Read xamtanga ይዃንስት እትለ 16 Bible Online

ይዃንስት እትለ 16 - xamtanga bible

ይዃንስት እትለ 16

¹እንዝ ግረ ላጝጠ መላካንድዛት፦ «ፊጥን፤ እደረት ቍጠድየንት ፃየቍ ላጝጠ ፅውጥድዛት ዝቨይል ቅብስጥን» የው ኽየው ድመ መቀደስ ጝኒስ ፋንድ ወጩን።

²በውረ መላክድም ፊር ፅወድየንት ዝቨይል ቅብሱ፤ ኣረዊቲዙ ምልክትድ ለምረቍ፣ ጝምስሊልም ሲግደቍ እቂልም ጭቕጘ ኣሰቃይዘው ጭቓ ልኻን ፉ።

³ሊጘትረ መላክድም ፅወድየንት ባኽሪል ቅብሱ፤ ባኽርድም ክረው እጅርዙ ብሪዝጘ ኣቑ፤ ባኽር ኣቒል ፅበው ርዅየ ፃየው ፍጥርድቅ ክሩ።

⁴ሸወትረ መላክድም ጝፅወድየንት ዋርቢል፣ ኣቘ ምኝጫኒልም ቅብሱ፤ ጛይም ብር ኣቕ።

⁵እንዝ ግረ ኣቚል ስልጣን ፃየው መላክ፦ «ፅብረር፣ ዊንደር፣ ቅዱስም ኣረር ኣደረወ! እንት ሽር ፊርድራንስቅ ክት ፃድቅ የጝ።

⁶ጛይ ቅዱሳኒዝመ ነቭያቲኒዝ ብርድ ቅብስጛንስቅ ክትም ጛጭስ ብር ዚስርኵሩ፤ እኒን ጛጭስ ጥውሸው የጝ» ያንድ ወጩን።

⁷እኒዝጘም መሰውየይስ፦ «የይ! እጝቅትቅ ቸልደር ኣደረ ኣምላክወ! ክፍርድድ እማን፣ ጭቅ የውም የጝ» የው ድመ ወጩን።

⁸ሲዘትረ መላክድም ጝፅወድየንት ኰረየንትል ቅብሱ፤ ኰረየንም እቅድ ልየይዝጘ ቃጥልዳንስ ማጥን ጝርስ ኻይል ይውሽቱ።

⁹እቅድም ኰረየንት ብረይዝ ቃጥልሽ፤ ጛይ ግን እንዛይ መቅሰፍታኒል ስልጣን ፃየው እደረት ሽድየንት ዛሽጚ ንስኻ ጥዊየቍም፤ ጝጭስም ክቭር ይዊየቍም።

¹⁰ኣኰትረ መላክድም ጝፅወድየንት ኣረዊቲዙ ዙፋኒል ቅብሱ፤ ኣረዊቲዙ ምጝግስትድም ጥመዝ ስርሹ፤ እቅድም ጭቕጘ ተሰቃይሽጛንስቅ ጝታላቕድ ሚዙጛ ዊን።

¹¹ቈሽም ጝታስቃይዝመ ጝታልኻኒዝ ምላሰንዝ ሲመይቱ ኣምላክድየንት ዛሽጚ ጝታሰቪስ ንስኻ ጥዊየቍም።

¹²ዋልጠትረ መላክድም ጝፅወድየንት ኽየው ይፍራጥስ ዊርቨይል ቅብሱ፤ ምስራቂስ ተረቍ ንጕሳኒዝ ጒደነ ኣስልሻንስ ማጥን ዊርቨይዙ ኣቘድ ይዙ።

¹³ኣይንድ ኽየሲቭረይዙ ምቸይስ፣ ኣረዊቲዙ ምቸይስ፣ ኻሽወረ ነቭዪዙ ምቸይስም ዳቕፀ ተከቍ ሻቘ ርኵሳን መንፈሳን ፍጛንድ ቓሉን።

¹⁴ጛይም ታምራን ፃቨቍ ጋኒናነ መንፈሳን ጛይ፤ እንዛይ መንፈሳንድ እጝቅትቅ ቸለው ኣምላክቱ ኽየው ግርየይዝ ኣቐው ኣጭነይል ኣኽቭጥጘ ኣልሚዝቍ ንጕሳኒል ፊርጘኵ።

¹⁵«እንወ ቓፅጘይዝጘ ተጭር! መጥማጥ ኣቓየጘ፣ ጝሰውነትድም እቅ ቓላይጘጘ ነቃቕ ጝኣልቨድየንት ሊሚደው እጅር ቀቫሸው የጝ።»

¹⁶ጛይም ንጕሳንድዛት እቭራይስጢዝ ኣርማጊደውን ይሽተው ስፍረል ኣኽቭ።

¹⁷ላጝጠትረ መላክድም ጝፅወድየንት ኣየሪል ቅብሱ፤ መቅደስ ጝን ኣቒል ፅበው ዙፋኒስም፦ «ፋፅምሹ» የው ኽየው ድመ ፉ።

¹⁸ኣይንድም መቭረቅዝመ ድመዝ፣ ነጐድጓድዝመ ዝቨዙ ኽየው ናውፅሽተነዝ ኣቑ፤ እጅር ዝቨይል ፋጥርሸት ኪርም እነየው ኽየው ዝቨዙ ናውፅሽተነ ቓልሽትም ኣርቓው፤ ንውፀድ ጭቕጘ ኽየው ዊኑ።

¹⁹ኽይረይ ኻትመየንም ሻቘትል ኣድልሽች፤ ኣልሚዝቍ ንቕፀቍ ኻትምጥድም ፋይር፤ እደረ ኽይረይ ኻትመ ባቪለውንት ኻስቩ፤ ወይንዙ ሚዘድ እቻቐው ፅወድየንትም ዝይተ ፃቩ፤ እንም ጝብርቱ ቍጠድ የጝ።

²⁰ደስየታንድም እጝቅቅ ሰይ፤ ኣብቕድም ጝታስፍረይል ችጝሺየቍም።

²¹እቂልም ኣርቭዝ ኣኰ ኪለው ኣቐው ኽየው ኽየው ኣ ሲመይስ ሊቩ፤ መቅሰፍትድ ጭቕጘ ሲቅዘው ዊናንስቅ እቅድ ኣይዙ መቅሰፍቲዝ ምላሰንዝ እደረት ዛሽ።