኰረ ሲትረይ፣ ኣርቨ ጝርልኲል ፃብትረይ፣ ፅጭ ሊጘ ፅግልውጥ ፃየው ኣክሊልም ጝርኣውሪል ደፋረይ ላይ እውነ እትልች።

²ጚይም ጊዙትር ዊንች፤ እዅርተ ጕራንድም ቅምት ፃይሽር ጨጝቅሽር ቓፅች።

³ቈሽም ላየ ምልክት ሲመይስ እትሉ፤ እንወ ላጝጠ ኣቝልዝመ ፅቃ ጅቅጣንዝ ፃየው፣ ጝኣቝሊልም ላጝጠ ዘውዳን ደፋቐው ኽየው ሰረው ኽየሲቭረ እትሉ።

⁴ጝፅምርድም ሲመይት ፅግልውጢስ ሸውነድየንት ዊትራ ዝቨይል ማሉ፤ ጘጝም እውነየን እዅርዳንድ ጝርዅርድየንት ስርጠ በን እዅርተ ጕረይ እውነየንት በዊል ችብሩ።

⁵ጚይም ኽዝቭድቅ ብረትዙ ግብዝ ቅመው ግልወ ዅርድ እዅርች፤ ጝርዅርድም እደረትጐ፣ ጝዙፋኒዝጐም ናጥቅሹ።

⁶እውነየንም ሽኽዝ ሊጘ ላዝ ዋልጥርጝን ግርቅ እጝክቭክቨዝ ሊሚድሽራንስ ማጥን እደረ ጝርስ ኣስለው በራኸ ስፍረል ሰይች።

⁷ሲመይልም ኣጭነ ኣቑ፤ ምካይልስመ ጝመላካኒዝ እድየን ኽየሲቭረይጅቅ ጋጥም፤ ኽየሲቭረይዝመ ጝመላካኒዝም ዋጥርጝ ጋጥም።

⁸ዊገድ ግን ኽየሲቭረይዝመ ጝመላካኒዝ ድል ኣቕ፤ ጝዝለም ሲመይል ጛጭስ ስፍረ ችጝሺየውም።

⁹ኣልምድየንትቅ ቀሰው ኽየው ኽየሲቭረድ፣ የነትም ዳቪለውስ ዊንም ሲጣን ይሽተው ኽፅምቱ ሲቭረድ ዝቨይል ማልሽቱ፤ ጝመላካንድም ጝጅቅ ዝቨይል ማልሽት።

¹⁰እንዝ ግረ ሲመይስ ኽየው ድመ እንት ያንድ ወጩን፦ «ነን ይናኣምላክስ ቓዘነ፣ ኻይል፣ ምጝግስትም ኣቕኩ፤ ስልጣንም ጝመሲኽዝ ኣቕኩ፤ ምላሰንድም ኻር ጊርቅ ይናኣምላክት በዊል ኪሳ ዊነው ይናፅኒዝ ኪሰተድ ማልሽትኩ።

¹¹ይናፅንድም ጝት ቢገይዙ ብሪዝመ ጝታሚዝርነይዙ ቃሊዝ ድል ፃቭ፤ ጝታርዅየሸንስ ኻዝኒጝቀ ጝታቕምት ክርጘል ኣሽ ዲቍስጝ ይውጝኵነ።

¹²እንዝ ማጥን ሲመይል፣ ጝኣቒልም ፅብርነቅ ክታትርነ! ዲስ ይጥን፤ ዝቨስመ ባኽርዝ ግን ወየው፤ ምላሰንድም ዳቪለውስ ጝጭስ እዳቐቍ ግርቅድ ዊትቍ ጭቝ ኣጘጘ ኣርቓንስቅ ኽየው ቍጠዝ እቻቕ ክታጐ ጊምኩ።»

¹³ኽየሲቭረድም ዝቨይል ሊቨጘ ቓላንድ ግልወ ዅር እዅርደይ እውነየንት ሲድሱ።

¹⁴እውነየንም በራኸይል ጝርስ ኣስልሸው ስፍረይል ቢርር ፊትራንስ ማጥን ኽየው ጣልየዝቍ ሊጘ ኪፍጣን ጝርስ ይውሽት፤ እንም ኣቐውድ ኽየሲቭረይስ እክልድር ሻቘምትዝመ ግቨርዝ ጝግል ኣቕር እጝክቭክቨዝ ሊሚድሽራንስ ማጥን የጝ።

¹⁵ሲቭረድም እውነየን ኵረዝ ፊትራንስ ማጥን ዊርቨ ቝጠ ኣቝ ጝምቸይስ ጝርእግርገይል ቅብሱ።

¹⁶ዊገድ ግን ዝቨየን እውነየንት ከቭች፤ ጝርምቸድም ብዝር ኽየሲቭረድ ጝምቸይስ ቅብሰው ኣቘድየንት ስርች።

¹⁷ኽየሲቭረድም እውነየንት ኻልክሽ እዳቐቍ ጝርዚረይጅቅ ጋጥምጠ ፊሩ፤ ጛይም እደረት ትዛዝድ ሊሚደቍ እየሱስት ሚዝርነይድም ኪው ሽጝ ፃየቍ ጛይ።

¹⁸ኽየሲቭረድም ባኽር ደዪዙ ሽነይል ችብሩ።