Read xamtanga ይዃንስት እትለ 13 Bible Online

ይዃንስት እትለ 13 - xamtanga bible

ይዃንስት እትለ 13

¹እንዝ ግረ ላው ኣረዊት ባኽሪስ ፋንድ ቓሉን፤ ጘጝም ፅቃ ጂቅጣንዝመ ላጝጠ ኣቝልዝ ፃየው ዊኑ፤ ጝጅቅጣኒልም ፅቃ ዘውዳን ዊን፤ ጝኣቝሊልም ዛንዝቍ ሽጟን ዊን።

²እን ኣረዊትድም በጅወ ተከው ዊኑ፤ ዊገድ ግን ጝልኵጣንድ ድብ የነው ኽየው ኣረዊትዝቍ ልኵጣንድ ተከቍ፣ ጝምቸድ ቈሽ ኣብዘዙ ምቸ ተከው ዊኑ፤ ኽየሲቭረድም ጝኻይልድየንት፣ ጝዙፋንድየንት፣ ጝኽየው ስልጣኒዝድየንትም ጝጭስ ይዉ።

³ኣረዊቲዝቍ ኣቝሊስ ላው ኣውርድ ክርጘል ችጝዘው ልኻንዝ ፃይሸው ተከው ዊኑ፤ ዊገድ ግን ክርጘል ችጝዘው ጝልኻንድ ቓዱ፤ ኣልምድም እጝቅቅ ዲንቅሻ ኣረዊትድ ቲክኑ።

⁴እቅድም ኽየሲቭረድ ጝስልጣንድየንት ኣረዊቲዝ ይዋንስቅ ኽየሲቭረይዝ ሲግድ፤ ቈሽም፦ «ኣረዊትድ ተከውድ ኣው የጝ? ጝጅቅስ ጋጥምጠ ቸለውድ ኣው የጝ?» ይጛ ኣረዊቲዝ ሲግድ።

⁵ኣረዊቲዝም ትቪትዙ ቃልዝመ ዛንዙ ቃልዝ ዊግተነው ምቸ ይውሽቱ፤ ኣርቭዝ ሊጘ ርፍም ጝት ሸውድየንትቅ ሰራሻንስ ማጥን ጝጭስ ስልጣን ይውሽቱ።

⁶ጘጝም እደረት ዛሽጠ፣ ጝሽⶔዝመ ጝጨነይዝም ዛሽጠ፣ ሲመይ ፅበቍድዛትም ዛሽጠ ጝምቸድ ብዙ።

⁷እኒዝጘም ቅዱሳንድዛት ጋጥምጠ ድልም ፃቭጠ ጝጭስ ኻይል ይውሽቱ፤ ነገዲል፣ ወገኒል፣ ቋቈይል፣ ኽዝቪል፣ እጝቅልቅ ጘጝ ስልጣን ጕርየ ፃቭሽቱ።

⁸ኣልም ፋጥርሸት ኪርም ጝታሽድ ዝውሸው ቢገይዝ ርዅየዙ መፃፊዝ ፃፍሺየቍ ዝቨይዝቍ እቅድቅ ኣረዊቲዝ ሲግድጥቍ።

⁹ቀርዝ ፃየው እጅርድቅ ወሽነ!

¹⁰ኣውማው መራሸነውዝ ሚድቭሸው እጅርድቅ መራሽጡ፤ ኣውማው ሰይፍዝ ክረነውዝ ሚድቭሸው እጅርድቅ ሰይፍዝ ክርጡ፤ ነስየ ቅዱሳኒዝ ኣቕልዝመ እምንትዝ በንዘውድ ኣይንዝ የጝ።

¹¹እንዝ ግረ ላየ ኣረዊት ዝቨይስ ፋንድ ቓሉን፤ ጘጝም ቢገዝጘ ሊጘ ጅቅጣን ፃየው ዊኑ፤ ዊገድ ግን ኽየሲቭረይዝጘ ዊግታ ዊኑ።

¹²በውገቱ ኣረዊቲዙ ሽⶔዝም ምሉ ስልጣንዝ እጝቅትቅ ሰራሻ ዊኑ፤ ጘጝም ዝቨስመ ጝርግል ፅበቍዛትቅ ክርጘል ችጝዘው ልኻኒስ ቓደው በውረ ኣረዊትድየንት ኣምልክጥጘ ፃቩ።

¹³እቂዝ በዊልም ዝቨይል ሲመይስ ልየ ጊምዘነውል ኣሽ ኽየቍ ምልክታን ፃቫ ዊኑ።

¹⁴በውገቱ ኣረዊቲዝ ሽዝ ምልክታን ፃቭጠ ጝጭስ ስልጣን ይውሽታንስቅ ዝቨይል ፅበቍ እቅድዛት ቀሱ፤ ሰይፍዝ ቈስል ዊነዊዝ፣ ዊገድ ግን ርዅየዝ ፅበው ኣረዊቲዝ፣ ምስል ችብስጛንስ ጛት ኣዙ።

¹⁵ቈሽም ምስልድ ዊግተነው ቸላንስ ማጥን ፈውጥ ይዋንስመ፣ እኒን ምስሊዝ ሲግዳቍድዛትቅ ቍውሳንስ ማጥን ጝጭስ ስልጣን ይውሽቱ።

¹⁶እኒዝጘም መልቊዝመ ኽየቊዝ፣ ኻፍታማኒዝመ ድኺዝ፣ ጭዊዝመ በሪዝ፣ እጝቅቅ ጝታለወ ናኒል፣ ዊንም ጝታግምባሪል ምልክት ፃቭጛንስ ኣስገድድዙ።

¹⁷እንም ኣረዊቲዙ ምልክትድ፣ የነትም ጝሽድ ዊንም ጝሽⶔዙ እግዘድ እጀው ኣውማው እጅርድቅ ጅቨነውም ኣነ ቅየነው ቸላየጘ የጝ።

¹⁸ነስየ ኣይንል ጥቨቭ በንዘኵ፤ ኣይምረው ፃየው ኣውማው እጅርድቅ ኣረዊቲዙ እግዘድ ኻስቭነ፤ ምላሰንድም እግዘድ እቀ እግዘ የጝ፤ ጝእግዘድም ዋልጠ ላዝ ዋልጥርጝን ዋልጠ የጝ።