Read xamtanga ይዃንስት እትለ 18 Bible Online

ይዃንስት እትለ 18 - xamtanga bible

ይዃንስት እትለ 18

¹እንዝ ግረ ኽየው ስልጣን ፃየው ላየ መላክ ሲመይስ ጊማንድ ቓሉን፤ ጝክቭርድ ጭቕጘ ኣቭርኸው ኣቓንስቅ ዝቨየን ኣቭርኽች።

²ጘጝም ኽየው ድመዝ፦ «ኽይረይ ባቪለውን ሊቭች! ሊቭች! ጋኒናኒዝ ፅበነ፣ ርኩሳን መንፈሳኒዝቅ ኣልተነ፣ ርኩሳን፣ ስኽፍሸቍም ዚልቒዝቅ ስፍረ ኣቕች።

³ራዘው ጝርሽርሙጥነይዙ ቍጠይዝ ወይኒዙ ሚዘድየንት ኽዝቭድቅ ዝይኩ፤ ዝቨይዝቍ ንጕሳንድም ጝርጅቅ ሻርሙጥጝኵ፤ ዝቨይዝቍ ንየጥድም ጝርንቕፀው ጝርሚችጘይስ ጐው ፃጅትጝኵ» የው ቓፁ።

⁴እንዝ ግረ ሲመይስ ላየ ድመ እንት ያንድ ወጩን፦ «ይኽዝቭ ክተ! ጝርኽጥያቲጅቅ ተቫቭርሻይረጘ፣ ጝርግል ተረው መቅሰፍቲስም ኣድልሻይረጘ ጝርጊስ ፍ።

⁵ምላሰንድም ጝርኽጥያትድ ሲመይ ኣሽ ኪምርሽኩ፤ እደረም ጝርኣመፅድ ኻስቭኩ።

⁶ጚ ይውረዊዝ ቝጠ ጝርናነቍድ ዊስጥን፤ ጚ ሰራሽረው ጝርሰቪዝቅ እፅፍ ኪፍልጥን፤ ጚ ዲቭልቅረው ፅወይልም ጝርስ ቈሽ እፅፍ ፃቭርን ዲቭልቅጥን።

⁷ጝርቕምስ ክቭርዝመ ሚችጘዝ ይውረዊዝ ቝጠ ስቃይዝመ ኽዝንዝ ይውጥን፤ ጝርእዘኒዝም ‹ያን ንግስት ኣቕ ጐይኩን፤ ልጀጊርድም ኣይቀርም፤ ኽዝን የነው ስሪስቅ ቓለቅም› ይራ ማክኽሸች።

⁸እንዝ ማጥን ጝርመቅሰፍታንድ ላው ግርየዝ ጝርግል ተርጥቍ፤ ክርጘ፣ ኽዝን፣ ግድርም ጝርግል ችጝጥቍ፤ ምላሰንድም ጝርት ፊርደው እደረ ብርቱ ኣቓንስቅ፣ ልየዝ ቃጥልሽቲ።

⁹«ጝርጅቅ ሻርሙጠቍ፣ ምችጘዝም ፅበቍ ዝቨይዝቍ ንጕሳንድም ጚ ቃጥልሽራንድ ፈው ጥየድየንት ቓልጛንድ ጝርማጥን ዋይ ዋይ ይጛ ሊዝጥቍ።

¹⁰ጝርስቃይድም ጐውትጛንስቅ እክልድጝ ችብርጝ ጝርት ‹እፈ ኽይረር ኻትመ ክተ! ክጭስ ወየው! ወየው! እፈ ብርቱ ኻትመ ባቪለውን! ክፍርድድ ላው ሰትዝ ተርኩ› ይጥቍ።

¹¹«ጝታሚርክቫኒዙ ጭነትድ ነስየ ጅበው ችጝሻው ኣቓንስቅ ዝቨይዝቍ ንየጥድ ጝርማጥን ዋይ ዋይ ይጛ ሊዝጥቍ።

¹²ፃንሸው ጭነትድም ዊርቀ፣ ቍርሸ፣ ኪብረው ቕርጘ፣ እቍ፣ ፃረው ኻር ኣልቨ፣ ይወንጠጅ ኣልቨ፣ ኻር ኣልቨ፣ ሰረው ኣልቨ፣ ሸገ ኻረ ፃየው ቃነ፣ ዝዀንዙ እርቊ፣ ኪብረው ቃነይስ፣ ንኻሲስ፣ ብረቲስ፣ እቭነ በረዲስ ተሲተው ጐዘቅ፣

