Read xamtanga ይዃንስት እትለ 17 Bible Online

ይዃንስት እትለ 17 - xamtanga bible

ይዃንስት እትለ 17

¹ላጝጠ ፅውጥድ ፃይጝ ዊነቍ ላጝጠ መላካኒስ ላውድ ይጐ ተር፦ «ለው! ንቕፀቍ ኣቚል ጐይረይ ኽይረይ ገልምተ እውነየንት ፍርድድ ቓሊስጭር።

²ዝቨይዝቍ ንጕሳንድ ጝርጅቅ ሻርሙጥ፤ ዝቨይል ፅበቍድም ጝርሽርሙጥነይዙ ወይንዙ ሚዚዝ ራቕ» ዩ።

³እንዝ ግረ መላክድ ይት መንፈስዝ በራኸል ፊሱ፤ ጝግልም ላይ እውነ ዛንዝቍ ሽጟንዝ እቻቐው ላጝጠ ኣቝልዝመ ፅቃ ጅቅጣንዝ ፃየው ሰረው ኣረዊትዝ ዲጊል ጐይር ቓሉን።

⁴እውነየንም ይወንጠጅ፣ ሰረውም ኣቐው ኣልቨ ሲትር ዊንች፤ ቈሽም ዊርቀዝ፣ እቍዝ፣ ላየ ኪብረው ማድንዝም ሺልምሽር ዊንች፤ ጝርናኒዝም ስኽፍሸው ዊገዝመ ጝርሽርሙጥነይዙ ርኵሰቲዝ እቻቐው ዊርቀዙ ፅወ ፃይር ዊንች።

⁵ጝርግምባሪልም፦ «ገልምጢዝመ ዝቨይዙ ርኵስቲዝቅ ኵየን ኣረይ ባቪለውን ኽይረይሸን» የው ምስጢርዙ ሽ ፃፍሽ ዊኑ።

⁶እውነየንም ቅዱሳኒዙ ብረይዝመ እየሱስት ሚዝረጫኒዙ ብረይዝ እራቕር ቓሉን፤ ያንም ጝርት ቓላንድ ጭቕጘ ዲንቅጩን።

⁷እንዝ ግረ መላክድ እንት ዩ፦ «ውር ቃጥ የጝ ዲንቅሽረውድ? እውነየንት ምስጢሪዝመ ጚ ጐይረው ላጝጠ ኣቝልዝመ ፅቃ ጂቅጣንዝ ፃየው ኣረዊቲዙ ምስጢርድ ክጭስ ጋልፅጭር።

⁸ቓልደው ኣረዊትድ በውገ ዊኑ፤ ነን ግን እጀውም፤ እግረም ጥልቅ ቢⶔስ ፍጡ፤ ጝዝግረም ጝድዘሪል ፊርጡ፤ ኣልም ፋጥርሸት ኪርም ጝታሽድ ርዅየዙ መፃፊል ፃፍሽ ችጝሺየው ዝቨይል ፅበው ኣውማው እጅርድቅ ኣረዊትድ በውገ ዊነጘ፣ ነን ግን እጀው ኣቐጘ፣ እግረም ተርጡ ኣቐጘ ቓላንድ ዲንቅሽጡ።

⁹ነስየ ጥቨቭ በንዘውድ ኣይንል የጝ፤ ላጝጠ ኣቝልድ እውነየን ጐይረቍ ላጝጠ ኣብቕ ጛይ።

¹⁰እንዛይም ላጝጠ ንጕሳን ጛይ፤ ኣኰድ ሊቭጝኵ፤ ላውድ ነን እኩ፤ ላየድ ገነ ተሪየውም፤ ተራንድ ግን ዊንጠ ጥውሸውድ ዊቱ ግርየ ጭቝ የጝ።

¹¹በውገ ዊነው፣ ነን ግን እጀው ኣረዊትድ ሰውጠትረ ንጕስ የጝ፤ ጘጝ ላጝጠይስ ላውድ የጝ፤ ጝድዘሪልም ፊርጡ።

¹²ቓልደቍ ፅቃ ጅቅጣንድ ገነ ንግስነ ለምሪየቍ ፅቃ ንጕሳን ጛይ፤ ዊገድ ግን ኣረዊቲጅቅ ላው ሰት ኒግስጛንስ ማጥን ንግስነዙ ስልጣን ለምርጥቍ።

¹³ጛይም ጝታኻሰቭድ ላው የጝ፤ ጝታኻይሊዝመ ጝታስልጣኒዝም ኣረዊቲዝ ኣስርክቭዝጥቍ።

¹⁴ጛይ ቢገይል ኣጭነ ብዝጥቍ፤ ቢገድ ግን ኣደርጢዝ ኣደረ፣ ንጕሳኒዝ ንጕስ ኣቓንስቅ ጛት ድል ፃቭጡ፤ ጝጅቅ ፅበቍ ጭጝሸቍ፣ ማርፅሽተቍ፣ ኣምንሽተቍድም ላብጠ ድል ፃቭጥቍ።»

¹⁵መላክድም ዊስ ይት እንት ዩ፦ «ገልምተየን ጐይረቍ ቓልደቍ ኣቝድ ዊግናን፣ ንቕፀቍ እቅ፣ ኽዝቫን፣ ቲተቲተው ቋቈዝ ዊግተቍም፣ ጛይ።

¹⁶ኣረዊቲዝመ ቓልደቍ ፅቃ ጅቅጣኒዝ ገልምተየንት ጐርትጥቍ፤ ጝርትም ጝርባደው ናን በርስጥቍ፤ ጝርመጥማጥም እዳዝጥቍ፤ ጝርስየድም ዅጥቍ፤ ልየዝም ቃጥልጥቍ።

¹⁷እደረ ጝእቅድድየንት ፋፅምጛንስ ማጥን እኒን ኻሰቭድየንት ጝታእዘኒል እቝሩ፤ ጝቃልድየን ፋፅምሽጢስቅ ላው ኻሰቭዝ ቲስመምጝ ጝታስልጣንድየንት ኣረዊቲዝ ይውጥቍ።

¹⁸ቓልደይ እውነየንም ዝቨይዝቍ ንጕሳኒል ኒግስረይ ኽይረይ ኻትመየን ጚ።