Read xamtanga ይዃንስት እትለ 14 Bible Online

ይዃንስት እትለ 14 - xamtanga bible

ይዃንስት እትለ 14

¹እንዝ ግረ ቓሉን፤ እንወ ቢገድ ፂወን ኣበይል ችብር ዊኑ፤ ጝጅቅም ጝሽⶔዝመ ጚርት ሽⶔዝ ጝታግባሪል ፃፍሸቍ ላዝ ኣርቭዝ ሲዘ ሽኽ እቅ ዊን።

²ሲመይስም ኽየው ኣቘ ገፈዙ ድመዝመ ኽየው ነጐድጓድዙ ድመድዝ ተከው ድመ ወጩን፤ ወጨው ድመድም በገነ ዲርድርሻንድ ፈው ድመድ ተከው ድመ ዊኑ።

³ዙፋኒዝ በዊል፣ ሲዘ እንሰሲዝ በዊልም፣ ሽመቅሊዝ በዊልም ኣይር መዝሙር ዚምር፤ ዝቨይዝቍ እቂዝ ማኽሊስ ቓደቍ ላዝ ኣርቭዝ ሲዘ ሽኽ እቂዝለ እኒን መዝሙርድየንት ኣውማውቅ ክንድጠ ቸሊየውም።

⁴ጛይ ድጝግላን ኣጛንስቅ እቍኒጅቅ ዲምቅሸነውዝ ጝታቕምት ኣርክሲየቍም፤ ቢገድ ፊረዊልቅ ቲክንጘኵ፤ ጛይ እቀ ማኽሊስ ቲትጝ እደረስመ ቢገይዝ ባራን ኣጛንስ ማጥን ቓደቍ ጛይ።

⁵ጝታምቸይስም ውርም ኣይንት ኻሽት ችጝሺየውም፤ ነቐፈም እጀቍም።

⁶እንዝ ግረ ላየ መላክ ሲመይስ ቢራንድ ቓሉን፤ ጘጝም ዝቨይል ፅበቍ ኽዝቪዝ፣ ነገዲዝ፣ ቋቈይዝ፣ ዊግኒዝ እንዛዝቅ ሲቭክጠ ዘላልምዙ ወንጌልድየንት ፃይ ዊኑ።

⁷ኽየው ድመዝም፦ «ጝፍርዲዙ ሰትድ ችጛንስቅ እደረት ጐውትጥን፤ ጝጭስም ክቭር ይውጥን፤ ሲመይዝመ ዝቨይዝ፣ ባኽሪዝመ ኣቘ ምኝጫኒዝ ፋጥረዊዝ ሲግድጥን» ዩ።

⁸ላየ ሊጘትረ መላክም፦ «ራዘው ጝርሽርሙጥነይዙ ቍጠይዝ ወይኒዙ ሚዘድየንት ኽዝቪዝቅ ዚስረይ ኽይረይ ባቢሎን ሊቭች! ሊቭች!» ያ ቲክኑ።

⁹ሸወትረ መላክም ኽየው ድመዝ እንት ያ ጛት ቲክኑ፦ «ኣውማው እጅር ኣረዊቲዝመ ጝምስሊዝ ሲግደው፣ ጝምልክትድየንትም ጝግምባሪል፣ ዊንም ጝናኒል ፃቨው ፅብሽ፣

¹⁰ጘጝም ውረውረቅ ዲብልቅሺየው እደረት ቍጠይዙ ፅወይል ቐዳሸው ቍጠይዙ ወይንዙ ሚዘድ ዝይጡ።

¹¹ጛት ኣሰቃይዘው ልየይስ ፈው ጥየድም ዘላልም ኣልም ኣሽ ኒየ ፍጡ፤ ኣረዊቲዝመ ጝምስሊዝ ሲግደቍድ፣ ዊንም ጝሽⶔዙ ምልክትድ ፃቭሽተቍድቅ ኻር ኪርቅ ፈውጘ እጀቍም።»

¹²እደረት ትዛዝድ ሊሚደቍ፣ እየሱስስም ኣምነሽተቍ ቅዱሳኒዝ ኣቕል በንዘውድ ኣይንል የጝ።

¹³እንዝ ግረ፦ «ነስየይስ ኣደረትቍ ኣቕጝ ክረቍድ ቀቫሸቍ ጛይ፤ ይር ፃፍ» የው ድመ ሲመይስ ወጩን፤ መንፈስም፦ «የይ! ጝታሰቭድ ጛት ቲክነው ኣቓንስቅ ጝታዝላይስ ፈውጥቍ» የኵ።

¹⁴እንዝ ግረ ቓሉን፤ እንወ ይበዊል ፃረው ድምነ ዊኑ፤ ድምነይዝ ዲጊልም እጅር ዅር ተከው ጐይ ዊኑ፤ ጘጝም ጝኣውሪል ዊርቀዙ ኣክሊል ደፋቕ ዊኑ፤ ጝናኒዝም ስለታም መይር ፃይ ዊኑ።

¹⁵ላየ መላክም መቅደሲስ ፍ ድምነይል ጐየዊዝ፦ «ዝቨይዙ ማፅወድ ችጝኩ፤ ኣይረነ ሰትድም ኣልትኩ፤ እንዝ ማጥን ክመይርድ ፃይር ኣይር» የው ኽየው ድመዝ ቓፁ።

¹⁶ድምነይል ጐየውድም ጝመይርድ ዝቨይል በርሱ፤ ዝቨየንም ኣይርሽች።

¹⁷ላየ መላክም ሲመይ ፅበው መቅደሲስ ፉ፤ ጘጝም ጘጝት ስለታም መይር ፃይ ዊኑ።

¹⁸ልየይል ስልጣን ፃየው ላየ መላክም መሰውየይዝ ጋቢስ ፍ ስለታም መይር ፃየው መላክድየንት፦ «ዘለለድ ጃንስቅ ክስለታም መይርድ ፃይር ዝቨይል ፅበው ወይኒዙ ዘለለድየንት ቀቭ» የው ኽየው ድመዝ ቓፁ።

¹⁹መላክድም ጝመይርድ ዝቨይል በርሱ፤ ዝቨይዙ ወይን ዘለለድየንትም ቀቭ እደረት ቍጠይዙ ኽየው ወይን ድቝዘነ ቢⶔል ማሉ።

²⁰ወይንድም ኻትመይዙ ቢዘይል ወይን ድቝዘነ ቢⶔል ደድሹ፤ ፊርዘዙ ልጐሚል ኣሽ ችጘው፣ ሻቘ ላ ኪለው ሚትር እክልት ኣሽም ሺፍነው ብረ ጘጝ ቢⶔስ ፍ ቅብሩ።