¹³ቀረፈ፣ ቅመም፣ ከርቭየ፣ ቅቫት፣ እጣን፣ ወይንዙ ሚዝ፣ ዊረዙ ዘይት፣ ድምሸው ግዘነ፣ ዚርወ፣ ጊንዝቫን፣ ቢቅ፣ ፋርፅ፣ ሰረገልጥ፣ በር፣ መራሸቍ እቅም፣ ጛይ።

¹⁴ንየጥድም ጝርት፦ ‹ክት ቓቒትረው ፍረድቅ ክጊስ እክልድኩ፤ ክፃጀይዝመ ክክቭሪዝቅ ድዝኩ፤ ሊጘትም ዋጥር ተራውም› ይጥቍ።

¹⁵እንዛትቅ ጝርስ ቅየነውዝ ጝርቍዝ ፃጅተቍ ንየጥድቅ ጝርስቃይድ ጐውትጛንስቅ እክልድጝ ችብርጥቍ፤ ሊዝጛም ኻዝንጥቍ።

¹⁶ጝታድመድም ኣጕስ ሽጝ፦ ‹ፃረው ኻረ ኣልቨ፣ ይወንጠጅ ኣልቨ፣ ሰረው ኣልቨም ሲትረይ፣ ዊርቀዝመ እቍዝ ላየ ኪብረው ማይድንም ሺልምሽረይ ኽይረይ ኻትመየንስ ወየው! ወየው!

¹⁷እንቝጠ ኻፍትድቅ ላይ ሰትስ ድዝኩ› ይጥቍ። ሚርክቫኒዝ ኣዘጥድቅ፣ ሚርክቭዝ ፃጘቍድቅ፣ ሚርክቭል ሰራሸቍድቅ፣ ባኽርዝ ኒግረቍድቅ እክልድጝ ችብርጥቍ።

¹⁸ጚ ቃጥልሽራንድ ፈው ጥየድየንት ቓልጛንድ፦ ‹እኝቸን ኽይረይ ኻትመየንት ተክረይ ኻትመ ኣውል ዊንች?› ይጛ ቓፅ።

¹⁹ጝታኣውሪልም ኣወረ ኒስንስጝ ሊዝጛ ኻዝንጛም፦ ‹ኽይረይ ኻትመየንስ ወየው! ወየው! ባኽሪል ሚርክቫን ፃየቍድ፣ ጝርኻፍቲዝ ፃጅትጝ ዊን ነን ግን እንቅ ሊንታፍተስ ድዝኩ።

²⁰እፈ ሲመይ! ጝርቍዝ ዲስ ይ! ጚ ክታግል ችጝዝረው በደሊዝቅ እደረ ጝርት ፊርዳንስቅ ቅዱሳን ነቭያታንዝመ ኻወርየታንዝም ጭቕጘ ዲስ ይጥን›»

²¹እንዝ ግረ ላው ብርቱ መላክ ኽየው እጕ ቝጠ ቕርጘ ጒ ባኽሪል ዊርውሩ፤ ጘጝም እንት ዩ፦ «ባቪለውን ኽይረይ ኻትመሸን እነይር ኻይልዝ ዊርውርሽቲ፤ ነስየም ሊጘት ችጝሻይም።

²²በገነዝመ ሙዚቀዝዙ ድመ፣ ኣቲነዝመ እምቢልተዝዙ ድመ፣ ሊጘት ክጊስ ወይሽታውም፤ ኣውማው ናንዙ ጥቨቭ ፃየው እጅርቅ ሊጘት ክጊስ ችጝሻውም፤ እጕዙ ድመም ሊጘት ክጊስ ወይሽታውም።

²³መቭራትዙ ብርኻን ሊጘት ክግል ኣቭርኻውም፤ ኣስንዝመ ስሪት ድመ፣ ሊጘት ክጊስ ወይሽታውም፤ ክንየጥድ ኣልሚዝቍ ኽየቍ እቅድ ዊን፤ ክኣስማቲዝም ኽዝቫንድቅ ቀርጝኵ።

²⁴ነቭያታኒዝመ ቅዱሳኒዝዙ ብር፣ እኒዝጘም ዝቨይል ቍዉሽተቍ እቂዝ ብርድቅ ጝርጊስ ችጝሽኩ።»